ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ބޮރޫޝިއާ މޮންޗެންގްލަޑްބަކާއި މެންޗެސްޓާ ސިޓީ ބައްދަލުކުރަން އޮތް މެޗު ޖަރުމަނުގައި ކުޅެވޭނެ ގޮތް ނުވުމުން، އެ މެޗު ހަންގޭރީގެ ބުޑަޕެސްޓުގައި ކުޅެން ނިންމައިފިއެވެ.

ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި މޮންޗެންގްލަޑްބަކާއި ސިޓީ ބައްދަލުކުރާއިރު، މި މެޗު ކުޅުމަށް މީގެ ކުރިން ތާވަލުކޮށްފައި އޮތީ މި މަހުގެ 25 ވަނަ ދުވަހު ޖަރުމަނުގައެވެ. އަދި ދެވަނަ ލެގު އިންގްލެންޑުގައި ކުޅޭނީ އަންނަ މާޗު މަހުގެ 17 ވަނަ ދުވަހުއެވެ.

ޖަރުމަނުގައި ކުޅެން އޮތް މެޗު އެ ގައުމުގައި ކުޅެވޭ ގޮތް ނުވީ ކޮވިޑް-19 އާ ގުޅިގެން ކަނޑައަޅާފައިވާ އުސޫލުތަކާ ގުޅިގެންނެވެ. އެގޮތުން ކޮވިޑުގެ އައު ވޭރިއަންޓުގެ ނުރައްކާ ބޮޑުވުމާ ގުޅިގެން ޖަރުމަނު ސަރުކާރުން އެންމެ ފަހުން އެޅި ފިޔަވަޅުތަކުގެ ތެރޭގައި އިންގްލެންޑް ހިމެނޭ ގޮތަށް އެކި ގައުމުތަކުން އަންނަ މީހުންނަށް ޖަރުމަނަށް އެތެރެނުވެވޭ ގޮތަށް ވަނީ ކަނޑައަޅާފައެވެ. އެހެންކަމުން މި މެޗު ޖަރުމަނުގައި ނުކުޅެވޭނެކަން އެ ގައުމުގެ ސަރުކާރުން ވަނީ އަންގާފައެވެ.

ޔުއެފާގެ ގަވާއިދުގައިވާ ގޮތުން ހޯމް ޓީމަށް އަމިއްލަ ދަނޑުގައި މެޗު ކުޅެވޭނެ ގޮތެއް ނުހޯދިއްޖެނަމަ އެ މެޗު އެ ޓީމަށް 3-0 ގެ ނަތީޖާއަކުން ގެއްލޭނެއެވެ. އެހެންކަމުން ހަންގޭރިއަން ފުޓްބޯލް ފެޑެރޭޝަނާއި ޔުއެފާއާއެކު ބޭއްވި މަޝްވަރާތަކަށްފަހު، މި މެޗު ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައި ކުޅުމަށް މިހާރު ވަނީ ނިންމާފައެވެ.

މޮންޗެންގްލަޑްބަކާއި ސިޓީގެ މެޗު ހަންގޭރީގައި ކުޅޭއިރު، މީގެ ކުރިން ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި އާރްބީ ލައިޕްޒީގާއި ލިވަޕޫލް ބައްދަލުކުރަން އޮތް މެޗުވެސް ވަނީ ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައި ކުޅުމަށް ނިންމާފައެވެ.

ކޮވިޑާ ގުޅިގެން ޗެމްޕިއަންސް ލީގުގެ މެޗުތަކަށް ބުރޫ އަރާނެ ކަމަށް ބެލެވޭއިރު، ޗެމްޕިއަންސް ލީގުގެ ދެވަނަ ބުރުގެ ކުޅުން ފެށުމަށް ތާވަލުކޮށްފައިވަނީ މި މަހުގެ 17 ވަނަ ދުވަހުއެވެ. އަދި މި ސީޒަނުގެ ޗެމްޕިއަންސް ލީގުގެ ފައިނަލް މެޗު އޮންނާނީ މެއި މަހުގެ 29 ވަނަ ދުވަހު ތުރުކީގެ އިސްތަންބޫލުގައެވެ.