ފައިނަލް ބުރުގެ ފުރަތަމަ ދެ މެޗުވެސް އެއްވަރުވެއްޖެ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށް ގެންދާ އެސްޓީއޯ މިނިވަން ޗެމްޕިއަންޝިޕް ފުޓުބޯޅަ މުބާރާތުގެ ފައިނަލް ބުރުގެ ފުރަތަމަ ދެ މެޗުވެސް އެއްވަރުވެގެން ނިމިއްޖެއެވެ.

ދެ ގުރޫޕަކަށް ބަހާލައިގެން ޖުމްލަ 8 ޓީމު ވާދަކުރާ ފައިނަލް ބުރުގެ އޯޕަނިންގް މެޗުގައި ބައްދަލުކޮށްފައިވަނީ ގުރޫޕް 2 ގެ ގދ.ތިނަދޫ އާއި ދ.ކުޑަހުވަދޫއެވެ. ތިނަދޫގައި ކުޅެވުނު މި މެޗް ނިމުނީ 2 ޓީމުންކުރެ އެއްވެސް ޓީމަކަށް ލަނޑެއް ނުޖެހި 0-0 އިން އެއްވަރުވެގެންނެވެ. މި ގުރޫޕުގެ ހުރިހާ މެޗެއްވެސް ތިނަދޫގައި ކުޅުމަށް ހަމަޖެހިފައި ވާއިރު، މި ގުރޫޕުގެ ދެވަނަ މެޗުގައި ބައްދަލުކުރާނީ ތ. ތިމަރަފުއްޓާއި އެންމެ ފަހުގެ ރަނަރަޕް ސ. ފޭދޫއެވެ.

ފައިނަލް ބުރުގެ ދެވަނަ މެޗް އަދި ގުރޫޕް 1 ގެ ފުރަތަމަ މެޗުގައި ބައްދަލުކޮށްފައިވަނީ ހދ. ކުޅުދުއްފުއްޓާއި އެންމެ ފަހުގެ ޗެމްޕިއަން ބ. އޭދަފުއްޓެވެ. ފޯރިގަދަ ކުޅުމެއް ފެނިގެންދިޔަ މި މެޗުވެސް ނިމުނީ ދެޓީމުންކުރެ ޓީމަކަށް ލަނޑެއް ނުޖެހި އެއްވަރުވެގެންނެވެ. މި ގުރޫޕުގެ ހުރިހާ މެޗެއް ކުޅުދުއްފުށީގައި ކުޅުމަށް ހަމަޖެހިފައިވާއިރު މި ގުރޫޕުގެ 2 ވަނަ މެޗުގައި ބައްދަލުކުރާނީ ށ. މިލަންދޫ އާއި އއ. މާޅޮހެވެ.

ޖުމްލަ 8 ޓީމު ފައިނަލް ބުރުގައި ވާދަކުރާއިރު، ކުޅުދުއްފުށީގައި ހޯސްޓްކުރާ ގުރޫޕް 1 ގައި ހިމެނޭ ޓީމުތަކަކީ، ކުޅުދުއްފުއްޓާއި، އޭދަފުށީގެ އިތުރުން މިލަންދޫ އަދި މާޅޮހެވެ. ތިނަދޫގައި ހޯސްޓްކުރާ ގްރޫޕް 2 ގައި ހިމެނެނީ ތިނަދޫ އާއި، ކުޑަހުވަދޫގެ އިތުރުން ތިމަރަފުއްޓާއި ފޭދޫއެވެ.

މިއަހަރުގެ ފުޓުބޯޅަ ފޯމެޓަށް ގެނައި ބަދަލާއި ގުޅިގެން މި މުބާރާތުގެ ފައިނަލް ބުރުގެ އެންމެ ގަދަ 4 ޓީމު މިފަހަރުގެ ދިވެހި ޕްރެމިއާ ލީގަށް ކޮލިފައި ވާނެއެވެ.