ފަސްވަނަ ސައުތް އޭޝިއަން ބާސްކެޓްބޯލް އެސޯސިއޭޝަން ޗެމްޕިއަންޝިޕް (ސާބާ ޗެމްޕިއަންޝިޕް) މުބާރާތުގައި އިންޑިއާއިން ކުޅުނު ދެވަނަ މެޗުވެސް ވާދަވެރި ކުޅުމަކަށްފަހު އެޓީމުން ކާމިޔާބުކޮށްފިއެވެ.

އާދިއްތަ ދުވަހު ހަވީރު ޒުވާނުންގެ މަރުކަޒުގެ އެތެރޭ ކޯޓުގައި، ސްރީ ލަންކާއާ ދެކޮޅަށް ކުޅުނު މެޗް އެޓީމުން ކާމިޔާބުކުރީ 88 ޕޮއިންޓް – 61 ޕޮއިންޓުންނެވެ.

މެޗުގައި ދެޓީމުގެ ފަރާތުންވެސް ވަނީ ވާދަވެރި ކުޅުމެއް ފެނިގެން ގޮސްފައެވެ. އެގޮތުން ފުރަތަމަ ކުއާޓާގައި ލަންކާއިން ހަނި ލީޑެއްގައި އޮއްވާ އިންޑިއާއިންވަނީ ފަހަތުން އަރާ 17-23 އިން ފުރަތަމަ ކުއާޓާ ގެންދިޔައެވެ.

ދެވަނަ ކުއާޓާގައިވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ނަމަވެސް އިންޑިއާއިން ވަނީ މަޑުމަޑުން ކުޅުން ވަރުގަދަކުރަން ފަށާފައެވެ. އެގޮތުން އެޓީމުން 17-27 އިން މި ކުއާޓާގައިވެސް ކުރި ހޯދާފައެވެ. ނަމަވެސް ލަންކާއިން ވަނީ 3 ވަނަ ކުއާޓާގައި ކުޅުން ވަރުގަދަ ކޮށްފައެވެ. ވަރަށް ވާދަވެރިކޮށް ދިއުމަށްފަހިން މި ކުއާޓަވެސް ނިންމާލީ 15-16 އިން އިންޑިއާ ކުރީގައި އޮވެގެންނެވެ.

4 ވަނަ ކުއާޓާގައި ލަންކާގެ ފަރާތުން ފެނިގެން ގޮސްފައިވަނީ ދަށް ކުޅުމެކެވެ. ނަމަވެސް އެޓީމުން ވަނީ ތްރީ ޕޮއިންޓްސް އެޅުމަށް ބޮޑަށް މަސައްކަތް ކޮށްފައެވެ. ނަމަވެސް ރަނގަޅި ފޯމެއްގައި ކުޅެމުންދިޔަ އިންޑިއާއިން ކުއާޓާގައި ވަނީ 22 ޕޮއިންޓް ހޯދާފަ އެވެ. މި ކުއާޓާގައި ލަންކާއަށް ހޯދުނީ އެންމެ 12 ޕޮއިންޓެވެ.

އިންޑިއާއިން މުބާރާތުގައި ރަނގަޅު ކުޅުމެއް ދައްކަމުން އަންނައިރު އެޓީމުން ވަނީ މިހާތަނަށް ކުޅުނު ދެ މެޗުވެސް ކާމިޔާމިޔާބުކޮށްފައެވެ. ފުރަތަމަ މެޗް އެޓީމުން ކާމިޔާބުކުރީ ރާއްޖެއާ ވާދަކޮށްގެންނެވެ.

ޒުވާނުންގެ މަރުކަޒުގެ އެތެރޭ ކޯޓުގައި ކުޅެމުން އަންނަ މި  މުބާރާތުގައި އާދިއްތަ ދުވަހުގެ ރޭ ބައްދަލުކުރާ މެޗިގައި ބައްދަލުކުރާނީ ރާއްޖެ އާއި ބަންގްލަދޭޝްއެވެ. މުބާރާތުގައި ރާއްޖެއިން މިހާތަނަށް ކުޅުނު ދެ މެޗުންވެސް ވަނީ ބަލިވެފައެވެ.