ފަހަތުން އަރާ އިރުޝަދިއްޔާ ސްކޫލް ބަލި ކުރުމައްފަހު މައިލޯ އިންޓަ ސްކޫލް ފުޓުބޯޅަ މުބާރާތުގައި އައްޑޫ ސިޓީ ޓޯނަމެންޓްގެ 17 އަހަރުން ދަށުގެ ޗެމްޕިއަންކަން އައްޑޫ ހައި ސްކޫލުން ހޯދައިފިއެވެ.

ސ.ހިތަދޫ ފުޓުބޯޅަ ދަނޑުގައި ހޮނިހިރު ދުވަހު ހަވީރު ކުޅުނު ފައިނަލް މެޗް އައްޑޫ ހައި ސްކޫލުން ކާމިޔާބުކުރީ އިރުޝަދިއްޔާ ސްކޫލާ ވާދަކޮށް 3-1ގެ ނަތީޖާއަކުންނެވެ.

 މެޗު ފެށިގެން މޮޅަށް ކުޅެފައިވަނީ އިރުޝަދިއްޔާ ސްކޫލުންނެވެ. އެގޮތުން މެޗުގައި ފުރަތަމަ ލަނޑު ޖަހާ ލީޑު ނަގާފައި ވަނީވެސް އެޓީމުންނެވެ. މެޗުގެ 20 ވަނަ މިނެޓުގައި މި ލަނޑު އެޓީމަށް ކާމިޔާބުކޮއްދިނީ ހުސައިން އައިކް އެވެ.

ނަމަވެސް އައްޑޫ ހައި ސްކޫލުން ވަނީ ކުޅުން އިތުރަށް ވަރުގަދަކޮށް މެޗުގެ ކޮންޓްރޯލް އަތުލާފައެވެ. އެގޮތުން އެޓީމުން ލަނޑު ޖަހާނެ ފުރުސަތުތަކެށް ތަނަވަސްކޮށް ހަމަލާ އުފައްދަން ފެއްޓިއެވެ. ނަތީޖާ އެއްގެ ގޮތުން 33 ވަނަ މިނެޓުގައި އެޓީމުން މެޗުގެ ނަތީޖާ ހަމަހަމަ ކުރިއެވެ. އެޓީމަށް ނަތީޖާ ހަމަހަމަ ކޮއްދިނީ ހާޒިމް ފައުޒީ އެވެ.

ނަތީޖާ އެއްވަރުކުރިތާ މިނެޓެއްވެސް ނުވަނީސް އެޓީމުން ވަނީ އިތުރު ލަނޑެއް ކާމިޔާބުކޮށް ލީޑު އަތުލާފައެވެ. މި ލަނޑު އެތީމަށް ކާމިޔާބުކޮއްދިނީ މުހަންމަދު އަލްސަން ޝަނީޒް އެވެ. މެޗްގެ ފުރަތަމަ ހާފު ނިމުނީ 2-1 ގެ ނަތީޖާއަކުން އިރުޝަދިއްޔާ ސްކޫލުގެ މައްޗަށް އައްޑު ހައި ސްކޫލުން ކުރީގައި އޮވެގެންނެވެ.

ދެވަނަ ހާފު އައްޑޫ ހައި ސްކޫލުން ފެށީ އަނެއްކާވެސް އެޓީމުގެ ފެންވަރު ދައްކާލައިގެންނެވެ. 46 ވަނަ މިނެޓުގައި އެޓީމުން ވަނީ ލީޑު ފުޅާ ކޮއްފައެވެ. މި ލަނޑު އެޓީމަށް ކާމިޔާބުކޮއްދިނީ މެޗުގައި މޮޅު ކުޅުމެއް ދެއްކި، އަދި މެޗުގެ ނަތީޖާވެސް އެޓީމަށް ހަމަހަމަ ކޮއްދިން ލަނޑު ކާމިޔަބު ކޮއްދިން ކުޅުންތެރިޔާ ހާޒިމް ފައުޒީ އެވެ.

ޗެމްޕިއަން ޓީމާއި ރަނަރަޕް ޓީމަށް ތައްޓާއި މެޑަލް ހަވާލުކޮއްދެއްވީ ފުޓްބޯޅަ އެސޯސިއޭޝަން އޮފް މޯލްޑިވް (އެފްއޭއެމް)ގެ ރައީސް ބައްސާމް އަދީލް ޖަލީލް އާއި އެއިދާރާގެ ނައިބު ރައީސް އަހްމަދު ޝަކީބް އާއި އެއިދާރާގެ ތެކްނިކަލް ޑިރެކްޓާރ ޖޭން ވަންލީ އެވެ.