އިންސްޓަގްރާމްގައި ކުރި ޕޯސްޓަކުން ސިޓީގެ ސަގްނާ ޖޫރިމައިނާކޮށްފި
އިނގިރޭސި އެފްއޭ އިން ވަނީ ސަގްނާ 40،000 ޕައުންޑުން ޖޫރިމައިނާކޮށްފަ
މެންޗެސްޓާ ސިޓީ އަށް ކުޅޭ ސަގްނާ
އިންސްޓަގްރާމްގައި ކުރި ޕޯސްޓަކުން މެންޗެސްޓާ ސިޓީގެ ބާކްރީ ސަގްނާ ޖޫރިމައިނާކޮށްފި އެވެ.
މި މަހު ބާންލީ އަތުން 1-2 ގެ ނަތީޖާއަކުން ސިޓީ މޮޅުވި މެޗުގައި ރެފްރީގެ ނިންމުންތަކާ ސުވާލުއުފައްދާ ސަގްނާ އިންސްޓަގްރާމްގައި ކުރި ޕޯސްޓާ ގުޅިގެން އިނގިރޭސި އެފްއޭ އިން ވަނީ އޭނާ 40،000 ޕައުންޑުން ޖޫރިމައިނާކޮށްފަ އެވެ.
އެ މެޗުގައި ސާޖިއޯ އަގުއެރޯ އަދި ގައެލް ކްލިޗީގެ ލަނޑުތަކުން ސިޓީ މޮޅުވިއިރު، ބާންލީގެ ޖޯހަން ގުޑްމަންޑްސަން އަށް ކުރި ނުރައްކާތެރި ފައުލަކާ ގުޅިގެން ސިޓީގެ ފެނާންޑީނިއޯ އަށް ރެފްރީ ވަނީ ސީދާ ރަތް ކާޑެއް ދައްކާ ދަނޑުން ފޮނުވާލާފައެވެ. އެކަމާ ސިޓީގެ ކުޅުންތެރިން ވަނީ މެޗުގައި ރެފްރީގެ ނިންމުންތަކަށް ނުރުހުން ފާޅުކޮށްފައެވެ.
މީގެއިތުރުން އެ މެޗުގައި ބާންލީގެ މިޑްފިލްޑަރު ޖޯޖް ބޮއިޑްއާ ދެމެދު ހިނގި ހަމަނުޖެހުންތަކާ ގުޅިގެން ރެފްރީ ވަނީ ސަގްނާ އަށް ވެސް މެޗުގައި ރަތް ކާޑެއް ދައްކާފަ އެވެ.
އެކަމާ ނުރުހުން ފާޅުކޮށް ސަގްނާ އިންސްޓަގްރާމްގައި ޕޯސްޓެއް ކުރިނަމަވެސް އެފްއޭ އިން އޭނާއާ މެދު ފިޔަވަޅު އެޅުމުގެ ކުރިން އެ ޕޯސްޓް ވަނީ ޑިލީޓްކޮށްލާފައެވެ.
ސަގްނާ ވަނީ މި ސީޒަނުގައި ސިޓީ އަށް 11 މެޗު ކުޅެދީ މޮޅު ކުޅުމެއް ދައްކާފައެވެ. މީގެއިތުރުން އޭނާ ވަނީ މިދިޔަ ސީޒަނުގައި 28 މެޗު އެޓީމަށް ކުޅެދީފަ އެވެ.
