މި މަހުގެ 19 ވަނަ ދުވަހު ރާއްޖޭގައި ފެށުމަށް ހަމަޖެހިފައިވާ ސާބާ ޗެމްޕިއަންޝިޕް ބާސްކެޓް މުބާރާތުގައި ރާއްޖެ ކުޅޭ ފުރަތަމަ މެޗުގައި ވަރުގަދަ އިންޑިޔާއާ ދެކޮޅަށް ނުކުންނަން ޖެހިއްޖެއެވެ.

މި މުބާރާތުގައި ރާއްޖޭގެ އިތުރުން 4 ގައުމަކުން ވާދަކުރާ އިރު، ރާއްޖެ ކުޅޭ ފުރަތަމަ މެޗުގައި މި މަހުގެ 19 ވާ ހުކުރު ދުވަހުގެރޭ ނުކުންނާނީ މި ސަރަހައްދުގެ ގަދަބާރު އިންޑިޔާއާ ދެކޮޅަށެވެ. އަދި ރާއްޖެ ކުޅޭ ދެވަނަ މެޗުގައި މި މަހުގެ 20 ވަނަ ދުވަހު ނުކުންނާނީ ނޭޕާލާ ދެކޮޅަށެވެ.

މުބާރާތުގައި ރާއްޖެ ކުޅޭ ތިންވަނަ މެޗުގައި 21 ވަނަ ދުވަހު ބަންގްލަދޭޝްއާ ދެކޮޅަށް ނުކުންނައިރު، ހަތަރު ވަނަ މެޗުގައި ނުކުންނާނީ މި މަހުގެ 22 ވަނަ ދުވަހު ސްރީ ލަންކާއާ ދެކޮޅަށެވެ.

ދުވާލަކު ދެ މެޗު ކުޅުމަށް ހަމަޖެހިފައިވާ މި މުބާރާތް ހުޅުވާ މެޗުގައި ބައްދަލުކުރާނީ ބަންގްލަދޭޝް އާއި ނޭޕާލެވެ.

ރާއްޖޭގެ ޓީމުގެ ކެޕްޓަންގެ މަގާމަށް މުހައްމަދު ޒިލާލް (ޒިލާ) ހަމަޖައްސާފައިވާ އިރު، މި ޓީމުގައި ޒުވާން ކުޅުންތެރިން ހިމެނޭކަން ފާހަގަކޮށްލެވެއެވެ.

މި ސަރަހައްދުގެ ފަސް ގައުމަކާއެކު ފެށުމަށް ހަމަޖެހިފައިވާ މި މުބާރާތުގައި ވާދަކުރާ އިންޑިއާ ޓީމަކީ އެންމެ ވަރުގަދަ ޓީމު ކަމަށް އެހެން ހުރިހާ ޓީމުތަކުން ވެސް އެއްބަސްވެއެވެ. އެގޮތުން ރާއްޖެއަށް ވެސް އެންމެ އުނދަގޫވާނެ ޓީމެއްގެ ގޮތުގައި ބެލެވެނީ އިންޑިއާ އެވެ.

ރާއްޖެއެމްވީ އަށް މައުލޫމާތު ދެމުން ޒިލާ ބުނެފައިވަނީ މުބާރާތުގައި ވާދަކުރާ ފަސް ޓީމުގެ ތެރެއިން އިންޑިއާ އަދި ލަންކާއަކީ ނިސްބަތުން ވަރުގަދަ ދެ ޓީމް ކަމަށާއި އެހެން ނަމަވެސް ދެން ހުރި ޓީމުތަކަކީ ބައެއް އެހެން މުބާރާތްތަކުގައި ބަލިކޮށްފައިވާ ޓީމުތައް ކަމަށެވެ.

"މިހުރިހާ ޓީމުތަކެއްގެ ތެރެއިންވެސް އިންޑިއާ އަކީ ވަރުގަދަ ޓީމެއް، އެޓީމު ނޫން އެހެން ހުރިހާ ޓީމެއްގެ މައްޗަށް ކުރި ހޯދުމަކީ ގައުމީ ޓީމުގެ އަޒުމެއް." ޒިލާ ބުންޏެވެ.

މުބާރާތުގައި ރާއްޖެ ކުޅޭ ފުރަތަމަ މެޗުގައި އިންޑިޔާއާ ދެކޮޅަށް ނުކުންނަންޖެހޭ އިރު، މިއީ މުބާރާތް ފަށާއިރު ރާއްޖޭގެ ޓީމަށް ލިބިގެންދާނެ އިތުރު ފިލާވަޅަކަށް ވެގެންދާނެ އެވެ. އެގޮތުން މުބާރާތުގައި ރާއްޖެ ދެން ވާދަކުރަންޖެހޭ މެޗުތަކުގައި ރަނގަޅު ނަތީޖާތަކެއް ނެރުމަށް ކުޅުންތެރިންނަށާއި ކޯޗިން ސްޓާފުންނަށް ގިނަ ކަންތައްތަކެއް ދަސްވެގެންދާނެ ކަމަކަށް މިކަން ވެގެންދާނެ އެވެ.

މި މުބާރާތަކީ ރާއްޖޭގައި ބާއްވާ މިފަދަ ބާސްކެޓްގެ ބޮޑު މުބާރާތެއް ކަމުން ޓީމުގެ ކުޅުންތެރިންނާ އެއްވަރަށް ސަޕޯޓަރުންގެ ވެސް އެއްބާރުލުން ވަރަށް މުހިންމެވެ.

މި މުބާރާތުގައި ވާދަކުރާ ޓީމުތައް މި މަހުގެ 18 ވަނަ ދުވަހު ރާއްޖެ އައުމަށް ހަމަޖެހިފައިވާ އިރު، މުބާރާތް ކުރިއަށްދާނީ މި މަހުގެ 19 އިން 25 އަށް ޒުވާނުންގެ މަރުކަޒު އެތެރޭ ކޯޓުގައެވެ.