އާސެނަލް އާއި ސިޓީގެ މެޗް އެއްވަރުވެ އިތުރު ހުރަސްތަކެއް

މެންޗެސްޓާ ސިޓީ އާއި އާސެނަލް ބައްދްލު ކުރި މެޗު 2-2 ގެ ނަތީޖާއަކުން އެއްވަރުވެއްޖެ އެވެ.

މި ނަތީޖާއާއެކު ދެޓީމަށް ވެސް ވަނީ ޕޮއިންޓް ތާވަލުގެ ކުރި އަށް ދިއުމަށް ހުރަހަކާ ކުރިމަތިވެފަ އެވެ.

މެޗުން މޮޅުވެގެން، ސިޓީއަށް ތާވަލުގެ ތިން ވަނައަށް ޖެހިލެވެން އޮތް ނަމަވެސް، އެ ފުރުސަތު ވަނީ ގެއްލިފަ އެވެ. ހަމަ އެއާއެކު އާސެނަލް ވެސް މެޗުން މޮޅުވެގެން ތާވަލުގެ ފަސް ވަނަ އަށް ޖެހިލުމަށް ފުރުސަތު ލިބިފައި ވެއެވެ. އާސެނަލްގެ އަމިއްލަ ދަނޑުގައި ކުޅުނު މެޗުގައި ފުރަތަމަ ލީޑް ނެގީ ސިޓީންނެވެ. ފަސް ވަނަ މިނެޓްގައި އެޓީމަށް މިލަނޑު ކާމިޔާބުކޮށްދިނީ، ލިއޮރީ ސޭނޭ އެވެ.

ނަމަވެސް ފުރަތަމަ ހާފު ނިމުމުގެ ކުރިން 40 ވަނަ މިނެޓްގައި ތިއޯ ވޮލްކޮޓް ވަނީ އާސެނަލް އަށް ނަތީޖާ ހަމަހަމަ ކޮށްދީފަ އެވެ. އަދި އޭގެ ދެ މިނެޓް ފަހުން، ސާޖިއޯ އަގުއޭރޯ ވަނީ ސިޓީ އަށް އަލުން ލީޑް ނަގައިދީފަ އެވެ. މެޗުގައި އާސެނަލަށް ނަތީޖާ ހަމަހަމަކޮށްދިނީ ދެ ވަނަ ހާފުގެ އަށް ވަނަ މިނެޓްގައި ޝްކޮޑްރާން މުސްތަފީ އެވެ. ރޭގެ މެޗުގައި އާސެނަލްގެ ފަރާތުން ރަނގަޅު ކުޅުމެއް ފެނިގެން ދިޔަ ނަމަވެސް ފަހު ހާފުގައި ވެސް ލަނޑުޖަހާނެ ރަނގަޅު ފުރުސަތުތަކެއް ސިޓީން ތަނަވަސްކޮށްފައި ވެއެވެ.