ގަތަރާއެކު ޚާރިޖީގުޅުން ގާއިމްކުރަން ރާއްޖެއިން ނިންމައިފި
ރާއްޖެއިން ގަތަރާ އެކު އޮތް ހާރިޖީ ގުޅުންތައް ވެސް ނިމުމަކަށް ގެނައީ ޔާމީންގެ ވެރިކަމުގައި
(ފައިލް ފޮޓޯ) ރާއްޖެ އާއި ގަތަރާއެކު އެންމެ ފުރަތަމަ ސިޔާސީ ގުޅުން ގާއިމުކޮށްފައި ވަނީ 1984 ވަނަ އަހަރުގެ މެއި މަހުގެ 26 ވަނަ ދުވަހު
ދިވެހިރާއްޖެއިން ޤަތަރާއެކު ޑިޕްލޮމެޓިކް ގުޅުން ޤާއިމްކުރުމަށް ނިންމައި، އެކަން ޚާރިޖީ ވަޒީރު ޢަބްދުﷲ ޝާޙިދު އިއުލާންކުރައްވައިފިއެވެ.
މިކަން ހާމަކުރައްވާ މިނިސްޓަރު ޝާހިދު ވަނީ ޓްވީޓު ކުރައްވާފައެވެ. ގަތަރާ އެކު އަލުން ގުޅުން ގާއިމުކުރަން ރާއްޖެ އިން ނިންމިކަން އިއުލާން ކުރައްވަމުން ފޮރިން މިނިސްޓަރު ޝާހިދު ކުރެއްވި ޓުވީޓުގައި ވިދާޅުވީ، ގަލްފު ސަމިޓަށްފަހު، ގައުމުތަކުން އެއްބަސްވި އެއްބަސްވުންތަކަށް ރާއްޖެ އިން މަރުހަބާ ކިޔާ ކަމަށެވެ.
ޝާހިދު ވިދާޅުވީ، ގަތަރުގެ ކަމާބެހޭ ފަރާތްތަކާ މަޝްވަރާ ކުރައްވައި، އެ ގައުމާ އެކު އަލުން ގުޅުން ގާއިމުކުރަން ރާއްޖެ އިން ނިންމާފައިވާ ކަމަށެވެ.
ޤަތަރާއެކު ގުޅުން ޤާއިމްކުރުމާ ބެހޭ ގޮތުން އެގައުމުގެ މިނިސްޓަރ އޮފް ސްޓޭޓް ފޮރ ފޮރިން އެފެއަރޒް ސުލްޠާން ބިން ސާދު އަލް މުރައިޚީ އާއިއެކު މިނިސްޓަރ ޝާހިދު ވަނީ އަންގާރަ ދުވަހުގެ ރޭ މަޝްވަރާކުރައްވާފައެވެ. އަދި ސަޢޫދީ ޢަރަބިއްޔާގައި އޮތް ގަލްފް ޤައުމުތަކުގެ ބައްދަލުވުމުގެ ނިންމުންތަކަށް ދިވެހި ސަރުކާރުން ވަނީ މަރުޙަބާ ކިޔާފައެވެ.
ކުރީގެ ރައީސް ޔާމީންގެ ވެރިކަމުގައި ރާއްޖެއާއި ޤަތަރާއި ދެމެދު އޮތް ގުޅުން ކަނޑާލުމަށްފަހު، މިހާރުގެ ސަރުކާރުން އެގައުމާއި ދެމެދު އަލުން ގުޅުން ބަދަހިކުރަން ނިންމިއިރު، ސައުދީ އަރަބިއްޔާ އާއި މެދު އިރުމަތީގެ އެހެން ގައުމުތަކުން ވެސް ވަނީ ގަތަރާ އެކު ސުލްހަވެ އަޅާފައިވާ އެންމެހާ ދަތިކުރުމުގެ ފިޔަވަޅުތައް ނިމުމަކަށް ގެނެސް އަލުން ގުޅުން ގާއިމްކޮށްފަ އެވެ.
ރައީސް އިބްރާޙީމް މުހައްމަދު ޞާލިހު ވަނީ ރިޔާސީ އިންތިހާބުގެ ކެމްޕޭނުގައިވެސް ރާއްޖެއާއި ޤަތަރު އަދި ކޮމަންވެލްތާއި ގުޅުން ބަދަހިކުރާނެ ކަމަށް ވިދާޅުވެފައެވެ.
ގަތަރާއެކު ރާއްޖެއިން ގާއިމުކޮށްފައިވާ ސިޔާސީ ގުޅުން ކުރީގެ ރައީސް ޔާމީންގެ ވެރިކަމުގައި ކަނޑާލީ ޓެރަރިޒަމާއި ހައްދުފަހަނައެޅުމާ ދެކޮޅަށް ދިވެހި ސަރުކާރުން ގެންގުޅޭ ސިޔާސަތުގެ ދަށުން ކަމަށް ބުނެ 2017 އަހަރުގެ ޖޫން މަހުގެ 5 ވަނަ ދުވަހުއެވެ.
ރާއްޖެ އާއި ގަތަރާއެކު އެންމެ ފުރަތަމަ ސިޔާސީ ގުޅުން ގާއިމުކޮށްފައި ވަނީ 1984 ވަނަ އަހަރުގެ މެއި މަހުގެ 26 ވަނަ ދުވަހުއެވެ.
