ޔޫއޭއީއިން ސިނޯފަރމްގެ ކޮވިޑް ވެކްސިނަށް ހުއްދަދީފި

ޗައިނާގެ ސިނޮފަރމް ކުންފުނިން ކޮވިޑް-19 އަށް އުފައްދާފައިވާ ވެކްސިނަށް ޔުނައިޓެޑް އަރަބް އެމިރޭޓްސް (ޔޫއޭއީ) އިން ހުއްދަދީފިއެވެ.

ބުދަ ދުވަހު ޔޫއޭއީއިން ސިނޮފަރމްގެ ވެކްސިނަށް ހުއްދަ ދީފައިވާއިރު، އެގައުމުން ވަނީ އެގައުމުގައި ކުރިއަށް ގެންދިޔަ ސިނޮފަރމް ވެކްސިންގެ ކްލިނިކަލް ޓްރަޔަލްތަކުގެ ނަތީޖާއި އެ ވެކްސިނަކީ ކޮވިޑް-19 އަށް 86 އިންސައްތަ ރައްކާތެރިކަން ކަށަވަރުކޮށްދޭ ވެކްސިނެއް ކަމަށްބުނެފައެވެ. އެގޮތުން ވެކްސިނަށް ހުއްދަދެވިގެން ދިއުންމީ އެޅިގެން ދިޔަ މުހިންމު ފިޔަވަޅެއް ކަމަށް ޔޫއޭއީގެ ހެލްތު މިނިސްޓްރީއިން ފާހަގަކުރެއެވެ.

ސިނޮފަރމްގެ މި ވެކްސިންގެ ދެ ޑޯޒް ދޭއިރު، ދެ ވަނަ ޑޯޒް ޖަހަނީ ފުރަތަމަ ޑޯޒް ޖަހާތާ 21 ދުވަސް ފަހުންނެވެ.

ޔޫއޭއީއިން ވަނީ ސެޕްޓެމްބަރ މަހު ސިނޮފަރމްގެ މިވެކްސިން އެމަޖެންސީކޮށް އެގައުމުގެ ބޭނުންކުރުމުގެ ހުއްދަވެސް ދީފައެވެ.

ސިނޮފަރމްއިން ދެ ވެކްސިނެއްގެ މަސައްކަތް ކުރިއަށް ގެންދާއިރު، އެއީ ވޫހާން އިންސްޓިޓިއުޓް އޮފް ބަޔަލޮޖިކަލް ޕްރޮޑަކްޓްސް އަދި ބެއިޖިން އިންސްޓިޓިއުޓް އޮފް ބަޔަލޮޖިކަލް ޕްރޮޑަކްޓްސްއާ ގުޅިގެން އެކުންފުނިން އުފައްދާ ވެކްސިނެވެ.