އެމެރިކާގެ ސްޓޭޓް ޑިޕާޓްމަންޓުން ބަހްރެއިންއަށް ގާތްގަޑަކަށް 911.4 މިލިއަން ޑޮލަރުގެ ހަތިޔާރު ވިއްކުމަށް ހުއްދަ ދީފިއެވެ. އޭގެ ތެރޭގައި ހެލިކޮޕްޓަރު ހިމެނޭ ކަމަށް ވެސް އެމެރިކާގެ ސެކިއުރިޓީ ކޯޕަރޭޝަން އޭޖެންސީ އިން ވަނީ ބުނެފައެވެ.

ޑިޕާޓްމަންޓް އޮފް ޑިފެންސް އޭޖެންސީގެ ވެބްސައިޓުން ހާމަކުރި ގޮތުގައި ވިއްކާލަން ހަމަޖެހިފައި މިވަނީ ހަމަލަދޭ އޭ.އެޗް – 1.ޒެޑްގެ 12 ހެލިކަޕްޓަރާއި، 26 އިންޖީނާއި، ގިނަ އަދަދެއްގެ މިސައިލް އަދި ރޮކެޓްސްގެ އިތުރުން އެކިކަހަލަ ހަގުރާމަ މަތީ އާލާތް ތަކެވެ.

"ކުރަން މިއުޅޭކަމުގެ ސަބަބުން އެމެރިކާގެ ޚާރިޖީ ޕޮލިސީއަށާއި ނެޝަނަލް ސެކިއުރިޓީއަށް ކޮންޓިރިބިއުޓް ވެގެން ދާނެ ކަމަށާއި،  އެކުވެރި ނޮން-ނޭޓޯގެ ގައުމެއްގެ ސަލާމަތާއި ރައްކާތެރިކަން ކުރިއަށް ވުރެ ބޮޑަށް ކަށަވަރު ކުރެވި، ސަރަހައްދުގެ އަމާންކަން ގާއިމު ކުރުމަށް މަގު ފަހިވެގެން ދާނެ"  ޑީ.ސީ.އޭ. ސްޓޭޓްމަންޓިގައި ބުނެފައިވެއެވެ.

ހަތިޔާރު ވިއްކުމުގެ އިތުރުން އެއެއްޗެހި ބޭނުން ކުރަން ދަސް ކޮށްދިނުމާއި ޕަރސަނަލް ޓްރޭނިން ދިނުމާއި އެކިކަހަލަ ޓްރޭނިންގެ އިތުރުން ތަފާތު ޚިދުމަތްތައް ދިނުމަށް ވަނީ ހަމަޖެހިފައެވެ.