ކޮވިޑް-19: ވޫހާން ހޮސްޕިޓަލުގެ އިސްވެރިޔާ މަރުވި ކަމަށް ބުނާ ހަބަރު ދޮގުކޮށްފި

ކޮވިޑް- 19 ފެތުރެން ފެށި މައި މަރުކަޒު ކަމަށްވާ ވޫހާން ހޮސްޕިޓަލުގެ އެންމެ އިސްވެރިޔާ އަށް ކޮރޯނާ ވައިރަސް ޖެހި އޭނާ މަރުވި ކަމަށް މީޑިއާތަކުން ރިޕޯޓުކުރުމުން އެ ވާހަކަތައް ދޮގުކޮށްފިއެވެ.

ޗައިނާގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި ވޫހަންގެ ވޫޗަން ހޮސްޕިޓަލުގެ އެންމެ އިސްވެރިޔާ ޑރ. ލިއު ޝީމިން ވަނީ ކޮރޯނާވައިރަސް ޖެހިގެން މަރުވެފައެވެ. އެކަމަކު އޭނާގެ ޙާލު ނާޒުކު ކަމަށާއި، ފަރުވާ ދެމުން އަންނަ ހޫބޭ ޕްރޮވިންޝަލް ހެލްތު ކޮމިޝަނާއި ޙަވާލާދީ އިނގިރޭސިވިލާތުގެ ޑެއިލީމެއިލް އިން ވަނީ ރިޕޯޓުކޮށްފައެވެ.

ޑރ. ލިއު މަރުވި ކަމަށް ރިޕޯޓުކޮށްފައިވަނީ ރެޑް ސްޓަރ ނިއުސްއިންނެވެ. ޗޮންގިންގައި ހުންނަ ރެޑް ސްޓަރ އިން އެ ޚަބަރު ރިޕޯޓުކޮށްފައިވަނީ ގިނަ މަސްދަރުތަކަކުން ކަށަވަރު ކުރުމަށް ފަހު ކަމަށް އެ ނޫހުގައި ވަނީ ބުނެފައެވެ.

އެކަމަކު އެކަމާއި ގުޅިގެން ވޫޗަން ހޮސްޕިޓަލުން އަދި މިހާތަނަށް އެއްޗެއް ބުނެފައެއް ނުވެއެވެ. ހޯމަ ދުވަހާ ހަމަޔަށް ކޮވިޑް-19 ޖެހިގެން މަރުވި މީހުންގެ ޢަދަދު 1800 އަށް ވަނީ އަރާފައެވެ.

ޗައިނާގެ ނެޝަނަލް ހެލްތު ކޮމިޝަނުން ހާމަކޮށްފައިވާ ގޮތުގައި މިހާތަނަށް 70،548 މީހަކު ވަނީ ބައްޔަށް ޕޮޒިޓިވްވެފައެވެ. ހަލުވިކަމާއެކު ފެތުރެމުން އަންނަ ނޮވެލްކޮރޯނާ ވައިރަސް ޗައިނާއިން އެކަނި 2048 މީހަކު އަލަށް ބައްޔަށް ޕޮޒިޓިވްވެފައިވެއެވެ.

ބައްޔަށް ހުށަހެޅޭ މީހުންގެ ޢަދަދު އިތުރުވަމުންދާތީ ހުބެއި ޕްރޮވިންސުން ވަނީ އާ ފިޔަވަޅުތަކެއް އަޅާފައެވެ. އެގޮތުން އެ ޕްރޮވިންސްގެ ސިޓީތަކުގައި ޕްރައިވެޓް ވެހިކަލްތައް ދުއްވުން މަނާކުރުމަށް ވަނީ ނިންމާފައެވެ.