ޔޫއޭއީއިން ޕާކިސްތާނަށް ތިން ބިލިއަން ޑޮލަރުގެ އެހީއެއް ދެނީ
މި އިންވެސްޓްމަންޓް ކުރަނީ އަބޫދާބީ ފަންޑުން
ޕާކިސްތާނުގައި ޔޫއޭއީއިން ފަންޑު ކޮށްގެން ހަދާފައިވާ ފްރެންޑްޝިޕް ރޯޑް
ޕާކިސްތާނަށް އެހީ ވުމުގެ ގޮތުން އެ ގައުމުގެ މަރުކަޒީ ބެންކުގައި ތިން ބިލިއަން ޑޮލަރު ޑިޕޮސިޓް ކުރުމަށް ނިންމާފައިވާ ކަމަށް އެކުވެރި އަރަބި އިމާރާތުން (ޔޫއޭއީއިން) އިއުލާން ކޮށްފިއެވެ.
ގައުމުތަކަށް އެހީ ވުމަށާއި އެހެނިހެން އިންވެސްޓްމަންޓްތައް ކުރުމަށް ޔޫއޭއީއިން އުފައްދާފައިވީ އަބޫ ދާބީ ފަންޑުން ހުކުރު ދުވަހު ނެރުނު ބަޔާނެއްގައި ބުނެފައިވަނީ ކުރިޔަސް އޮތް ދުވަސްކޮޅުގެ ތެރޭގައި މި އަދަދު ސްޓޭޓް ބޭންކް އޮފް ޕާކިސްތާނުގައި ޑިޕޮސިޓް ކުރާނެ ކަމަށެވެ.
މި އިންވެސްޓްމަންޓަކީ ޕާކިސްތާނުގެ ބޭނުން ކުރެވޭ ފައިސާގެ އަދަދު އިތުރު ކުރުމަށާއި ބޭރު ފައިސާގެ ރިޒާވް އިތުރު ކުރަން މަގު ފަހި ކުރުން ކަމަށްވެސް އަބޫ ދާބީ ފަންޑުން ވަނީ މައުލޫމާތު ދީފައެވެ.
ޔޫއޭއީއިން ބުނެފައި ވަނީ މި ލޯނަކީ ދެ ގައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހި ކުރުމުގެ ގޮތުން ކުރާ ކަމެއް ކަމަށެވެ.
އަބޫ ދާބީ ފަންޑުން ވަނީ މިހާތަނަށް ޕާކިސްތާނުގައި ތަރައްގީގެ 8 މަޝްރޫއެއް ހިންގާފައެވެ. އަދި މި މަޝްރޫއުތަކުގެ އަގު 400 މިލިއަން ޑޮލަރަށް އަރައެވެ.
