ޤަތަރުގެ އިޤްތިޞާދު ފުނޑާލައި، މާލީ ނިޒާމަށް ހަމަލާ ދިނުމަށް ޔޫއޭއީން ރޭވި ކަމަށް ބުނާ ލިޔެކިޔުންތަކެއް އެމެރިކާގެ ވެބްސައިޓަކުން އާއްމު ކޮށްފިއެވެ.
ދަ އިންޓަސެޕްޓުން އާއްމުކޮށްފައިވާ ލިޔެކިޔުންތަކަކީ ޔޫއޭއީ އިން އެމެރިކާއަށް ކަނޑައަޅުއްވާފައިވާ ސަފީރު ޔޫސުފް އަލް އުތައިބާގެ އީމެއިލްތަކުގެ ލީކްވި ޑޮކިއުމަންޓްތަކެކެވެ. މި ޑޮކިއުމަންޓްތަކުން ހާމަވާ ގޮތުގައި ޔޫއޭއީއަށް މި ޕްލޭން ތައްޔާރު ކޮށްދިނީ ލަގްޒަމްބަރގްގެ ބޭންކް ހާވިލަންޑްއިންނެވެ. މި ބޭންކަކީ އިނގިރޭސިވިލާތުގެ މަޝްހޫރު ބޭންކަރ ޑޭވިޑް ރޯލްނަޑްގެ އާއިލީ ބޭންކެކެވެ.
މި ޕްލޭން ބުނާ ގޮތުން ޤަތަރުގެ އިޤްތިޞާދު 'ފުނޑާލުމަށް' ޔޫއޭއީއިން ބޭނުންކުރާނީ ބޮންޑާއި އެހެނިހެން ބައެއް ފައިނޭންޝަލް އިންސްޓްރޫމަންޓްތަކެވެ. އަދި ޤަތަރުގެ ޔީލްޑް ކަރވްގެ މައްޗަށް ބާރުފޯރުވައިގެން ޤަތަރުގެ ދަރަނި ބޮޑުކުރުމަށް ވެސް ރާވާފައިވެއެވެ. އާއްމު ޔީލްޑް ކަރވެއްގައި މެޗުއަރިޓީ މުއްދަތު ދިގު ބޮންޑްތަކުގެ ޔީލްޑް މަތިވެއެވެ. މި ޕްލޭންގައިވާ ގޮތުން ޤަތަރުގެ އިޤްތިޞާދު ފުނޑާލަން ބޮންޑްގެ އަގު ދަށްކޮށް، ދަރަނި މަތިކުރާނެއެވެ. އަދި ފައިސާގެ ތާށިކަން ކުރިމަތިވެ، ޤަތަރުގެ ޚަޒާނާއަށް އެކަމުގެ އަސަރުކުރާނެ ގޮތަށް މި ޕްލޭން ފަރުމާކޮށްފައިވެއެވެ. އަދި އިޤްތިޞާދީ ގޮތުން ޤަތަރަށް ދިމާވާ މައްސަލަތައް ބައިނަލްއަޤްވާމީ ސަމާލުކަމަށް ގެނެސް، އެކަމުގެ ނާޖާއިޒް ފައިދާ ނަގައި، ޕީއާރް ކެމްޕޭނެއްގެ އެހީގައި 2022ވަނަ އަހަރު ޤަތަރުގައި ބާއްވަން ކަނޑައަޅާފައިވާ ފީފާ ވޯލްޑްކަޕް ޔޫއޭއީގައި ބާއްވާ ގޮތަށް ބަދަލުކުރަން ވެސް ރާވާފައިވެއެވެ.
މިފަދަ ޕްލޭނެއް ހަދާފައިވާކަން ހާމަވެފައިވީ ނަމަވެސް، އެޕްލޭނަށް އަމަލުކުރިކަން ނުވަތަ ނޫންކަން ކަށަވަރުވެފައެއް ނުވެއެވެ. އަދި ޕްލޭން މިހާރު އާއްމުވެފައި ވާތީ ދެން އެޕްލޭނަށް އަމަލުކުރި ނަމަވެސް އެކަމުގެ ފައިދާއެއް ނުކުރާނެ ކަމަށް ތަޖުރިބާކާރުން ބުނެއެވެ. ޤަތަރާއި ޔުއޭއީއަކީ ގަލްފްގެ ބާރުގަދަ ދެޤައުމަށްވެފައި، ދެޤައުމަކީވެސް މެދުއިރުމަތީގެ ވިޔަފާރީގެ މައި މަރުކަޒުތަކެކެވެ. އެހެން ނަމަވެސް ޤަތަރަކީ ދުނިޔޭގެ އެންމެ މުއްސަނދި ޤައުމަށްވެފައި، ޔޫއޭއީއަށް ވުރެ ވަރުގަދަ ރިޒަރވެއް އޮތުމުން ބޭންކް ހާވިލަންޑް އިން ތައްޔާރުކުރި ޕްލޭން މަސައްކަތްކޮށްފާނެކަމާއި މެދު ސުވާލު އުފެދޭކަމަށް ވެސް ބައެއް ފަރާތްތަކުން ބުނެއެވެ.
ޔޫއޭއީ އިން މިހާރު ވެސް ސަޢޫދީއާއި ގުޅިގެން ޤަތަރާއި ގުޅުން ކަނޑާލާފައިވާއިރު، ޤަތަރާއި ޔޫއޭއީ އާއި ގުޅޭ ސަރަހައްދީ ރޮނގު ބަންދުކޮށް، އެޤައުމު އެކަހެރި ކުރުމަށް ކުރަމުންދާ މަސައްކަތުގައި ސަޢޫދީއަށް އެންމެ ވާގިވެރިވަނީ ޔޫއޭއީއިންނެވެ.
ޤަތަރުގެ އިޤްތިޞާދު ފުނޑާލާނެ ގޮތުގެ ޕްލޭން ޔޫއޭއީއަށް ތައްޔާރުކޮށްދިން ބޭންކް ހާވިލަންޑްގައި މަސްލަހަތު އޮންނަ ޑޭވިޑް ރޯލަންޑް އަކީ ޔޫއޭއީގެގެ އަބޫދާބީގެ ޝާހީ އާއިލާއާއި ގާތް ގުޅުމެއް އޮންނަ މީހެކެވެ. ޚާއްސަކޮށް އަބޫދާބީގެ ވަލީޢަޙުދު ޝައިޚް މުހައްމަދު ބިން ޒައިދް އަލް ނަހްޔާނާއި އޮންނަ ގުޅުން ރޯލަންޑް ވަރުގަދަކޮށްފައިވާއިރު، ޔޫއޭއީގެ ސޮވަރިން ފަންޑްކަމަށްވާ މުބާދަލާ އާއި ގުޅިގެން މާލީ އިދާރާއެއް ޤާއިމްކުރުމަށް އޭނާ އަންނަނީ މަސައްކަތް ކުރަމުންނެވެ.
