ޤަތަރުގެ ސަރުކަރުގެ ސޯޝަލް މީޑިއާއާއި ޚަބަރު ސައިޓްތައް ހެކް ކޮށް ގަތަރުގެ އަމީރާ ބެހޭގޮތުން ދޮގު މައުލޫމާތުތައް ޕޯސްޓްކޮށް ގަލްފްގެ ހަމަނުޖެހުންތަކެއް އުފައްދަން ޔުނައިޓެޑް އަރަބް އެމިރޭޓްސްއިން މެއި މަހުގެ ފަހުކޮޅު މަސައްކަތް ކުރިކަމަށް އެމެރިކާގެ އިންޓެލިޖެންސް އޮފިޝަލުންނާ ހަވާލާދީ ވޮޝިންގޓަން ޕޯސްޓުން އާދީއްތަ ދުވަހު ރިޕޯޓްކޮށްފިއެވެ.

ވޮޝިންޓަން ޕޯސްޓްގައި ރިޕޯޓްކޮށްފައިވާ ގޮތުގައި ޤަތަރުގެ އަމީރު ޝެއިޚް ތަމީމް ބިން ހަމަދު އަލް ޘާނީ ވިދާޅުވިކަމަށް ބުނެ ދޮގު ޚަބަރެއް މެއި މަހު ޕޯސްޓްކޮށްފައިވެއެވެ. އެ ހަބަރުގައިވަނީ ޤަތަރުގެ އަމީރު, ހަމާސްއަށް ތައުރީފް ކުރައްވައި އިރާނަކީ "އިސްލާމީ ބާރެއް"ކަމަށް ވިދާޅުވި ކަމަށެވެ.

އޭގެ ރައްދެއްގެ ގޮތުން ސައުދީ އަރަބިއްޔާ ޔުނައިޓެޑް އަރަބް އެމިރޭޓްސް އަދި ބަހްރެއިނުންވަނީ ޤަތަރުން ޓެރެރިޒަމަށް ވާގިވެރިވާކަމަށް ތުހުމަތުކޮށް ޖޫން މަހުގެ 5 ވަނަ ދުވަހު އެ ގައުމާ އޮންނަ ޚާރިޖީ ގުޅުން އަދި އަދި ދަތުރުފަތުގެ ގުޅުންތައް ކަނޑާލާފައެވެ. ގަތަރުގެ މައްޗަށް ކުރާ ތުހުމަތު އެ ގައުމުން ދޮގުކުރެއެވެ.

ޤަތަރުގެ އަމީރާ ހަވާލާދީ ހެކަރުން ދޮގު މައުލޫމާތު ފަތުރާފައިވާކަމަށް ޤަތަރުންވަނީ ބުނެފައެވެ. ޤަތަރުން އެހެން ބުނި ނަމަވެސް އެކަން ގަބޫލުކުރަން ގަލްފްގެ ގައުމުތަކުންވަނީ ދެކޮޅު ހަދާފައެވެ.

ވޮޝިންގަން ޕޯސްޓުން ބުނެފައިވަނީ އެމެރިކާގެ އިންޓެލިޖެންސް އޮފިޝަލުން ލިބިފައިވާ އާ މައުލޫމާތުތަކެއް މިދިއަ ހަފްތާގައ ދިރާސާކޮށްފައިވާއިރު އޭގެން ދައްކާގޮތުން ޔުނައިޓެޑް އަރަބް އެމިރޭޓްސްގެ ސަރުކާރުގެ އޮފިޝަލުންވަނީ ހެކް ކުރުމާބެހޭގޮތުން މެއިމަހުގެ 23 ވަނަ ދުވަހު މަޝްވަރާ ކުރައްވާފައެވެ. އެއީ އެ ހާދިސާ ހިނގުމުގެ އެއް ދުވަސް ކުރިއެވެ.

ނަމަވެސް އެކަން ކުރީ ޔޫއޭއީގެ އޮފިޝަލުންތޯ ނުވަތަ އެކަން ކުރީ ބަޔަކަށް ފައިސާ ދީގެންތޯ ސާފު ނުވާކަމަށް ވޮޝިންގޓަން ޕޯސްޓްގައިވަނީ ބުނެފައެވެ.

ވޮޝިންގޓަން ޕޯސްޓަށް މައުލޫމާތު ދެއްވި އިންޓެލިޖެންސް އޮފިޝަލްގެ މައުލޫމާތު އެ ނޫހުން ހާމަކޮށްފައެއް ނުވެއެވެ.