ބެލުންތެރިންގެ މެދުގައި މަގުބޫލު ފިލްމް ފްރެންޗައިޒް، ސްޓަރވޯޒް އޮރިޖިނަލް ޓްރިލޮޖީގެ ޑާތް ވޭޑަރ ރޯލު ކުޅުނު ޑޭވް ޕްރައުސް (85) މަރުވެއްޖެއެވެ.

އިނގިރޭސިވިލާތަށް ނިސްބަތްވާ ޑޭވް ޕްރައުސް މަރުވިކަން ހާމަކޮށް، ބައުވިންގޓަން މެނޭޖްމެންޓުން ޓުވީޓު ކުރީ އާދީއްތަ ދުވަހުއެވެ.

އިނގިރޭސިވިލާތުގެ ބްރިސްޓޮލްއަށް އުފަން ޕްރައުސް އަކީ ބޮޑީ ބިލްޑަރެކެވެ. އޭނާ ވަނީ ހެވީ ލިފްޓިންގް މުބާރާތްތަކުގައި 1962 އަހަރުން ގެށިގެން ބައިވެރިވެ، ޖެހި ޖެހިގެން ތިން އަހަރު އެ މުބާރާތްތައް ކާމިޔާބުކޮށްފައެވެ.

ޕްރައުސް ފިލްމު އިންޑަސްޓްރީގައި މަޝްހޫރުވެފައިވަނީ އޭނާގެ ދިގު އިސްކޮޅުގެ ސަބަބުންނެވެ. 6 ފޫޓު 7 އިންޗުގެ ޕްރައުސް އެންމެ ފުރަތަމަ ފެނިގެންދިޔައީ 1971 ވަނަ އަހަރު އުފެއްދި 'އަ ކްލޮކްވަރކް އޮރެންޖް' ފިލްމުގެ ތަރި، ފްރޭންކް އެލޭންސޭޑަރގެ ބޮޑީގާޑުގެ ރޯލުންނެވެ. ސްޓަރވޯޒް 'ގެ ޑިރެކްޓަރ ޖޯޖް ލޫކަސްގެ ސަމާލުކަން އޭނާއަށް ލިބުނީ އެ ފިލްމުގެ ސަބަބުންނެވެ. އެއާއި އެކު ސްޓަރވޯޒްގެ ޑާތް ވޭޑަރ އާއި ޗުބާކާގެ ރޯލަށް އޮޑިޝަން ކުރުމަށް ޕްރައުސްއަށް އޮފަރ ލިބިގެންދިޔައެވެ.