އދ ގެ ރެފިއުޖީންގެ ހައި ކޮމިޝަނަރަކަށް އިރާގުގެ ކުރީގެ ރައީސް ސާލިހް

އދ ގެ ރެފިއުޖީންގެ ކަންތައްތަކާ ބެހޭ އިދާރާގެ ހައި ކޮމިޝަނަރަކަށް އިރާގުގެ ކުރީގެ ރައީސް ބާހަމް ސާލިހް އައްޔަން ކުރައްވައިފި އެވެ. 

އެ މަގާމަށް ސާލިހް އައްޔަން ކުރައްވާފައި ވަނީ ހުކުރު ދުވަހު އެވެ. އެއާއެކު، އދ އަށް އެހީތެރިކަން ދެމުން އަންނަ ބޮޑެތި ޤައުމު ތަކުން ލީޑަރުން އައްޔަން ކުރުމުގެ އާންމު ގޮތެއްގައި އަމަލު ކުރަމުން އަންނަ އުސޫލު ނުވަތަ ޤަވާއިދަށް ވެސް ވަނީ ބަދަލު އައިސްފަ އެވެ. 

އދ ގެ ސެކްރެޓަރީ ޖެނަރަލް އެންޓޯނިއޯ ގުޓަރޭސް ސޮއި ކުރައްވައި، ޑިސެމްބަރު މަހުގެ 11 ވަނަ ދުވަހު ފޮނުއްވި ސިޓީގައި ވިދާޅުވެފައި ވަނީ، އެ މަގާމަށް ސާލިހް އައްޔަން ކުރައްވާފައި ވަނީ ފަސް އަހަރު ދުވަހުގެ މުއްދަތަކަށް ކަމަށެވެ. އަދި އޭނާ މަގާމާ ހަވާލުވެ ވަޑައިގެން، ރަސްމީކޮށް މަސައްކަތް ފައްޓަވާނީ އަންނަ ޖަނަވަރީ މަހުގެ އެއް ވަނަ ދުވަހު ކަމަށް ވެސް ވިދާޅުވެފައިވ އެވެ. 

އެ މަގާމށް ސާލިހް އައްޔަން ކުރައްވާފައި ވަނީ، މީގެ ކުރިން އެ މަގާމުގައި ހުންނެވި އިޓަލީގެ ފިލިޕޯ ގްރޭންޑީގެ ބަދަލުގަ އެވެ. އދ ގެ ތަޖުރިބާކާރު އޮފިޝަލެއް ކަމަށް ގްރޭންޑީ އެ މަގާމުގައި ހުންނަވަނީ 2016 ވަނަ އަހަރުން ފެށިގެންނެވެ. އެ މަގާމަށް ސާލިހް އައްޔަން ކުރައްވާފައިވާއިރު، އެކަން ދާއިމީ ގޮތެއްގައި ހަމަޖެހޭނީ އދ ގެ ރެފިއުޖީންގެ ހައި ކޮމިޝަނަރުގެ ހިންގާ ކޮމެޓީ އިން ފާސް ކުރުމަށް ފަހު އެވެ. 

އިނގިރޭސިވިލާތުގައި ތައުލީމު ހާސިލު ކުރައްވައި، އިންޖިނިއަރިންގެ ދާއިރާ އިން ތައުލީމު ހާސިލު ކުރައްވާފައިވާ ސާލިހް އަކީ އިރާގުގެ ކުރުދީ ސަރަހައްދަށް ނިސްބަތްވެ ވަޑައިގަންނަވާ ބޭފުޅެކެވެ. އދ ގެ ރެފިއުޖީންނާ ބެހޭ ހައި ކޮމިޝަނަރުގެ މަގާމަށް އޭނާ އައްޔަން ކުރައްވާފައިވާއިރު، އެ މަގާމުގައި އޭނާ އަށް އެތައް ގޮންޖެހުން ތަކެއް ކުރިމަތިވާނެ އެވެ. އެގޮތުން މިހާރު ދުނިޔެގައި ގެދޮރުން މަހުރޫމު ވެފައިވާ މީހުންގެ އަދަދު ރެކޯޑު މިންވަރަކަށް އަރާފައިވާއިރު، ގްރޭންޑީ މަސައްކަތް ފެއްޓެވި ދުވަސްވަރާ އަޅާ ބަލާއިރު މިހާރު އެ އަދަދު ދެ ގުނަ އަށް އަރާފައިވެ އެވެ. 

މީގެ އިތުރުން، މިއަހަރުގެ އދ ގެ ފަންޑިން ވެސް ދަށަށް ގޮސްފައިވާކަން ފާހަގަ ކުރެވެ އެވެ. އެމެރިކާ ފަދަ މުހިންމު ޤައުމު ތަކުން ދެމުން އަައި ފައިސާ މަދު ކުރުމާއި، އިތުރު ބައެއް ދފާއީ ކަންތައްތަކަށް ފައިސާ ބަދަލު ކުރުމުގެ ސަބަބުން މި ދަތިކަން ވަނީ ދިމާވެފަ އެވެ. 

އދ ގެ ރެފިއުޖީންނާ ބެހޭ ހައި ކޮމިޝަނަރުގެ މަގާމަށް ވާދަ ކުރެއްވި ބޭފުޅުންގެ ތެރޭގައި 12 ބޭފުޅުން ހިމެނެ އެވެ. އޭގެ ތެރޭގައި ސިޔާސީ ބޭފުޅުންނާއި، އައިކީއާގެ އެގްޒެކްޓިވް އަކާއި، އީއާރު ޑޮކްޓަރަކާއި އަދި ޓީވީ ޕްރެޒެންޓަރެއް ވެސް ހިމެނެ އެވެ. މި ބޭފުޅުންގެ ތެރެއިން ދެ ބައި ކުޅަ އެއް ބައި ނިސްބަތް ވަނީ ޔޫރަޕަށެވެ.