އެމެރިކާގެ ބްރައުން ޔުނިވާސިޓީގައި ދިން ހަމަލާގައި ދެ ދަރިވަރުން މަރުވެއްޖެ، ޤާތިލު ހޯދުމުގެ މަސައްކަތް ކުރިއަށް

އެމެރިކާގެ ރޯޑް އައިލެންޑުގެ ޕްރޮވިޑެންސްގައި ހުންނަ ބްރައުން ޔުނިވާސިޓީގައި ދިން ހަމަލާއެއްގައި ދެ ދަރިވަރަކު މަރުވެފައިވާއިރު، ހަމަލާ ދިން މީހާ ހޯދުމުގެ މަސައްކަތް ކުރަމުންދާ ކަމަށް އޮފިޝަލުން ބުނެފި އެވެ. 

ހޮނިހިރު ދުވަހުގެ މެންދުރު ފަހުގެ ވަގުތެއްގައި ހަމަލާ ދިންއިރު، މިހާރު އެ ޔުނިވާސިޓީ ވަނީ އެއްކޮށް ލޮކްޑައުން ކޮށްފަ އެވެ. އޭނާ ހޯދުމުގެ މަސައްކަތް ކަމާ ގުޅުން ހުރި އިދާރާ ތަކުން ފުޅާ ދާއިރާއެއްގައި ކުރަމުން އަންނައިރު، މިހާތަނަށް އޭނާ ފެނިފައި ނުވެ އެވެ.

އެމެރިކާގެ އެންމެ ފުރަތަމަ އަދި އެންމެ ޤަދަރުވެރި ޔުނިވާސިޓީ ތަކުގެ ތެރޭގައި ވެސް ހިމެނޭ ބްރައުން ޔުނިވާސިޓީގައި އަދިވެސް ބައެއް ދަރިވަރުން ތިބިއިރު، އެ ދަރިވަރުންނަށް ވެސް އަންގާފައި ވަނީ ރައްކާތެރި ސަރަހައްދު ތަކުގައި ތިބުމަށެވެ. އެ ސަރަހައްދުން މީހުން ހުސް ކުރުމުގެ މަސައްކަތް ފަށާނީ، ސަލާމަތީ ކަންކަން މުޅިން ފުރިހަމަ ވުމުން ކަމަށް ފުލުހުން ވަނީ ބުނެފަ އެވެ. 

ރޯޑް އައިލެންޑް ހޮސްޕިޓަލުގެ އޮފިޝަލުން ބުނެފައި ވަނީ، އަނިޔާވި ގިނަ މީހުންގެ ޙާލު ސީރިއަސް ކަމަށެވެ. ނަމަވެސް، ބައެއް މީހުންގެ ޙާލު މަޑު މަޑުން ރަނގަޅު ވަމުން އަންނަ ކަމަށް ހާމަ ކޮށްފައިވެ އެވެ. މި ހާދިސާގައި މަރުވި ދަރިވަރުން އަދި އަނިޔާވި މީހުންގެ ނައްތައް ވެސް މިހާތަނަށް ހާމަ ކޮށްފައި ނުވެ އެވެ. 

ބްރައުން ޔުނިވާސިޓީގެ ރައީސް ކްރިސްޓީނާ ޕެކްސަން ނެރުއްވި ބަޔާނެއްގައި ވިދާޅުވީ، މިއީ މިހާތަނަށް އެ ސަރަހައްދުގެ ރައްޔިތުން ތަހަންމަލު ކޮށްފައި ނުވާ ފަދަ ހާދިސާއެއް ކަމަށެވެ. ޚާއްސަކޮށް މިއީ އެ ސަރަހައްދުގެ ރައްޔިތުން އަދި ޔުނިވާސިޓީ އަށް ވެސް ހިތާމަވެރި ދުވަހެއް ކަމަށް އެ ބަޔާނުގައި ވަނީ ފާހަގަ ކުރައްވައިފަ އެވެ. 

އެކަމާ ގުޅޭ ގޮތުން ފުލުހުން ބުނެފައި ވަނީ އެ ހަމަލާ ދީފައިވާ ފިރިހެެން މީހާގެ މައުލޫމާތު މިހާތަނަށް ލިބިފައި ނުވާ ކަމަށާއި، އޭނާއާ ގުޅޭ ގޮތުން އެއްކުރެވިފައި ވަނީ މަދު މައުލޫމާތެއް ކަމަށެވެ. އޭނާގެ ނަމާއި އިތުރު ތަފްސީލު ވެސް މިވަގުތު ހާމަ ކުރެވެން ނެތް ކަމަށް ފުލުހުން ވަނީ ބުނެފަ އެވެ. މިވަގުތަށް ބަލާއިރު، އޭނާ އަކީ އެ ޔުނިވާސިޓީއާ ގުޅުން ހުރި މީހެއް ކަމެއް ނުވަތަ ނޫން ކަމެއް ވެސް ނޭނގެ އެވެ. 

ހަމަލާގެ ފަހުން ވަނީ ސީސީޓީވީ ފުޓޭޖެއް ވެސް އާންމު ކޮށްފަ އެވެ. އެ ވީޑިއޯގައި އޭނާ ހިނގާފައި ދާ މަންޒަރު ފެނުނު ނަމަވެސް، އޭނާގެ މޫނު ފެނިފައި ނުވެ އެވެ. ހަމަލާ ދިން މީހާ ހުރި ކަޅު ކުލައިގެ ހެދުމެއްގައި ކަމަށް ފާހަގަ ކުރެވޭއިރު، އޭނާ ހުރި ކަމަށް ބެލެވެނީ މޫނު ނިވާ ކުރުމަށް މާސްކެއް އަޅައިގެން ކަމަށް ފުލުހުންނާ ހަވާލާދީ ބުނެފައިވެ އެވެ. އެ ހަމަލާ ދިނުމަށް އޭނާ ބޭނުން ކުރި ހަތިޔާރެއް އަދި އެ ހަތިިޔާރުގެ ބާވަތެއް ވެސް ހޯދިފައި ނުވާ ކަމަށް ވަނީ ބުނެފަ އެވެ. 

މީޑިއާ ތަކުގައި ބުނެފައިވާ ގޮތުން ހަމަލާ ދީފައި ވަނީ ބްރައުން ޔުނިވާސިޓީގެ އިންޖިނިއަރިން ސްކޫލުގެ ބާރްސް އެންޑް ހޮލީ އިމާރާތަށް އަމާޒުކޮށެވެ. ހަމަލާ ދީފައި ވަނީ އެ އިމާރާތުގެ ފުރަތަމަ ފަންގިފިލާގައި ހުރި ބޮޑު ކުލާސް ރޫމަކަށް އަމާޒުކޮށް ކަމަށް ވެސް ބުނެފައިވެ އެވެ.