މި މައްސަލައިގައި ރޮބިންސަންގެ މައްޗަށް ހަތް ދައުވާއެއް ވަނީ އުފުލާފައި. އޭގެ ތެރޭގައި ގަސްދުގައި މީހަކު މަރާލުމުގެ ކުށުގެ ދައުވާ އާއި، ހެކި ނައްތާލުމުގެ ކުށުގެ ދައުވާ އާއި، އޭނާގެ ރޫމް މޭޓަށް ކުށުގެ މެސެޖުތައް ޑިލީޓު ކުރުމަށް އެންގި މައްސަލައިގެ ދައުވާ ވެސް ހިމެނޭ.
ޝަރީއަތުގެ މަޖިލީހުގައި ރޮބިންސަން އާއި އޭނާގެ ޤާނޫނީ ވަކީލުން
ކޮންޒަވޭޓިކް ޙަރަކާތްތެރިޔާ ޗާލީ ކާކް މަރާލި ކަމަށް ތުހުމަތު ކުރެވޭ ޓައިލާ ރޮބިންސަން، އެ މައްސަލައިގައި ފުރަތަމަ ފަހަރަށް ކޯޓަށް ޙާޒިރު ކޮށްފި އެވެ.
ޔޫޓާގެ ޕްރޮވޯގައި ހުންނަ ކޯޓަށް ރޮބިންސަން ޙާޒިރު ކޮށްފައި ވަނީ އޭނާ ގެ އަތުގައި ބިޑި އަޅުވައިގެންނެވެ. ގަމީހަކާއި ޓައީއެއް އަޅައިގެން ރޮބިންސަން ހުރިއިރު، ޝަރީއަތުގައި އޭނާ ވަކީލުންނާ ވާހަކަ ދައްކާފައި ވަނީ ވެސް ހިނިތުންވުމާ އެކު އެވެ. އެ ޝަރީއަތުގެ މަޖިލީހަށް ރޮބިންސަންގެ މަންމަ އާއި ބައްޕަގެ އިތުރުން، އޭނާ ގެ ބޭބެ ވެސް ޙާޒިރު ވެފައިވާ ކަމަށް އޭނާ ގެ ޤާނޫނީ ވަކީލު ރިޗާޑް ނޮވަކް ވިދާޅުވެފައިވެ އެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ވަރަށް ބޮޑު ސަޕޯޓާރެއް ކަމަށްވާ ޗާލީ ކާކް މަރާލީ މިއަހަރުގެ ސެޕްޓެމްބަރު މަހުގެ 10 ވަނަ ދުވަހު އެވެ. އޭނާ ގަޔަށް ބަޑި ޖަހައި މަރާލި ކަމަށް ތުހުމަތު ކުރެވެނީ އުމުރުން 22 އަހަރުގެ ރޮބިންސަންގެ މައްޗަށެވެ. ޗާލީ ކާކް މަރާލި ދުވަހު ފުލުހުން ވަނީ ރޮބިންސަން ހައްޔަރު ވެސް ކޮށްފަ އެވެ.
އެމެރިކާގެ ޑިސްޓްރިކްޓް ކޯޓުގެ ފަނޑިޔާރު ޓޯނީ ގްރާފް ވަނީ ރޮބިންސަންގެ ފަރާތުން ވާހަކަ ދެއްކުމުގެ ފުރުސަތު ދީފަ އެވެ. އެއާއެކު، އޭނާ ގެ ފަރާތުން ވާހަކަ ދައްކަވާފައި ވަނީ އޭނާ ގެ ޤާނޫނީ ވަކީލުންނެވެ. ރޮބިންސަންގެ ޤާނޫނީ ވަކީލުން އެދުނީ އެ މައްސަލައިގެ ޝަރީއަތުގެ އަޑު އެހުމަށް ކެމެރޭ ވެއްދުން މަނާ ކޮށްދިނުމަށެވެ. އެގޮތުން އޭނާ ގެ ޤާނޫނީ ވަކީލު ސްޓޭސީ ވިސާ ވިދާޅުވީ، މީޑިއާ ތަކުގެ ނުރަނގަޅު އަސަރު ކޯޓުގެ ތެރޭގައި ބޭނުން ނުވާ ކަމަށެވެ.
އެއާއެކު ފަނޑިޔާރު ގްރާފް ވިދާޅުވީ މި ހިނގާ ޑިސެމްބަރު މަހުގެ 29 ވަނަ ދުވަހު މީޑިއާ ތަކަށް ފުރުސަތު ދިނުމާ ގުޅޭ ގޮތުން ގޮތެއް ނިންމަވާނެ ކަމަށެވެ. އަދި އަންނަ އަހަރުގެ މެއި މަހުގެ 18 ވަނަ ދުވަހުން، 21 ވަނަ ދުވަހާ ދޭތެރޭގައި އަޑު އެހުމެއް ބާއްވާނެ ކަމަށް ވެސް ފަނޑިޔާރު ވަނީ ވިދާޅުވެފަ އެވެ.
ދައުލަތުގެ ޕްރޮސެކިއުޓަރުންގެ އެދުމުގެ މަތިން ފަނޑިޔާރު ގްރާފް ވަނީ، ޗާލީ ކާކްގެ އަނބިކަނބަލުން އެރިކާ ކާކް އެ މައްސަލައިގައި ދައުވާ ހުށަހަޅާ ފަރާތް ތަމްސީލު ކުރާނެ ފަރާތެއްގެ ގޮތުގައި ކަނޑައަޅުއްވައިފަ އެވެ.
މި މައްސަލައިގައި ރޮބިންސަންގެ މައްޗަށް ހަތް ދައުވާއެއް ވަނީ އުފުލައިފަ އެވެ. އޭގެ ތެރޭގައި ގަސްދުގައި މީހަކު މަރާލުމުގެ ކުށުގެ ދައުވާ އާއި، ހެކި ނައްތާލުމުގެ ކުށުގެ ދައުވާ އާއި، އޭނާ ގެ ރޫމް މޭޓަށް ކުށުގެ މެސެޖުތައް ޑިލީޓު ކުރުމަށް އެންގި މައްސަލައިގެ ދައުވާ ވެސް ހިމެނެ އެވެ. މި މައްސަލައިގައި ދައުލަތުގެ ވަކީލުން ވިދާޅުވެފައި ވަނީ، ރޮބިންސަންގެ މައްޗަށް މަރުގެ ޙުކުމެއް އިއްވައި ދިނުމަށް އެދޭނެ ކަމަށެވެ.
