ސީރިއާ ގައި އެމެރިކާގެ ދެ ސިފައިންގެ މީހުންގެ ގަޔަށް ބަޑިޖަހާ މަރާލުމުގެ ބަދަލު ވަރަށް ސީރިއަސް ކޮށް ހިފާނެ ކަމަށް އެމެރިކާގެ ރައީސް ވިދާޅުވެއްޖެ

ހޮނިހިރު ދުވަހު މެދުތެރޭ ސީރިއާ ގައި އެމެރިކާގެ ދެ ސިފައިންނާއި ތަރުޖަމާނެއްގެ ގަޔަށް ބަޑިޖަހާ މަރާލުމާ ގުޅިގެން އެކަމުގެ ބަދަލު ވަރަށް ސީރިއަސް ކޮށް ހިފާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެމެރިކާ ސިފައިންގެ ގަޔަށް ބަޑި ޖެހީ އައިސިސްގެ މެމްބަރެއް ކަމަށް ބުނާ މީހެކެވެ. އޭނާ ބަޑި ޖެހީ އެމެރިކާ-ސީރިއާ ގުޅިގެން ހިންގަމުން ދިޔަ ހަރަކާތެއްގެ ތެރެއިންނެވެ.

އެމެރިކާގެ ސިފައިން މަރުވި މައްސަލައިގައި ރައީސް ޓްރަމްޕް ވަނީ  އޭނާގެ ޓްރުތު ސޯޝަލް ޕްލެޓްފޯމްގައި ހިތާމަފާޅު ކުރައްވާފަ އެވެ.

ޕެންޓަގަންގެ ތަރުޖަމާން ޝޯން ޕާނެލް ހާމަ ކުރި ގޮތުގައި ހާދިސާ ހިނގީ ޔުނެސްކޯގެ ލިސްޓުގައި ހިމެނޭ ޤަދީމީ، އާސާރީ ޝަހަރެއް ކަމަށްވާ ޕަލްމީރާ ގައެވެ. އެ ސަރަހައްދަކީ، އައިސިސް ގްރޫޕުން ސީރިއާގައި އެމީހުންގެ ބާރު އެންމެ ފުޅާ ކުރި ދުވަސްވަރު އެ ގްރޫޕުން ކޮންޓްރޯލް ކުރި ތަނެކެވެ.

މި ހަމަލާ އަކީ "އައިސިސްގެ މީހަކު އެކަނި އަމިއްލަ އަށް ދިން ހަމަލާއެއް" ކަމަށާއި، އޭނާ އަށް "ހަމަލާދީ މަރާލާފައިވާ" ކަމަށް އެމެރިކާ ސެންޓްރަލް ކޮމާންޑުން އެކްސްގައި ބުންޏެވެ.

ހަމަލާ ގައި އެމެރިކާގެ އިތުރު ތިން ސިފައިން ޒަޚަމްވި އެވެ. އެހެން ނަމަވެސް އެމީހުންގެ ހާލު ރަނގަޅުވަމުން އަންނަ ކަމަށް ރިޕޯޓުތައް ބުނެއެވެ.

ޓްރަމްޕް ވިދާޅުވީ މިއީ "އެމެރިކާއަށާއި ސީރިއާ އަށް އައިސިސް އިން ދިން ހަމަލާ އެއް،" ކަމަށެވެ. 

މި ހާދިސާ އަކީ ފާއިތުވި އަހަރުގެ ޑިސެމްބަރު މަހު ސީރިއާގައި ދިގު މުއްދަތަކަށް ވެރިކަން ކުރި ބަޝާރު އަލް-އަސަދު އިދިކޮޅު ބާރުތަކުން ވެރިކަމުން ވައްޓާލުމަށްފަހު، އަދި އެ ގައުމުން އެމެރިކާ އާ ގުޅުން އަލުން ފެށުމަށްފަހު ރިޕޯޓް ކުރެވުނު މި ބާވަތުގެ ފުރަތަމަ ހާދިސާއެވެ.

ޓްރަމްޕް ވިދާޅުވީ ފާއިތުވި މަހު ވައިޓް ހައުސް އަށް ޒިޔާރަތް ކުރެއްވި ސީރިއާގެ އާ ރައީސް އަހްމަދު އަލް-ޝަރާ "މި ހަމަލާއިން ވަރަށް ބޮޑަށް ކޯފާވެ ކަންބޮޑުވެވަޑައިގެންފައިވާ" ކަމަށެވެ.

ސީރިއާގެ ޚާރިޖީ ވަޒީރު އަސާދު އަލް-ޝައިބާނީ އެކްސްގައި ޕޯސްޓް ކުރައްވައި ވިދާޅުވީ މި ޓެރަރިސްޓް ހަމަލާ ވަރަށް ހަރުކަށިކޮށް ކުށްވެރިކުރައްވާ ކަމަށެވެ.

ނަން ހާމަކުރަން ބޭނުންނުވާ ސީރިއާ ސިފައިންގެ އޮފިޝަލަކު ބުނީ ހަމަލާދިނީ "ޕަލްމީރާ ގައި ހުންނަ އަސްކަރީ ބޭސްއެއްގައި ސީރިއާ އަދި އެމެރިކާ އޮފިސަރުންގެ ބައްދަލުވުމެއް ކުރިއަށްދަނިކޮށް،" ކަމަށެވެ.

ނަން ހާމަކުރަން ބޭނުންނުވާ އޮފިޝަލަކު އަލް އަރަބިއްޔާ އަށް މައުލޫމާތު ދެމުން ބުނީ ބަޑީގެ އަޑު އިވުނީ އެ ބޭސް ގެ ތެރެއިން ކަމަށެވެ.

ނަމަވެސް، ޕެންޓަގަން އޮފިޝަލަކު އޭއެފްޕީ އަށް ބުނީ މި ހަމަލާ "ދިނީ ސީރިއާ ގެ ރައީސް ގެ ކޮންޓްރޯލް ނެތް ސަރަހައްދެއް ގައި" ކަމަށެވެ.

ތިން އޮފިޝަލުން ރޮއިޓާސް އަށް މައުލޫމާތު ދެމުން ބުނީ ހަމަލާދިން މީހަކީ ސީރިއާ ގެ ސެކިއުރިޓީ ފޯސް ގެ މެމްބަރެއް ކަމަށެވެ. ސީރިއާ އިންޓީރިއާ މިނިސްޓްރީގެ ތަރުޖަމާނު ސަރުކާރުން ހިންގާ ޓީވީ ޗެނަލަކަށް ބުނީ އެ މީހާއަކީ ސެކިއުރިޓީ ފޯސްތަކުގައި ލީޑަރޝިޕް ރޯލެއް އޮންނަ މީހެއް ނޫން ކަމަށެވެ.