ޑިސެމްބަރު 2 ވަނަ ދުވަހު ލޮކްޑައުން އުވާލާނެ ކަމަށް އިނގިރޭސިވިލާތުގެ ބޮޑުވަޒީރު ވިދާޅުވެއްޖެ
ލޮކްޑައުން އުވާލުމަށްފަހު ސަރުކާރުން ދެން ފިޔަވަޅުތައް އަޅަމުން ގެންދާނީ ސަރަހައްދުތަކަށް ވަކިވަކިން
އިނގިރޭސިވިލާތުގެ ބޮޑުވަޒީރު ބޮރިސް ޖޯންސަންސް
ކޮވިޑް-19 ގެ ސަބަބުން އިނގިރޭސިވިލާތުގައި އިއުލާނުކޮށްފައިވާ ލޮކްޑައުން ޑިސެމްބަރު މަހުގެ ދެ ވަނަ ދުވަހު އުވާލާނެ ކަމަށް އެގައުމުގެ ބޮޑުވަޒީރު ބޮރިސް ޖޯންސަންސް ވިދާޅުވެއްޖެ އެވެ.
ބޮރިސްގެ އޮފީހުން މައުލޫމާތުދޭ ގޮތުން، ލޮކްޑައުން އުވާލުމަށްފަހު ސަރުކާރުން ދެން ފިޔަވަޅުތައް އަޅަމުން ގެންދާނީ ސަރަހައްދުތަކަށް ވަކިވަކިންނެވެ. އެގޮތުން ކޭސްތަކުގެ އަދަދު ގިނަ ސަރަހައްދުތަކުގައި ހަރުކަށި ފިޔަވަޅުތައް އަޅާއިރު، ކޭސްތައް މަދު ސަރަހައްދުތަކަށް ލުއި ދެވިގެންދާނެއެވެ.
އިނގިރޭސިވިލާތުގައި އަޅާފައިވާ ލޮކްޑައުނަށް ލުއިދޭނެ ކަމަށް އެގައުމުގެ ބޮޑުވަޒީރު ވިދާޅުވުމާއި އެކު ގިނަ ބައެއްގެ ފާޑުކިއުން ވަނީ އެމަނިކުފާނަށް އަމާޒުވެފައެވެ. އެގޮތުން ބޮރިސްގެ ޕާޓީގެ ފަރާތްތަކުންވެސް އަންނަނީ ލޮކްޑައުން އުވާލަން އަދި އަވަސްކަމަށް ފާހަގަކޮށް، ލޮކްޑައުން އުވާލައިފި ނަމަ ގެއްލުން ބޮޑުވާނެކަމަށް ބުނަމުންނެވެ.
ލޮކްޑައުން އުވާލުމުގެ ވާހަކަ ބޮޑުވަޒީރު ބޮރިސް ދައްކަވާފައިވާ އިރު، މިހާތަނަށް 1،500،000 (އެއް މިލިއަން ފަސް ލައްކަ) އަށް ވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފައެވެ.
އިނގިރޭސި ސަރުކާރުން ވަނީ ކޮވިޑް-19ގެ ވެކްސިނަކަށް ހުއްދަ ލިބުމާއި އެކު އަންނަ މަހުގެ ތެރޭގައި އެގައުމުގެ ރައްޔިތުންނަށް ވެކްސިންދޭން ފެށޭނެ ކަމަށްވެސް ބުނެފައެވެ. އަދި ކުރިއަށް އޮތްތާގައި ބަލި ކޮންޓްރޯލްކުުރުމަށް މާސް ޓެސްޓިންގ މަސައްކަތްކުރާނެ ކަމަށްވެސް ސަރުކާރުން ބުނެއެވެ.
