ފްރާންސްގެ ޕެރިހުގައި ބުރާސްފަތި ދުވަހު ބަޑިން ހަމަލާ ދިން މީހާ ދެނެގަނެވިފައިވާ ކަމަށާއި އެމީހާއަކީ ހައްދުފަހަނައަޅައިފައިވާ މުސްލިމެއް ކަމަށް ފްރާންސް ފުލުހުން ބުނެފިއެވެ.

ފްރާންސް ފުލުހުން ބުނީ އެމީހާ ދެނެގަނެވިފައި ވަނީ އޭނާގެ ކާރުގައި ހުރި ގަނޑުތަކެއްގެ އެހީގައި ކަމަށެވެ. އެހެންނަމަވެސް ފުލުހުން އޭނާގެ ނަން ހާމަކޮށްފައެއް ނުވެއެވެ.

ފްރާންސްގެ މީޑިއާ ރިޕޯޓުތައް ބުނާ ގޮތުން ބަޑިން ހަމަލާ ދިން މީހާއަކީ ވެރިރަށް ޕެރިހުގެ ރަށްބޭރުގައި ދިރިއުޅެމުން އަންނަ އުމުރުން 39 އަހަރުގެ މީހެކެވެ.

ޕެރިހުގެ މަޝްހޫރު މަގެއް ކަމުގައިވާ ޗެމްޕްސް އެލިސީސްގައި ބަޑިޖެހުމުގެ ހާދިސާ ހިނގިއިރު، ބަޑިން ހަމަލާދިން މީހާ ވަނީ ފްރާންސް ފުލުހުންގެ ހަމަލާގައި މަރުވުމުގެ ކުރިން، އެއް ފުލުހަކު މަރާލައި ދެ ފުލުހަކު ޒަޚަމްކޮށްލާފައެވެ. 

ފްރާންސް ފުލުހުން ބުނާ ގޮތުން ހަމަލާ ދިން މީހާގެ ކާރުން ވަނީ ޕަމްޕް-އެކްޝަން ޝޮޓް ގަންއަކާއި އަދި ވަޅިތަކެއް ފެނިފައެވެ.

ރޮއިޓާސް އިން ބުނި ގޮތުގައި ހަމަލާ ދިން މީހާ އާއިލާގެ ތިން މީހަކު ފްރާންސް ފުލުހުން ވަނީ ހައްޔަރުކޮށްފައެވެ.

އިސްލާމިކް ސްޓޭޓް (އައިއެސް) ގެ ނޫސް އެޖެންސީ، "އަލްއަޢްމާޤް" އިން ބުނެފައި ވަނީ ޕެރިހުގެ މަގަކަށް ހަމަލާ ދިން މީހާ އަކީ އައިއެސް އަށް ނިސްބަތްވާ ހަނގުރާމަވެރިއެއް ކަމަށްވާ އަބޫޔޫސުފް އަލްބެލްޖީކީ ކަމަށެވެ.

ފްްރާންސްގެ ރިޔާސީ އިންތިޚާބުގެ ފުރަތަމަ ބުރު އާދީއްތަ ދުވަހު ބާއްވާއިރު ސަލާމަތީ ޚިދުމަތްތަކުން ވަނީ ސަލާމަތީ ކަންކަން ވަރަށް ވަރުގަދަކޮށްފައެވެ.