ޓްރަމްޕްގެ ސައުދީ ދަތުރުފުޅު: ފުރަތަމަ ދުވަހު 280 ބިލިއަން ޑޮލަރުގެ ވިޔަފާރި އެއްބަސްވުން!
އެންމެ ބޮޑު އެއްބަސްވުމެއް ވެފައިވަނީ ބްލެކްސްޓޯން އާއި ސައުދީގެ ޕަބްލިކް އިންވެސްޓްމަންޓް ފަންޑާއި ދެމެދު
އެމެރިކާ އާއި ސައުދީ އާއި ދެމެދު ވިޔަފާރީގެ އެއްބަސްވުންތައް ވުމުގެ ތެރެއިން
އެމެރިކާގެ ރައީސް، ޑޮނާލްޑް ޓްރަމްޕް މިހާރު ސައުދީ އަރަބިއާއަށް ކުރައްވަމުން ގެންދަވާ ދަތުރުފުޅުގެ ފުރަތަމަ ދުވަހު ދެ ޤައުމުގެ ދެމެދުގައި 280 ބިލިއަން އެމެރިކާ ޑޮލަރުގެ އަގުހުރި ވިޔަފާރި އެއްބަސްވުންތައް ވެއްޖެއެވެ.
ދެ ޤައުމުގައި އެތައް ލައްކަ ވަޒީފާއެއް ޤާއިމްވުމަށް ފުރުޞަތު ހުޅުވިގެންދާ ގޮތަށް ވެފައިވާ މި އެއްބަސްވުންތަކުގައި ސޮއިކޮށްފައިވަނީ ހޮނިހިރު ދުވަހު ރިޔާދުގައި، ރަސްގެފާނު ސަލްމާން ބިން އަބްދުލް އަޒީޒް އަލް ސައުދާއި، ރައީސް ޑޮނާލްޑް ޓްރަމްޕްގެ ހާޒިރުގައެވެ. ރައީސް ޓްރަމްޕް ވެރިކަމާއި ހަވާލުވެވަޑައިގަތްފަހުން، ޤައުމުން ބޭރަށް ކުރައްވާ ފުރަތަމަ ދަތުރުފުޅުގައި ސައުދީއަށް ވަޑައިގެންފައިވާއިރު، އެމަނިކުފާނުގެ ވަފުދުގައި އެމެރިކަގެ ސިޔާސީ އިސްވެރިންނާއި، އެމެރިޚާގެ ބޮޑެތި ކުންފުނިތަކުގެ ވެރިން ބައިވެރިވެވަޑައިގަންނަވައެވެ.
އިޤުތިޞާދީ ނަޒަރަކުން ބަލާއިރު ސައުދީއާއި އެމެރިކާ އާއި ދެމެދު ވެފައިވާ އެންމެ ބޮޑު ވިޔަފާރީގެ އެއްބަސްވުމަކީ، އެމެރިކާގެ އެންމެ ބޮޑު އެސެޓް މެނޭޖްމަންޓް ކުންފުނި، ބްލެކްސްޓޯން އާއި ސައުދީގެ ޕަބްލިކް އިންވެސްޓްމަންޓް ފަންޑާއި ދެމެދު ވެފައިވާ އެއްބަސްވުމެވެ. މި އެއްބަސްވުމުގެ އަގު ކުރިއަށް އޮތް 10 އަހަރު ތެރޭގައި 350 ބިލިއަން އެމެރިކާ ޑޮލަރަށް އަރާނެއެވެ.
މި އެއްބަސްވުމުގެ އިތުރުން ދެން ސައުދީ އާއި އެމެރިކާ އާއި ދެމެދު ވެވުނު އެއްބަސްވުންތަކުގެ ތެރެއިން ފާހަގަކޮށްލެވުނު އެއްބަސްވުންތަކުގެ ތެރޭގައި ހިމެނެނީ؛
- ސައުދީ އަރަމްކޯ: އެމެރިކާގެ ކުންފުނިތަކާއެކު 50 ބިލިއަން އެމެރިކާ ޑޮލަރުގެ އެއްބަސްވުން
- އެމެރިކާގެ ޖެނެރަލް އިލެކްޓްރިކުން ކޮންސްޓްރަކްޝަނާއި، މައިނިންގެ ދާއިރާއިން 15 ބިލިއަން އެމެރިކާ ޑޮލަރުގެ އެއްބަސްވުން
- ރޭތިއޯން ކުންފުނީގެ ގަލްފް ގޮފިން ސައުދީގައި އެއާ ޑިފެންސް ސިސްޓަމާއި، ޒަމާނީ ހަތިޔާރު އުފެއްދުން
- އެކްސޯންމޯބިލް އާއި ސެބިކް: ޕެޓްރޯކެމިކަލް އުފެއްދުމުގެ އެއްބަސްވުން
- ލޮކްހީޑް މާޓީން: ބްލެކްހޯކް S-70 މަރުކާގެ 150 ހެލިކޮޕްޓަރު، ސައުދީގައި އެސެމްބަލް ކުރުމަށް އެއްބާރުލުންދިނުން
- ސައުދީގައި ޑިޒަންކޮށް، އުފައްދާ އާމަރޑް ކޮމްބެޓް އުޅަނދުތަކުގެ ފެންވަރު ރަނގަޅުކުރުމަށް އެހީވުމަށް ޖެނެރަލް ޑައިނަމިކްސްއާއެކުވި އެއްބަސްވުން
- ރޯވަން ކޯ: 7 ބިލިއަން އެމެރިކާ ޑޮލަރުގެ އަގުހުރި އޯފްޝޯ ޑްރިލިންގ ޕްލެޓްފޯމެއް ޤާއިމްކުރުން
- ގުޅިގެން ތެޔޮ ނެގުމުގެ މަސައްކަތް ފުޅާކުރުމަށް ނޭބަރޒް އިންޑަސްޓްރީސްއާއެކުވި 9 ބިލިއަން އެމެރިކާ ޑޮލަރުގެ އެއްބަސްވުން
- އަރަމްކޯ އާއި ނޭޝަނަލް އޮއިލްވެލްގެ ދެމެދުގައި އާ ޖޮއިންޓް ވެންޗަރއެއް އުފެއްދުމަށްވި 6 ބިލިއަން އެމެރިކާ ޑޮލަރުގެ އެއްބަސްވުން
- ވެދަރފޯޑް: ތެޔޮ ނެގުމާއި ގުޅޭ 2 ބިލިއަން އެމެރިކާ ޑޮލަރުގެ އެއްބަސްވުން
- ޑޯ ކެމިކަލް ކޮމްޕެނީގެ، ޕޮލިމަރ އުފައްދާ ފެސިލިޓީއެއް ސައުދީގައި ޤާއިމްކޮށް، އެހެން ދާއިރާތަކުން ދިރާސާތައް ހިންގުން
- މެކްޑަރމޮޓް އާއި އަރަމްކޯ އާއި ދެމެދު ވެވުނު 2.8 ބިލިއަން އެމެރިކާ ޑޮލަރުގެ އެއްބަސްވުން
- ހަނީވެލް އާއި އަރަމްކޯ އާއި ދެމެދު ވެވުނު 2.8 ބިލިއަން އެމެރިކާ ޑޮލަރުގެ އެއްބަސްވުން
- މަތިންދާ ބޯޓު ގަތުމަށް ސައުދީ އެއާލައިންސް އާއި ބޯއިންގ އާއި ދެމެދު ވެވުނު އެއްބަސްވުން
- ޖެކޮބްސް އިންޖިނިއަރިންގ އާއި އެކު 250 މިލިއަން އެމެރިކާ ޑޮލަރުގެ ފަހުމުނާމާ
މި އެއްބަސްވުންތަކުގެ އިތުރުންވެސް ރައީސް ޓްރަމްޕްގެ ދަތުރުފުޅުގައި އެމެރިކާ އާއި ސައުދީ އަރަބިއާ އާއި ދެމެދު ގިނަ އެއްބަސްވުންތަކެއް ވުމަށް ވަނީ ހަމަޖެހިފައެވެ.
