ހޯމަ ދުވަހު ޕާކިސްތާނުގައި ދިން ޖާނުން ފިދާވުމުގެ ބޮމުގެ ހަމަލާ ދިވެހި ސަރުކާރުން ކުށްވެރިކޮށްފި
މުޒާހަރާއެއްގައި ދެވުނު މިހަމަލާގައި މަދުވެގެން 13 މީހުން މަރުވި އިރު 85 މީހަކު ވަނީ ޒަޚަމްވެފައި
ޕާކިސްތާނުގައި ދިން ބޮމުގެ ހަމަލާ
ހޯމަ ދުވަހު ހަވީރު ޕާކިސްތާނުގެ ލާހޫރުގައި ދެވުނު ޖާނުން ފިދާވުމުގެ ބޮމުގެ ހަމަލާ ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
ހޯމަ ދުވަހު ހަވީރު ޕާކިސްތާނު ގަނޑިން 6 ޖަހާކަށްހާއިރު ލާހޫރުގެ ޕަންޖާބު އެސެމްބްލީގެ ކުރިމަތީގައި ކުރި މުޒާހަރާއެއްގައި ދެވުނު މިހަމަލާގައި މަދުވެގެން 13 މީހުން މަރުވި އިރު 85 މީހަކު ވަނީ ޒަޚަމްވެފައެވެ.
ހޯމަ ދުވަހު ޕާކިސްތާނުގައި ދިން ޖާޏުން ފިދާވުމުގެ ހަމަލާ ކުށްވެރިކޮށް ޕާކިސްތާނުގައި ހުންނަ ދިވެހިރާއްޖޭގޭ އެމްބަސީން ކުރި ޓްވީޓެއްގައި ބުނީ ލާހޫރުގައި ދެވުނު ނުރައްކާތެރި ޖާނުންފިދާވުމުގެ ހަމަލާ ކުށްވެރިކުރާ ކަމަށާއި ރާއްޖޭގެ ކިޔަވާކުދިން ތިބީ ހެޔޮހާލުގައި ކަމަށެވެ.
ލާހޫރުގައި ޖާނުން ފިދާވުމުގެ ހަމަލާ ދިން އިރު، މުޒާހަރާ ކުރަމުން ދިޔަ މީހުން މުޒާހަރާ ކުރަމުން ދިޔައީ މަނާ ބޭސްވިއްކުމާ ދެކޮޅަށް ސަރުކާރުން ކުރަމުންދާ މަސައްކަތްތަކާ ދެކޮޅަށެވެ. މުޒާހަރާގައި ބައިވެރިވަމުން ދިޔައީ ބޭސްފިހާރަތަކުގައި މަސައްކަތް ކުރާ މީހުންނާއި އަދި ބޭސް އުފެއްދުމުގެ މަސައްކަތް ކުރާ ކުންފުނިތަކުންނެވެ.
