ސްރީލަންކާގައި 60 މީހެއްގެ މައްޗަށް އިއްވާފައިވާ މަރުގެ ހުކުމަށް ލުޔެއް ދެއްވާ އެ ފަރާތްތަކުގެ ހުކުމް، ސްރީލަންކާގެ ރައީސް މައިތްރިޕަލަ ސިރިސޭނާ އުމުރުދުވަހުގެ ޖަލު ހުކުމަކަށް ބަދަލު ކުރައްވައިފިއެވެ.

ރައީސް ސިރިސޭނާ މި ނިންމެވުން ނިންމެވީ މި އަހަރުގެ ފެބްރުއަރީ މަހު 4 ވަނަ ދުވަހު ފާހަގަ ކުރި އެގައުމުގެ މިނިވަން ދުވަހުގެ މުނާސަބާގައެވެ.

ސްރީލަންކާ ސަރުކާރުގެ ޖަލުތަކާބެހޭ ކޮމިޝަނަރު ނިޝާން ޑަނަސިންހަ ވިދާޅުވީ ރައީސް ސިރިސޭނާ 60 މީހެއްގެ މަރުގެ ހުކުމަށް ލުޔެއް ދެއްވީ ސްރީލަންކާ ސަރުކާރުގެ ޖަސްޓިސް މިނިސްޓަރު ވިޖެދާސަ ރާޖަޕަކްސަ ދެއްވި މަޝްވަރާގެ މަތިން ކަމަށެވެ.

މަރުގެ ހުކުމަށް ލުޔެއް ދެއްވައި ޖަލުހުކުމަށް ބަދަލުކުރި ގިނަ ކުށްވެރިންނަކީ ގަސްދުގައި މީހުން މެރުމުގެ ކުށުގައި ހުކުމް ތަންފީޒު ކުރަމުންދާ މީހުންނެވެ.

މީހުން މެރުމާއި، ރޭޕު ކުރުމާއި، ޑްރަގް ޓްރެފިކިން ފަދަ ސީރިއަސް ކުށްތަކަށް ސްރީލަންކާގެ ކޯޓްތަކުން މީހުންގެ މައްޗަށް މަރުގެ ހުކުމް އިއްވަމުން ގެންދިޔަ ނަމަވެސް، އެއްވެސް މީހެއްގެ މައްޗަށް އިއްވާފައިވާ މަރުގެ ހުކުމެއް 1976 ވަނަ އަހަރުގެ ފަހުން މިހާތަނަށް ތަންފީޒް ކޮށްފައެއް ނުވެއެވެ.