ގައުމަށް އަނބުރާ ދާން ބޭނުންވެގެން ހުށައެޅި ބިދޭސީންގެ ތެރެއިން، ވަޒީފާގެ މައުލޫމާތު ކަށަވަރުނުވާ ބައެއް ބިދޭސީންގެ މައުލޫމާތު ހިއްސާކޮށްދޭން އިކޮނޮމިކް މިނިސްޓްރީން އެދިއްޖެއެވެ.

ބުދަ ދުވަހު އެ މިނިސްޓްރީން އާއްމުކޮށްފައިވާ ބަޔާނެއްގައި ބުނީ، ގަވާއިދާ ހިލާފަށް، ރާއްޖޭގައި މަސައްކަތް ކުރަމުންދާ ބަންގްލަދޭޝްއަށް ނިސްބަތްވާ ބިދޭސީންގެ ތެރެއިން ގައުމަށް އެނބުރި ދާން ބޭނުންވާ ފަރާތްތައް ގައުމަށް ފޮނުވައި ދިނުމަށްޓަކައި ބަންގްލަދޭޝް ސަރުކާރާއި ދިވެހި ސަރުކާރު ގުޅިގެން ހިންގަމުންދާ "ވޮލަންޓްރީ ރިޕަޓްރިއޭޝަން" ޕްރޮގްރާމްގެ ދަށުން ގައުމަށް އެނބުރި ދިޔުމަށް އެދި ސައްހަ އެމްޕްލޯއިމަންޓް އެޕްރޫވަލްއެއްގައި ތިބި ގިނަ ބިދޭސީން ހުށައަޅަމުން އަންނަ ކަމަށެވެ.

މިނިސްޓްރީން ބުނީ، ގައުމަށް އެނބުރި ދިޔުމަށް އެދި ހުށަހަޅަމުން ދަނީ، ސައްހަ އެމްޕްލޯއިމެންޓް އެޕްރޫވަލްއެއްގައި ތިބި ނަމަވެސް އެ ފަރާތްތަކަކީ އެމްޕްލޯއިމެންޓް އެޕްރޫވަލް ދޫކުރެވިފައިވާ ވަޒީފާ ދޭ ފަރާތްތަކުގެ ވަޒީފާތަކުގައި މަސައްކަތްކުރަމުންދާ ފަރާތްތަކެއް ނޫން ކަމުގައި ބަޔާންކޮށް ކަމަށެވެ.

އެހެންކަމުން ލިސްޓްގައި ހިމެނޭ ފަރާތްތަކަކީ އެމްޕްލޯއިމެންޓް އެޕްރޫވަލް ދޫކުރެވިފައިވާ ވަޒީފާ ދޭ ފަރާތުގެ ވަޒީފާގައި މަސައްކަތްކުރަމުންދާ ފަރާތްތަކެއް ކަމުގައިވާނަމަ، މި މަހުގެ 21 ކުރިން އީމެއިލް މެދުވެރިކޮށް[email protected]ހުށަހެޅުމަށް މިނިސްޓްރީން ވަނީ އެދިފައެވެ.

އީމެއިލްގައި ބިދޭސީ ފަރާތުގެ ފުރިހަމަ ނަމާއި، ޕާސްޕޯޓު ނަންބަރާއި އަދި ވަޒީފާދޭ ފަރާތުގެ މައުލޫމާތު ހިމެނުމަށް އިކޮނޮމިކް މިނިސްޓްރީން އެދެއެވެ.

ފޮރިން މިނިސްޓްރީއާ އިކޮނޮމިކް މިނިސްޓްރީ ގުޅިގެން ކުރިޔަށްގެންދާ "ވޮލަންޓްރީ ރިޕަޓްރިއޭޝަން" ގެ ދަށުން މިހާތަނަށް 15،000 ބިދޭސީން އަނބުރާ ގައުމަށް ފޮނުވާލެވިފައިވާ ކަމަށް އިކޮނޮމިކް މިނިސްޓްރީން ވަނީ ބުނެފައެވެ.