ސަރުކާރު ހިންގާ މައި ޕާޓީ ޕީޕީއެމް އާއި އައްޑޫ ސިޓީން ގުޅުނު ކަމަށް ބުނާ 700 އެއްހާ މީހުންގެ ރެޖިސްޓްރޭޝަން ފޯމް އެޕާޓީއާ ހަވާލުކުރުމަށް ބޭއްވި ޖަލްސާއަކަށް ވަޑައިގެންނެވުމަށްޓަކައި ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދު މަޖިލީހުގެ ބުދަ ދުވަހުގެ ޖަލްސާ ކުރުކޮލެއްވުމަށް ފަހު، އެ އެޖަލްސާއަށް ވަޑައިގަންނަވައިފި އެވެ.

ބުދަ ދުވަހު ރައްޔިތުންގެ މަޖިލީހުން ބޭއްވި މިއަހަރުގެ ފުރަތަމަ ދައުރުގެ ތިން ވަނަ ޖަލްސާގައި ލޯކަލް ކައުންސިލްތަކުގެ އިންތިހާބާ ބެހޭ ގާނޫނަށް ސަރުކާރަށް ނިސްބަތްވާ ހޮޅުދޫ ދާއިރާގެ މެމްބަރު އަލީ މުހައްމަދު ހުށަހެޅުއްވި އިސްލާހު ގެނައުމުގެ ބިލަށް 11:00 ގައި ވަނީ ވޯޓަށް އަހާ ފާސްކޮށްފަ އެވެ. އާއްމު އުސޫލެއްގެ ދަށުން، ދުވަހުގެ މަސައްކަތްތަކުގެ ތެރެއިން ވޯޓުން ނިންމާ ހިސާބަށް ގޮސްފައިވާ ކަންކަމަށް ވޯޓަށް އެހުން އޮންނަނީ 13:30 ގަ އެވެ. އެފަދަ ގޮތަކަށް މީގެކުރިން މަޖިލިސް ކުރުކޮށްލުމަށްފަހު، ވޯޓަށް އަހާފައެއް ނުވެއެވެ.

ޕީޕީއެމްގެ އެޖަލްސާ އޮތީ ސްޓެލްކޯގެ މާލަމެއްގަ އެވެ. އެޖަލްސާގައި ރައީސް އަބްދުﷲ ޔާމީން ބައިވެރިވެވަޑައިގެން ވާހަކަފުޅު ދައްކަވާފައި ވެއެވެ. އަދި އެ ޖަލްސާއަށް ޕީޕީއެމްގެ ގިނަ މަޖިލީސް މެމްބަރުންނާއި ސަރުކާރުން ވަޒީރުންނާއި ސަރުކާރު ކުންފުނިތަކުގެ ވެރިންނާއި މުވައްޒަފުން ބައިވެރިވެފަ ވެއެވެ. އަދި ކުރިއަށް އޮތް ލޯކަލް ކައުންސިލް އިންތިހާބުގައި އައްޑޫ ސިޓީ ކައުންސިލަށް ވާދަކުރައްވާ ޕީޕީއެމްގެ ބައެއް ކެންޑިޑޭޓުން ވަނީ އެޖަލްސާގައި ވާހަކަ ދައްކާފަ ވެއެވެ.