އަލުން އަނބުރާ ރާއްޖެއަށް ދާނަން، އުންމީދު ކަނޑައެއް ނުލަން: ރައީސް ނަޝީދު

އަލުން އަނބުރާ ރާއްޖެ ވަޑައިގަންނަވޭނެ ކަމަށާއި އިސްލާހީ މަސައްކަތްތަކާމެދު އެއްވެސް ގޮތަކަށް އުއްމީދު ކަނޑާނުލައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

މިއަދު ބޭއްވި ޖެނީވާ ސަމިޓްގައި ޝަރަފުވެރި މެހްމާނެއްގެ ގޮތުގައި ވާހަކަފުޅު ދައްކަވަމުން، 13 އަހަރަށް ޖަލަށް ހުކުމްކުރައްވާފައި ހުންނެވި ކުރީގެ ރައީސް ނަޝީދު ވިދާޅުވީ "އަނބުރި ޖަލަށް ދާން ޖެހުނު ނަމަވެސް އަލުން ގައުމަށް އެނބުރި އަންނާނެ" ކަމަށެވެ.

ނުވަ ވަނަ ޖެނީވާ ސަމިޓްގައި ރައީސް ނަޝީދަށް އެރުވި ކަރޭޖް އެވޯޑާ ހަވާލުވެވަޑައިގަތުމަށް ފަހު ވާހަކަފުޅު ދައްކަމުން އެ މަނިކުފާނު ވިދާޅުވީ ރާއްޖެއަށް ޑިމޮކްރަސީ ގެނައުމުގެ މަސައްކަތް ފެށީ ނޫސްވެރިއެއްގެ ހައިސިއްޔަތުން ކަމަށެވެ. ރާއްޖެއަށް ޑިމޮކްރަސީ ގެނައުމަށް ގިނަ މަސައްކަތްތަކެއް ކުރެވުނު ކަމަށްވެސް އެމަނިކުފާނު ފާހަގަކުރެއްވި އެވެ. ފަރުދީ ހައިސިއްޔަތުން ގިނަ ގުރުބާނީތަކެއް ކުރެވިފައިވާކަން ފާހަގަ ކުރައްވައި ނަޝީދު ވިދާޅުވީ އެ މަނިކުފާނު އެތައް ފަހަރަކު ޖަލަށް ލެއްވި ކަމަށާއި އަނިޔާކުރެއްވި ކަމަށާއި 18 މަސް ދުވަހު، އެކަހެރިކޮށް ހައްޔަރުކޮށްފައި ބެހެއްޓި ކަމަށެވެ.

އިސްލާހީ މަސައްކަތްޕުޅުގެ ތެރެއިން 2008 ގައި ވެރިކަން ކާމިޔާބު ކުރެއްވުނު ނަމަވެސް، ހުދުމުހްތާރު ވެރިކަމެއްގެ މޫތައް ދުރަށް އޭރުވެސް ފެތުރިފައިވާ ކަމަށެވެ. އަދި އެ މަނިކުފާނުގެ ވެރިކަން ބަގާވާތަކުން ބަދަލުކުރިއިރު، ބާރު ބޭނުންކޮށްގެން ވެރިކަމުގައި ދެމި ހުންނެވުމުގެ ވިސްނުން ނުގެންގުޅުއްވީ ދިވެހި ގައުމަށާއި އިންޑިއާ ކަނޑުގެ ސަލާމަތާއި މެދު ވިސްނެވުމަށްފަހު ކަމަށް ވެސް އެ މަނިކުފާނު ވިދާޅުވި އެވެ.

"ޑިކްޓޭޓަރެއް ވެރިކަމުން ދުރުކުރުމަކީ ފަސޭހަކަމެއް. އެކަމަކު ޑިކްޓޭޓަރޝިޕެއްގެ މޫތަށް ދުރަށް ފެތުރިފައިވޭ. އޭގެ ސަބަބުން، ވެރިކަން ވެއްޓިގެންދިޔައީ. ރާއްޖޭގައި ހިނގައިދިޔަ ކަންތައްތަކަކީ ދުނިޔޭގައި އެންމެ ފުރަތަމަ "ޓެލެވައިޒްޑް" ބަޣާވާތެއް،" ނަޝީދު ފާހަގަކުރެވެއްވި އެވެ.

"އޭރު ބަލިގަބޫލުނުކޮށް، ވެރިކަމުގައި ހުންނަން މަސައްކަތްކުރި ނަމަ، އަޅުގަނޑަށް ގަބޫލުކުރެވުނީ އެއީ ގައުމަށާއި އިންޑިޔާ ކަނޑުގެ ސަލާމަތަށް އޮތް ހަމަނުޖެހުމެއް ކަމަށް،" ރައީސް ނަޝީދު ވިދާޅުވި އެވެ.

ވެރިކަން ވެއްޓުމަށްފަހު، ކަންކަންވެގެންދިޔަ ގޮތާއިމެދު ވާހަކަފުޅު ދައްކަވަމުން ނަޝީދު ވިދާޅުވީ ރައީސް ޔާމީންގެ ވެރިކަމުގައިވެސް ފެނިގެންދަނީ ހުދުމުހުތާރުކަން ކަމަށެވެ. އެގޮތުން، ހުރިހާ އިދިކޮޅު ސިޔާސީ ފަރާތްތައް މިހާރު ހުރީ ޖަލުގެ ތޭރިތަކުގެ ފަހަތުގައި ކަމަށާއި އެމަނިކުފާނަށް އިގިރޭސިވިލާތަށް ދެވުނީ ސިއްހީ މައްސަލަތަކަށް ފަރުވާ ހޯދުމަށް ސަރުކާރުން ދޫކުރުމުން ކަމަށް ނަޝީދު ވިދާޅުވި އެވެ.

އަދި، ރާއްޖޭގައި މިނިވަން އިންތިހާބެއް ބޭއްވޭނޭކަމުގެ ޔަގީންކަން ސަރުކާރުން ނަގާލަމުންދިޔަ ނަމަވެސް، ރާއްޖޭގެ ކުރިމަގާއި މެދު ކުރާ އުންމީދުތައް އަދިވެސް ދޫކޮށްނުލައްވާކަމަށްވެސް އެމަނިކުފާނު ވިދާޅުވި އެވެ. އަލުން އަނބުރާ ގައުމަށް ދާން ޖެހުނު ނަމަވެސް، ގައުމަށް އަލުން އެނބުރިވަޑައިގަންނަވާނޭ ކަމަށް ވިދާޅުވާ ވިދާޅުވުން މިއަދުވެސް ރައީސް ނަޝީދު ވަނީ ތަކުރާރު ކުރައްވާފަ އެވެ.