ހަނގުރާމަ ކުރަން ސީރިއާއަށް ދާން އުޅުނު ދިވެއްސަކު އަތުލައިގެންފި
ހަނގުރާމައަށް ދިޔަ މީހާ ހައްޔަރުކުރީ ތުރުކީން
މަގުމަތީގައި ފުލުުހުންތަކެއް ހަރަކާތްތެރިވަނީ: ފުލުހުން ބުނީ ހަނގުރާމަތަކުގައި ބައިވެރިވާ މީހުން އަތުލައިގަތުމަށް ގިނަ މަސައްކަތްތަކެއް ކުރާ ކަމަށް
ސީރިޔާގައި ކުރިޔަށްދާ ވަރުގަދަ ދާހިލީ ހަނގުރާމައިގައި ބައިވެރިވާން ދާން އުޅުނު ދިވެއްސަކު އަތުލައިގެންފި އެވެ.
ފުލުހުން ކޮށްފައިވާ ޓުވީޓެއްގައި ބުނެފައިވަނީ، ސީރިއާގެ ހަނގުރާމައިގައި ބައިވެރިވުމަށް ސީރިއާއަށް އެތެރެވާން މަސައްކަތް ކުރި ދިވެއްސަކު ހައްޔަރުކޮށްގެން މާލެ ގެނެސްފައިވާ ކަމަށެވެ.
އެ މައްސަލަ ތަހުގީގު ކުރަމުންދާ ކަމަށާއި، އެފަދަ މައްސަލަތައް މަދުކުރުމަށްޓަކައި ބައިނަލްއަގްވާމީ ފަރާތްތަކާ އެކު ފުލުހުން ކުރަމުންދާ މަސައްކަތްތައް އިތުރަށް ފުޅާކޮށް، ފުލުހުންގެ ގާބިލުކަން އިތުރު ކުރުމަށް ފުޅާ ދާއިރާއެއްގައި މަސައްކަތް ކުރަމުން އަންނަ ކަމަށް ވެސް ފުލުހުން ބުނެ އެވެ.
ފަހަކަށް އައިސް، ބޭރުގެ އެކި ޤައުމުތަކުގައި ކުރެވޭ ހަނގުރާމަތަކުގައި ބައިވެރިވާ ދިވެހިންގެ އަދަދު އިތުރުވަމުން އަންނަކަމަށް، ބައިނަލްއަޤުވާމީ ޖަމިއްޔާތަކުން ހާމަކުރާ ތަފާސްހިސާބުތަކުން ވަނީ ހާމަވެފަ އެވެ. ސަރުކާރުން އެ ވާހަކަތައް ދޮގުކުރާއިރު، ސަރުކާރުން ބުނެފައިވަނީ ބޭރުގެ ހަނގުރާމަތަކުގައި ބައިވެރިވަނީ އެންމެ 50 މީހުން ކަމަށެވެ.
