ކޯލިޝަން ސަރުކާރެއް ހިންގުމަކީ ދަތިކަމެއް ނޫން، ލީޑަރުންނާ މަޝްވަރާކުރަން: ރައީސް ސޯލިހު
11 ނޮވެމްބަރު 2020 | ބުދަ 03:45ކޯލިޝަން ލީޑަރުންނާއި އަމިއްލަފުޅައް އިސްނަންގަވައި މަޝްވަރާކުރަން
ރައީސް ސޯލިހު ފަށާއިރު ޕްރޮގްރާމްގައި ވާހަކަ ދައްކަވަނީ
ސިޔާސީ ޕާޓީތަކުގެ މެދުގައި ހެދިފައި އޮތް ކޯލިޝަން ދެމިއޮންނާނެކަމަށާއި ލީޑަރުންނާއި ފޯނުން ގުޅުއްވައި މިހާރުވެސް ބަރާބަރަށް މަޝްވަރާކުރައްވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބާއާއި ގުޅިގެން ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ރައީސް ސޯލިހު ވިދާޅުވީ، ކޯލިޝަންގެ ބައްދަލުވުންތައް ކުރިއެކޭ އެއްގޮތަށް ނުބޭއްވެނީ ޝެޑިއުލްތައް ދިމާނުވާތީކަމަށާއި ނަމަވެސް ކުރައްވާ ހުރިހާ ކަމެއް ކުރައްވަނީ ކޯލިޝަންގެ ލީޑަރުންގެ މަޝްވަރާއާއި އެކުގައި ކަމަށެވެ. އެގޮތުން، ވަކިވަކިން ލީޑަރުންނާއި ފޯނުން ގުޅުއްވައި މުހިންމު ކަންތައްތަކުގައި މަޝްވަރާކުރައްވާކަމަށް ރައީސް ސޯލިހު ވިދާޅުވިއެވެ. އަދި، އަމިއްލަފުޅަށްވެސް ކަންކަމުގައި އިސްނަންގަވައު މަޝްވަރާކުރެއްވުމަށް ގުޅުއްވާކަމަށް ރައީސް ވިދާޅުވިއެވެ.
ޕްރޮގުރާމްގައި ރައީސް ވަނީ ތަކުރާރުކޮށް، ކޯލިޝަން ދެމިއޮންނާނެ ކަމަށާއި ހުރިހާ ލީޑަރުންނާއި އެކުގައި އޮތް ގުޅުންވެސް ރަނގަޅުކަމަށް ވިދާޅުވެފައެވެ.
ޕްރޮގްރާމްގައި ވާހަކަ ދައްކަވަމުން، ކޯލިޝަންގެ މެދުގައި ހެދިފައި އޮތް އެގްރީމަންޓަށް އަލިއަޅުއްވައި ރައީސް ވިދާޅުވީ، 4 މިނިސްޓަރެއް އެކި ސަބަބުތަކާއި ހުރެ ބަދަލުކުރިނަމަވެސް އެ ހުރިހާ ކަމެއް ކޮއްފައިވަނީވެސް ލީޑަރުންނާއި މަޝްވަރާކުރައްވައި ހިޔާލު ހޯދުމަށް ފަހުގައި ކަމަށެވެ. އަދި ވަކި ޕާޓީއެއް ބާކީކޮއްލުމުގެ ބޭނުމުގައި އެއްވެސް މަސައްކަތްތެއް ކޮށްފައިނުވާކަން ރައީސް ވަނީ ފާހަގަކުރައްވާފައެވެ.
ރައީސް ވަނީ، ކޯލިޝަނެއް ގޮވައިން ކުރިޔަށް ގެންދިއުމަކީ އެހާ ދަތިކަމެއް ނޫންކަމަށާއި އެއްބަސްވުމެއް އެބައޮތްކަމަށް ޕްރޮގްރާމްގައި ވިދާޅުވެފައެވެ.
