ރައީސް ޔާމީނަކީ ޕީޕީއެމްއެއް ނޫން: މެންބަރު އަރީފު
ޕީޕީއެމް އަކީ މައުމޫން ކަމަށް އަރީފު ވަނީ ވިދާޅުވެފަ
މެންބަރު އަރީފު މައުމޫން ފެކްޝަނު މެންބަރުންނާ އެކު
ރައީސް ޔަމީނަނީ ޕީޕީއެމްއެއް ނޫން ކަމަށާއި މިއަދު މިފެނިގެންދަނީ ރައީސް ޔާމީން ހިންގެވި ޕީޕަލްސް އެލަޔަންސް (ޕީއޭ) ކަމަށް ނޮޅިވަރަމް ދާއިރާގެ މެންބަރު ހުސައިން އަރީފު ވިދާޅުވެއްޖެ އެވެ.
ރާއްޖެޓީވީ ބޮޑު ސުވާލު ޕްރޮގްރާމުގައި ވާހަކަދައްކަވަމުން ރައްޔިތުންގެ މަޖިލީހުގެ މައުމޫން ފެކްޝަނަށް ނިސްބަތްވާ މެންބަރު ހުސައިން އަރީފު ވިދާޅުވީ، މިއަދު ޕީޕީއެމްގެ ނަމުގައި ރައީސް ޔާމީން ނުކުމެވަޑާއިގެން މަސައްކަތް ކުރެއްވި ނަމަވެސް ފެނިގެންދަނީ ޕީޕީއެމް އެއް ނޫން ކަމަށާއި މިއަދު ފެނިގެންދަނީ ޕީއޭ ޕާޓީ ކަމަށެވެ. ޕީޕީއެމް އަކީ ރައީސް މައުމޫންގެ ފިކުރަށް ތާއީދު ކުރާ ފަރާތްތައް ކަމަށް ދޭހަވާގޮތަށް ވާހަކަދައްކަވަމުން އޭނާ ވިދާޅުވީ، ރައީސް ޔާމީނަށް ރައްޔިތުންގެ ތާއީދު އޮތް ކަމަށް ގަބޫލު ނުކުރައްވާ ކަމަށާއި އެމަނިކުފާނު ރަށްރަށަށް ވަޑައިގަތުމުން މަރުހަބާ ކިޔުމަށް ނުވަތަ ޖަލްސާ އެއް ބޭއްވުމަށް އެއްވާ ފަރާތްތަކަކީވެސް ކިހިނެތް ވެގެން އެއްވާ ފަރާތްތަކެއް ކަން ރައްޔިތުންނަށް މިއަދު ވަރަށް ސާފުކަމަށެވެ.
އަރީފު ވަނީ މަޖިލީހުން މިއަދު ފާސްކުރާ ގާނޫނުތަކަކީ ކަނޑާއި ޖަންގަލީގައި ހެދިފަ އޮންނަ ގާނޫނުތަކެއްގެ ގޮތުގައި ސިފަ ކުރައްވާފައެވެ. މަޖިލީހުން ފާސްކުރި އަބުރުގެ ބިލްގެ ސަބަބުން ހިޔާލުފާޅުކުރުމުގެ މިނިވަންކަން ހަނިވެފައިވާ ކަމަށް އޭނާ ވަނީ ވިދާޅުވެފަ އެވެ.
"ސަރުކާރުގެ ކޮރަޕްޝަން ގޮސްފައިވާ މިންވަރު ވަނީ އަޅުގަނޑުމެން އިނގިނލީގައި ބޭއިހްތިޔާރުގައި ދަތްއެޅޭ ހިސާބަށް ގޮސްފައި. އެގޮތުން އެމްޕީއެލްގެ ތެރެއިން ފެންމަތިވި މައްސަލަތަކާއި ހައުސިން މިނިސްޓރްީގެ އޮޑިޓް ރިޕޯޓުންވެސް މިކަން އިތުރަށް ދޭހަވޭ." އަރީފު ވިދާޅުވި އެވެ.
މި ގައުމުގައި މިނިވަންކަމާ އަދުލުއިންސާފާއި ރައްކާތެރިކަމެއް އެއވެސް ރައްޔިތުންނަށް ނެތް ކަމަށް އަރީފު ވިދާޅުވި އެވެ.
ސަރުކާރުން ހިންގާ ޕާޓީ ޕީޕީއެމް ދެފަޅިވެ، ރައީސް ޔާމީން ފެކްޝަނާއި މައުމޫން ފެކްޝަން އުފެދިފައިވާ އިރު މައުމޫން ފެކްޝަނަށް ނިސްބަތްވާ ޕީޕީއެމް މެންބަރުން އަންނަނީ ސަރުކާރުން ނިންމާ ނިންމުންތަކަށް ފާޅުގައި ފާޑުވިދާޅުވެ އެކަން ބަލައިނުގަންނަކަން ހާމަކުރަމުންނެވެ.
