ރައްޔިތުންނަށް ޚިދުމަތް ކުރަން އައީ އެއްވެސް ބޭފުޅަކާ ހަނގުރާމަކުރާކަށް ނޫން: ރައީސް
ކައުންސިލްތަކުގެ މެޖޯރިޓީ ސަރުކާރަށް ލިބެންޖެހޭ ކަމަށް ވިދާޅުވި
ރައީސް ޔާމިން ސަރުކާރުގެ ޖަލްސާއެއްގައި ވާހަކަފުޅު ދައްކަވަނީ
ރައްޔިތުންނަށް ޚިދުމަތް ކުރުމަށްޓަކައި ރައީސުލްޖުމްހޫރިއްޔާގެ މަޤާމަށް ވަޑައިގެންނެވީ އިސްވެ އެއްވެސް ބޭފުޅަކާއި ހަނގުރާމަ އިއުލާން ކުރައްވައިގެންނެއް ނޫން ކަމަށް ރައީސުލްޖުމްހޫރިއްޔާ އަބްދުﷲ ޔާމިން އަބްދުލް ޤައްޔޫމް ވިދާޅުވެއްޖެއެވެ.
މުލަކަތޮޅުގެ ބައެއް ރަށްތަކަށް ކުރައްވާ ދަތުރުފުޅުގައި މ. ދިއްގަރަށް ވަޑައިގެން، އެ ރަށުގައި ރައްކާތެރި ބޯފެން ފޯރުކޮށްދިނުން އިފްތިތާޙްކުރެއްވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ޔާމިން ވިދާޅުވީ "އެއްވެސް ބޭފުޅަކާއި އިސްވެ މިއަދުވެސް ޖަދަލުކުރާކަށް ނެތިން" ކަމަށެވެ.
ރައީސް ވިދާޅުވީ ރައްޔިތުންނަށް ޚިދުމަތް ކުރުމުގައި ސަރުކާރުން ކުރަމުންދާ މަސައްކަތުގައި އިދިކޮޅު ފަރާތްތަކުންނާއި އަދި އެއްކޮޅުފަރާތަކުން ވިޔަސް ޖަދަލުކުރާ ނަމަ އެމަނިކުފާނުގެ މަސައްކަތްތައް ކުރިއަށް ގެންދިޔުމަށް ކުރަންޖެހުނު ކަމެއް ކުރައްވާނެ ކަމަށެވެ.
"އަޅުގަނޑުމެންނަކަށް ޒީނަތްތެރި ނުވޭ މިއަދަކު މުޒާހަރާ ކޮށްގެންނެއް، ބޭރުގައުމުތަކުން ހިމާޔަތް ހޯއްދަވައިގެން ތިބެ، ގައުމަށް ޚިދުމަތް ކުރައްވާނެ ވާހަކަތައް ވިދާޅުވެގެނެއް މިއަދަކު ޒީނާތްތެރިއެއް ނުވެވޭ، އެކަމެއް އަޅުގަނޑުމެންނަކަށް ބަލައެއް ނުގަނެވޭ، އަޅުގަނޑުމެން ޤަބޫލުކުރަންޖެހެނީ ޤާނޫނުތަންފީޒް ކުރުމުގައި އެންމެން ހަމަހަމަވާނެޖެހޭނެ ކަން" ރައީސް ވިދާޅުވިއެވެ.
މީގެ އިތުރުން ރައީސްގެ ވާހަކަފުޅުގައި ވިދާޅުވި ގޮތުގައި އެއްވެސް ބިރުވެރިކަމެއް ނެތި ދިވެހި ޖައްވަށް ނޭވާ ލެވޭނެކަމުގެ ޔަގީންކަން ރައްޔިތުންނަށް ދޭން ޖެހޭ ބަޔަކީ ސިފައިންނާއި ފުލުހުންނެއް ނޫނެވެ.
ރައްޔިތުންގެ މެދުގައި އެއްކުވެރިކަމާއި އެއްބާރުލުން އޮންނަންވާނެ ކަމަށާއި އެހެންނޫނީ ދިވެހިރާއްޖެއަކީ އަބަދުވެސް ތަޅާފޮޅުން އޮންނަތަނަކަށް ވެދާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ސިޔާސީ އަރާރުމުގެ ސަބަބުން ރައްޔިތުންގެ ތަރައްޤީއަށް ސަރުކާރުން ކުރަންބޭނުންވާ އެތައްކަމެއް މަޑުޖެހި ނުވަތަ ލަސްވަމުން ދާ ކަމަށެވެ.
ސަރުކާރުން ރައްޔިތުންނަށް ފޯރުކޮށްދޭންޖެހޭ އެއްވެސް ޚިދުމަތެއް ލަސްވުމަކީ އެއްވެސް ގޮތަކަށް ބޭނުންވާ ކަމެއް ނޫން ކަމަށް ރައީސް ވިދާޅުވިއެވެ.
