ބަސްބުނުމުގެ މިނިވަންކަން އޮންނަން ޖެހޭނީ ވަކި ހައްދެއްގައި: ކެނެޑާގެ ބޮޑުވަޒީރު
31 އޮކްޓޯބަރު 2020 | ހޮނިހިރު 20:30އެހެން މީހުންނަށް އިހްތިރާމް ކުރަން ޖެހޭ: ބޮޑު ވަޒީރު
ކާޓޫން ކުރެހި މައްސަލާގައި ކުރި މުޒާހަރާއެއްގެ ތެރެއިން
ބަސް ބުނުމުގެ މިނަވަން ކަމަށް ތާއިދުކުރައްވާ ކަމަށާއި، ނަމަވެސް އެކަން އޮންނަން ޖެހޭނީ ވަކި ހައްދެއްގެ ތެރޭގައި ކަމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވެއްޖެއެވެ.
ޓްރޫޑޯ މިހެން ވިދާޅުވީ، ފްރާންސުން ކީރިތި ރަސޫލާގެ ކާޓޫން ކުރެހި މައްސަލަ އަށް އިޝާރާތް ކުރައްވައެވެ.
އެމަނިކުފާނު ވިދާޅުވީ، އެހެން މީހުންނަށް އިހްތިރާމް ކޮށްގެން އުޅުމަކީ ފަރުދީ ޒިންމާއެއް ކަމަށެވެ. މުޖުތަމައެއްގެ ގޮތުގައި އުޅެން ޖެހިފައިވާއިރު އެހެން މީހުންނަށް ބޭ އިހްތިރާމް ނުކޮށް އުޅެވޭތޯ އަބަދުވެސް ބަލަން ޖެހޭ ކަމަށް ޓްރޫޑޯ ވިދާޅުވިއެވެ.
''އެހެން މީހުންނަށް އިހްތިރާމް ކުރުމަކީ އަހަރުމެންގެ މައްޗަށް ލާޒިމް ކަމެއް''ޓްރޫޑޯ ވިދާޅުވިއެވެ.
ނަމަވެސް ފްރާންސުގައި ދިން ހަމަލާ ހަރުކަށި އިބާރާތުން ކުށްވެރި ކުރައްވާ ކަމަށާއި، ކެނެޑާ އޮތީ މި ވަގުތު ދަތި އުދަގޫ ތަހައްމަލު ކުރަމުންދާ ފްރާންސްއާ އެކު ކަމަށް އެމަނިކުފާނު ވިދާޅުވިއެވެ.
ފްރާންސްގެ ނީސްގެ ފައްޅިއެއްގައި ވަޅިން ހަމަލާދީ ތިން މީހަކު މަރާލުމާ ގުޅިގެން އެކަމުގެ ހިތާމާގައި ކެނެޑާގެ ގާނޫނު ހަދާ މަޖިލީހުގައި ވަނީ ބުރާސްފަތި ދުވަހު ސުކޫތުގެ ވަގުތުކޮޅެއް ގެނެސްފައެވެ.
ކާޓުން ކުރެހި މައްސަލަ ފްރާންސްގެ ރައީސް އެމެނުއަލް މެކްރޯން ދިފާއު ކުރެއްވުމާއި ގުޅިގެން މުސްލިމް ގައުމުތަކުގައި ދަނީ މުޒާހަރާ ކުރަމުންނެވެ. އަދި އެމަނިކުފާނަށް އެކި ގައުމުތަކުގެ ފާޑުކިޔުންތައް ވަނީ އިންތިހާއަށް އިތުރުވެފައެވެ.
