ޓީޕީޓީ ވިޔަފާރި ޕްރޮޖެކްޓުން އެމެރިކާ ވަކިވެއްޖެ

ޓްރާންސް ޕެސިފިކް ޕާރޓްނަރޝިޕް (ޓީޕީޓީ) ވިޔަފާރި ޕްރޮޖެކްޓުން ވަކިވުމުގެ އަމުރެއް އެމެރިކާގެ ރައީސް ޑޮނަލްޑް ޓްރަމްޕް ނެރުއްވައިފިއެވެ.

ޓްރަމްޕްގެ ކެމްޕެއިންގައި ވައުދުވީ ގޮތައް ޓީޕީޓީއިން އެމަރިކާއިން ވަކިވުމުގެ ރަސްމީ އޯޑަރ ޓްރަމްޕް ނެރުއްވީ ހޯމަ ދުވަހުއެވެ.

އޯޑަރ ނެރުމުގެ ސޮއި ކުރެއްވުމަށް އޯވަލް އޮފީހުގައި ބޭއްވި ރަސްމިއްޔާތުގައި ޓްރަމްޕް ވިދާޅުވީ އެކަމާ ގުޅޭގޮތުން ވާހަކަ ދައްކާތާ މިހާރު ވަރަށް ގިނަ ދުވަސް ވެފައިވާ ކަމަށެވެ. އަދި އެމެރިކާގެ މަސައްކަތްތެރިންނަށް ލިބުނު ވަރަށްބޮޑު ރަނގަޅެއް ކަމަށްވެސް ޓްރަމްޕް ވިދާޅުވިއެވެ.

ދުނިޔޭގެ އިޤްތިސޯދުގެ 40 އިންސައްތަ ހިމެނޭ ޓީޕީޓީއަކީ ބޮޑު ބާރަ ޤައުމެއް އެކުވެގެން އުފައްދާފައިވާ ވިޔަފާރީގެ ގުޅުމެކެވެ.

މިރަސްމިއްޔާތުގައި ޓްރަމްޕް ވަނީ ބޭރު ޤައުމުތަކަށް އެބޯޝަން ހައްދައިދީގެން އަމިއްލަ ޖަމްއިއްޔާތަކުން ހޯދާ ފައިސާ މަނާކުރުމާއި އެފަދަ ފައިސާ ހިފަހެއްޓުމުގެ ޤަރާރެއްގަވެސް ސޮއިކޮށްފައެވެ.