ޖަރުމަނުގައި ރަސްމީ ބައެއް ވަޒީފާތައް އަދާކުރާ ފަރާތްތައް މޫނުބުރުގާ އެޅުން މަނާކުރާ ޤާނޫނެއް ހެދުމަށް އެޤައުމުގެ ގާނޫނު ހަދާ މަޖިލީހުގެ ތިރިގެ، ބުންޑެސްތާކުން ނިންމައިފިއެވެ.

އަލަށް ހަދާ ޤާނޫނުގެ ދަށުން، މޫނުބުރުގާ އެޅުން މަނާކުރުމަށް ނިންމާފައިވަނީ ސިވިލް ސަރވަންޓުންނާއި، ފަނޑިޔާރުންނާއި، އަދި އަސްކަރީ ޚިދުމަތުގައި ހަރަކާތްތެރިވާ ފަރާތްތަކަށެވެ. މި ޤާނޫނުގެ ދަށުން މި ފަރާތްތަކަށް މޫނު ބުރުގާ އެޅުން މަނާކުރާނީ މަސައްކަތުގެ ވަގުތުތަކުގައި އެކަންޏެވެ.

މިފަދަ ޤާނޫނުނެއް ހަދަން ބުންޑެސްތާކުން ނިންމާފައިވާއިރު، ޤާނޫނީ ގޮތުން ހުއްދަ ހުރިހާ ހާލަތެއްގައި މޫނުބުރުގާ އެޅުން މަނާކުރުމަށް ޖަރުމަނުގެ ޗާންސެލަރު އަންގެލާ މާކެލް ވަނީ ނިމިގެން ދިޔަ އަހަރުގެ ޑިސެމްބަރ މަހު ގޮވާލައްވާފައެވެ. މާކެލް އެފަދައިން ގޮވާލެއްވީ، ޖަރުމަނުގެ ފެޑެރަލް އިންތިޚާބު ގާތްވަމުންދާއިރު، އޭނާއާއި އިދިކޮޅު އޯލްޓަރނޭޓިވް ފޯ ޖަރމަނީއަށް އޮތް ތާޢީދު އިތުރުވެގެން ގޮސްފައިވަނިކޮށެވެ.

އޯލްޓަރނޭޓިވް ފޯ ޖަރމަނީ އަކީ، މުސްލިމު ގައުމުތަކުން ވިލާތަށް ދަތުރުކުރާ ހިޖުރަވެރިން ބަލައިގަތުމާއި ދެކޮޅު، ހަރުކަށި ފިކުރުތަކެއް ގެންގުޅޭ ބައެކެވެ. މައިގަނޑު ގޮތެއްގައި މުސްލިމުން ހިމެނޭގޮތަށް، މެދުއިރުމަތީގެ ޤައުމުތަކުން ވޭތުވެދިޔަ 2 އަހަރުތެރޭގައި މިލިއަނަކަށްވުރެ ގިނަ މީހުން ޖަރުމަނަށް ހިޖުރަކޮށްފައިވާއިރު، އޯލްޓަރނޭޓިވް ފޯ ޖަރމަނީ ފަދަ ފަރާތްތަކުން ދަނީ ހިޖުރަވެރިން މުޖުތަމައުއާއި އެއްވުމާއިމެދު ކަންބޮޑުވުން ފާޅުކޮށްފައެވެ.

"މުޖުތަމައުއާއި ހިޖުރަވެރިން އެއްވާއިރު، އަހަރުމެންގެ ޤަބޫލުކުރުންތަކާއި، އަހަރުމެން އެހެން ސަގާފަތްތައް ތަހައްމަލު ކުރާ މިންވަރު އެބަ ޖެހޭ ސާފުވާން. މި ހެދިގެންދާ ޤާނޫނަކީ އެކަމަށް ވަރަށް ބޮޑަށް ބާރުދޭނެ ޤާނޫނެއް"، ޖަރުމަނުގެ އިންޓީރިއާ މިނިސްޓަރު ތޯމަސް ޑި މައިޒީރީ ވިދާޅުވެފައިވެއެވެ.

ޖަރުމަނުގެ ފެޑެރަލް ސަރުކާރުން މިފަދަ ޤާނޫނެއް ހެދުމަށް ތައްޔާރުވަމުންދާއިރު، ޖަރުމަނުގެ ދެކުނުގެ ސްޓޭޓެއް ކަމުގައިވާ ބަވާރިއާގައި ވެރިކަންކުރާ، މާކެލްއަށް ތާއީދުކުރާ، ކްރިސްޓިއަން ސޯޝަލް ޔޫނިއަންއިން މިދިޔަ ފެބްރުއަރީ މަހު ވަނީ، އެ ސްޓޭޓްގެ ސްކޫލް ޔުނިވަރސިޓީތަކާއި، އޮފީސްތަކާއި، ވޯޓުލާ ބޫތުތަކުގައި މޫނުބުރުގާ އެޅުން މަނާ ކުރުމަށް ނިންމާފައެވެ.