އެފްބީއައިގެ ކުރީގެ ޑިރެކްޓަރަކީ "ގަމާރެއް"، ވަކިކުރެވުނީތީ ބޮލަށް ފަސޭހަ: ޓްރަމްޕް

އެފްބީއައިގެ ޑިރެކްޓަރ ޖޭމްސް ކޯމޭ މަގާމުން ވަކިކުރެވުމަކީ އެ މަނިކުފާނަށް އޮތް ޕްރެޝަރުތަކެއް ކުޑަވެގެން ދިޔަ ކަމެއްކަމަށް އެމެރިކާގެ ރައީސް ޑޮނަލްޑް ޓްރަމްޕް ރަޝިއާގެ އޮފިޝަލުންގެ ގާތުގައި ވިދާޅުވެފައިވާކަމަށް އެމެރިކާގެ މީޑިއާތަކުން ރިޕޯޓްކޮށްފިއެވެ.

މިދިޔަ ހަފްތާގައި ބޭއްވުނު ބައްދަލުވުމެއްގައި ދެކެވުނު ވާހަކަތަކުގެ ޚުލާސާ ހިމެނޭ ޑޮކިއުމަންޓްތަކަކާއި ހަވާލާދީ ނިއުޔޯކް ޓައިމްސްއިން ބުނެފައިވަނީ ކޯމޭއަކީ "ގަމާރެއް ކަމަށް" ޓްރަމްޕް ވިދާޅުވެފައިވާކަމަށެވެ.

މަޤާމުން ވަކިކުރެވުނުއިރު، ކޯމޭ ގެންދެވީ ރައީސް ޓްރަމްގެ ކެމްޕެއިން ޓީމާ ރަޝިއާއާ ދެމެދު އޮތް ގުޅުންތައް ތަހުގީގު ކުރައްވަމުންނެވެ. އެފްބީއައިގެ ކުރީގެ ވެރިޔާ ކޯމޭ ހުންނެވީ ސެނޭޓްގެ އިންޓެލިޖެންސްކޮމިޓީގައި އެ ތަހުގީގާ ބެހޭގޮތުން ހެކިބަސް ދެއްވުމަށް ތައްޔާރުވެ ވަޑައިގެންނެވެ.

މި މައްސަލައިގެ އެންމެ ފަހުގެ ރިޕޯޓްތައް އައިސްފައި މިވަނީ ރައީސް ކަމުގެ މަގާމާ ޓްރަމްޕް ހަވާލުވެ ވަޑައިގެންނެވުމަށްފަހު ކުރައްވާ ފުރަތަމަ ދަތުރުފުޅުގައި މެދުއިރުމައްޗަށް ފުރާވަޑައިގެންނެވިތަނުންނެވެ.

"އެފްބީއައިގެ ވެރިޔާ އަޅުގަނޑު ހަމަ ވަކިކޮށްލީ. އޭނައަކީ ފައްކާ ގަމާރެއް" ރައީސް ޓްރަމްޕް ވިދާޅުވިކަމަށް ރިޕޯޓްގައި ވެއެވެ.

" ރަޝިއާގެ ފަރާތުން އަޅުގަނޑަށް ވަރަށްބޮޑު ޕްރެޝަރެއް އައި އެކަމުގެ ސަބަބުން. އެކަން ނިމިގެން އެ ދިއައީ"

ރައީސް ޓްރަމްޕް ރަޝިއާގެ ޚާރިޖީ ވަޒީރު ސަރްގޭ ލަވްރޯވް އަދި ރަޝިއާގެ އެމްބަސެޑަރ ސަރްގޭ ކިސްލިއަކް އާއެކު އޯވަލް އޮފީހުގައި ބޭއްވެވި ބައްދަލުވުމުގައި ބޭނުންކުރައްވާފައިވާ ބަހުރުވައާ ގުޅޭގޮތުން ވައިޓްހައުސްއިން ދެކޮޅުހަދާފައެއް ނުވެއެވެ.

މީގެ އިތުރުން ވޮޝިންގްޓަން ޕޯސްޓުން ރިޕޯޓްކޮށްފައިވާ ޚަބަރެއްގައި ބުނެފައިވާގޮތުގައި ޓްރަމްޕްގެ ކެމްޕެއިން ޓީމާ ރަޝިއާ އާ އޮތް ގުޅުންކަމަށް ތުހުމަތު ކުރެވޭ ގުޅުމުގައި ތުހުމަތު ކުރެވޭ އެއް ފަރާތަކީ ވައިޓް ހައުސްގެ މިހާރުގެ އޮފިޝަލެކެވެ. ނަން ހާމަ ނުކުރާ ފަރާތަކާ ހަވާލާދީ ތަހުގީގާ ގުޅުން ހުރި ފަރާތަކުން ބުނެފައިވަނީ އެ މީހަކީ ރައީސް ޓްރަމްޕްގެ އަރިސް ބޭފުޅެއްކަމަށެވެ. ނަމަވެސް އިތުރު އެއްވެސް މައުލޫމާތެއް ހާމަކޮށްފައެއް ނުވެއެވެ.