ކޮވިޑް-19 ރިކަވަރީ ސްކީމްގެ ދަށުން ކުދި އަދި މެދު ފަންތީގެ ވިޔަފާރިތަކަށާއި އަމިއްލަ މަސައްކަތް ކުރާ މީހުންނަށް އެސްއެމްއީ ޑިވެލޮޕްމެންޓް ފައިނޭސް ކޯޕަރޭޝަން (އެސްޑީއެފްސީ) އިން ދޫކުރާ ލޯނު 540ށް ވުރެ ގިނަ އަންހެނުންނަށް ދޭން ނިންމާފައިވާ ކަމަށް ފިނޭންސް މިނިސްޓްރީ އިން އާންމު ކޮށްފިއެވެ.

ފިނޭންސް އިން އާންމު ކޮށްފައިވާ މައުލޫމާތުތައް ދައްކާ ގޮތުން އޮކްޓޫބަރު މަހުގެ 22 ވަނަ ދުވަހުގެ ނިޔަލަށް ލޯނަށް އެދި ހުށައަޅާފައިވާ 879 އަންހެނުންގެ ތެރެއިން 544 އަންހެނުންގެ ފޯމް ވަނީ ބަލައިގަނެފައެވެ. އެއީ 111.4 މިލިއަން ރުފިޔާގެ ލޯނެވެ.

އެގޮތުން މި މުއްދަތުގެ ތެރޭގައި ވިޔަފާރި ހިންގާ 548 ފަރާތަކުން ފޯމު ލާފައިވާއިރު، ބަލައިގަނެފައި ވަނީ 426 ލޯނެވެ. އަދި އަމިއްލަ މަސައްކަތް ކުރާ 331 އަންހެނުން ލޯނަށް އެދި ހުށައަޅާފައިވާ އިރު، ބަލައިގަނެފައިވަނީ 118 މީހުންގެ ލޯނެވެ.

މީހާތަނަށް އައިރު އެސްޑީއެފްސީ އިން ވަނީ ޖުމްލަ 1,858 ފަރާތަކަށް 308.5 މިލިއަން ރުފިޔާގެ ލޯން ދޫކޮށްފައެވެ. އެއީ އަމިއްލަ މަސައްކަތް ކުރާ 583 ފަރާތަކަށް 17.5 މިލިއަން ރުފިޔާ އާއި 1,275 ވިޔަފާރިއަކަށް 291 މިލިއަން ރުފިޔާއެވެ.