ކަލިނަރީ ޗެލެންޖުގެ އެންމެ ގިނަ އެވޯޑް ބަރޮސް މޯލްޑިވްސްގެ ޝެފުންނަށް!

މިއޮގަސްޓް މަހުގެ އިންޓަނޭޝަނަލް ކަލިނަރީ ޗެލެންޖް އެންޑް އެގްޒިބިޝަން 2017ގެ އެންމެ ގިނަ އެވޯޑް ބަރޮސް މޯލްޑިވްސްގެ ޝެފުންނަށް ލިބިއްޖެއެވެ.

އެރިސޯޓުގެ ތޭރަ ޝެފަކު ވަނީ އެކި ކެޓަގަރީތަކުން މެޑަލް އާއި އެވޯޑް ހޯދާފައެވެ.

ދުނިޔޭގެ އެކި ގައުމުތަކުގެ ޝެފުން ބައިވެރިވި މި އިވެންޓު އިންތިޒާމް ކޮށްފައި ވަނީ ޝެފްސް ގިލްޑް އޮފް މޯލްޑިވްސްއާއި ޝެފް ގިލްޑް އޮފް ސްރީލަންކާއާއި ގުޅިގެންނެވެ. މިމުބާރާތުގެ ޖަޖުންގެ ގޮތުގައި ހަރަކާތްތެރިވެފައިވަނީ ވެސް ބައިނަލްއަޤްވާމީ ފެންވަރުގެ ޖަޖުންނެވެ.

ޖުމްލަ 67 ރިސޯޓުން މި މުބާރާތުގައި ބައިވެރިވެފައިވާއިރު 564 ޝެފުން ވަނީ އެކި ކެޓަގަރީތަކުން ބައިވެރިވެފައެވެ.

• އިބްރާހިމް ނާތިފް ވަނީ މޯސްޓް އައުޓްސްޓޭންޑިން ޝެފް އިން މޯލްޑިވްސް އާއި ބެސްޓް މޯލްޑިވިއަން ޝެފްގެ އެވޯޑް ހާސިލްކޮށް އިތުރު ފަސް ކެޓަގަރީއަކުން ފަސް ގޯލްޑް މެޑަލް ހާސިލް ކޮށްފައެވެ. ބަރޮސްގައި މަސައްކަތް ކުރާތާ 13 އަހަރުވެފައިވާއިރު ނާތިފް ވަނީ 2018 ވަނަ އަހަރުގެ ފެބްރުއަރީ މަހު ބާއްވާ މެލޭޝިއަން ކަލިނަރީ ޗެލެންޖުގައި ބައިވެރިވުމުގެ ފުރުޞަތު ލިބިފައެވެ.
• ކިމް ގުނެސެކަރާ ވަނީ ބެސްޓް ޔަންގް ޝެފްގެ އެވޯޑް ހާސިލް ކޮށްފައެވެ.

އެހެން ކަމުން މިމުބާރާތުގައި އެކި ކެޓަގަރީތަކުން ފަސް ގޯލްޑް މެޑަލް އާއި 12 ސިލްވަރ މެޑަލްއާއި 8 ބްރޮންޒް މެޑަލް ވަނީ ހޯދާފައެވެ.

ބަރޮސްގައި ޖުމްލަ 40 ޝެފުން މަސައްކަތް ކުރަމުންދާއިރު ބަރޮސްއަކީ ރާއްޖޭގެ ލަކްޒަރީ ފެންވަރުގެ އެންމެ މަތީ އެއް ރިސޯޓެވެ.