ވެމްކޯގެ ސަބަބުން ގިނަ ފަރާތްތަކަކަށް ދަނީ އޮޅުން އަރަމުން: ވީއޭއެމްކޯ

ވީ.އޭ.އެމް އެންޑް ކޮމްޕެނީ ޕްރައިވެޓް ލިމިޓެޑް (V.A.M & Company Pvt. Ltd) ނުވަތަ ވީއެމްކޯ (VAMCO) އަދި ކުނި މެނޭޖްކުރާ ކުންފުނި ވެމްކޯ (WAMCO) ގެ ނަމުގައި ދެ ކުންފުންޏަކުން ވިޔަފާރިކުރަމުން ދިޔުމުގެ ސަބަބުން ވަރަށް ގިނަ ފަރާތްތަކަކަށް ދަނީ އޮޅުންއަރަމުންކަން ކަމަށް ވީއޭއެމްކޯއިން ބުނެފިއެވެ.

ވެމްކޯ (WAMCO) އާއި ނަމުގެ ގޮތުން ހުރި ގާތްކަމެއްގެ ސަބަބުން ވީއޭއެމްކޯ (VAMCO) އިން ދޭ ޚިދުމަތްތަކާއި ވިއްކާ މުދަލާ ބެހޭ ގޮތުން ވަރަށް ގިނަ ފަރާތްތަކަށް ދަނީ އޮޅުން އަރަމުން ކަމަށް ވީއޭއެމްކޯއިން ނެރުނު ނޫސްބަޔާނުގައި ވަނީ ބުނެފައެވެ.

ވީއޭއެމްކޯއަކީ މީގެ 18 އަހަރު ކުރީއްސުރެ މެރިން އިންޖީނާއި އެހެނިހެން މެރިން އާލާތްތައް ވިއްކަމުން އަންނަ ކުންފުންޏެކެވެ.

ވޭސްޓް މެނޭޖްމެންޓް ކޯޕަރޭޝަން ނަމުގައި ކުނި އުކާލުމާއި ކުނި މެނޭޖްކުރުމުގެ ޚިދުމަތްދޭ ކުންފުންޏެއް އުފަންވެ އެ ކުންފުނީގެ ކުރުނަމެއްގެ ގޮތުގައި WAMCO ވަނީ ބޭނުންކުރަން ފަށާފައެވެ.

މި ދެކުންފުނީގެ ނަމުގައި ހުރި އެއްގޮތްކަމުގެ ސަބަބުން ދެ ކުންފުނިން ދޭ ޚިދުމަތްތަކާމެދު ވަރަށް ގިނަ ފަރާތްތަކަށް ދަނީ އޮޅުން އަރަމުން ކަމަށް ވީއޭއެމްކޯއިން ވަނީ ބުނެފައެވެ.

މިގޮތުން ވީއޭއެމްކޯއަކީ ކުނި އުކާލުމުގެ ޚިދުމަތްދޭ ކުންފުންޏަކަށް ނުވިކަމުގައި ވިޔަސް ވަރަށް ގިނަ ރައްޔިތުންނާއި، ބައެއް މީޑިޔާތަކުން އަދި ދައުލަތުގެ ބައެއް އިދާރާތަކުންވެސް ކުނި އުކާލުމާއި ކުންޏާބެހޭ އެކި ކަންކަމުގައި އަންނަނީ ވީއޭއެމްކޯއަށް ގުޅައި އަދި ލިޔެކިޔުން ފޮނުވަމުން ކަމަށް މިބަޔާނުގައި ބުނެ އެވެ.

މިފަދަ އޮޅުންތަކެއް އަރަމުންދާތީ މިކަމަށް ޙައްލެއް ހޯއްދަވައި ދެއްވުމަށް ވީއޭއެމްކޯ (VAMCO) ގެ ފަރާތުން ވާނީ (WAMCO ) ގެ އިސްފަރާތްތަކަށާއި މިނިސްޓްރީ އޮފް އިކޮނޮމިކް ޑިވެލޮޕްމެންޓަށް އެކި ފަހަރުމަތިން ދަންނަވާފައި ކަމަށާއި މިކަން ޙައްލު ކުރެއްވުމަށް މަސައްކަތްކުރެއްވުމަށް މި ދެފަރާތަށް އެކުންފުނިން ވަނީ ގޮވާލާފައެވެ.

VAMCO އަކީ ކުނި އުކާލުމުގެ ޚިދުމަތްދޭ ކުންފުންޏެއް ނޫންކަން ބަޔާން ކުރަމުން އެއީ މެރިން އިންޖީނާއި އެހެނިހެން މެރިން އާލާތްތައް ރައްޔިތުންނަށް ފޯރުކޮށްދިނުމުގެ މަސައްކަތުގައި VAMCO އިން ކުރިއެކޭވެސް އެއްގޮތަށް ކުރިޔަށްދާނެ ކަމަށް އެކުންފުނިން ވަނީ ހާމަކޮށްފައެވެ.