ލިމިޓް ހަމަވީ ކަމަށް ބުނެ އާސަންދަ ކަނޑާލުމުން މަންމަގެ ރުއިމާއި އާދޭސް: "އަފްރާހުގެ ފުރާނައަށް ލިމިޓެއް އޮވޭތަ؟"

އުމުރުން އެންމެ 30 އަހަރުގެ އަފްރާހު ފަރުހާދަކީ މުޅި އާއިލާގެ އެންމެ ބޮޑު އުންމީދެވެ. އެ އާއިލާގެ އެންމެ ދޮށީ ދަރިފުޅު އަދި ތިން އަންހެން ކުދިންނާއެކު މައިންބަފައިންގެ ހުރި ހަމައެކަނި ފިރިހެން ކުއްޖާ އެވެ. އަފްރާހަކީ އާއިލާއަށް އަބަދުވެސް އެހީތެރިކަން ފޯރުކޮށްދީ، މުޅި ގޭގެ ޒިންމާތައް އުފުލަމުން އައި ނުހަނު އަޚުލާގު ރަނގަޅު، ހީވާގި ޒުވާނެކެވެ. އެހެން ނަމަވެސް، އާއިލާއަށް ދިމާވި ހިތްދަތި އިމްތިހާނެއްގައި މިއަދު އޭނާ އޮތީ ބަލި އެނދުގައި ގުޑައި ވެސް ނުލެވޭ ހާލުގަ އެވެ.

މަސްވެރިކަމުގައި އުޅެނިކޮށް ޑީކޯވެގެން ހިނގި ހިތާމަވެރި ހާދިސާއަށްފަހު، އެނދުގައި ރަނގަޅަށް އިށީނދެ ނީންދެވޭ އަދި ކޮޅަށް ހުރުމުގެ އެއްވެސް ކުޅަދާނަކަމެއް ނެތް ޒުވާން ދަރިފުޅުގެ ހާލު ފެނި، އެ މަންމަގެ ހިތް ވަނީ ކުދިކުދިވެފަ އެވެ. އޭނާގެ ހިތާމައަކީ ހަމައެކަނި ދަރިފުޅުގެ ބަލި ހާލަތެއް ނޫނެވެ. ފަރުވާ މެދުކެނޑިއްޖެނަމަ އެ ދަރިފުޅަށް ވާނެ ގޮތަކާމެދު ކުރަންޖެހިފައިވާ ބިރުވެރި އިންތިޒާރެވެ.

އަފްރާހު ފަރުހާދު ހޮސްޕިޓަލްގައި ފަރުވާ ހޯދަނީ. ލިމިޓް ހަމަވީ ކަމަށް ބުނެ އާސަންދަ ވަނީ ކަނޑާލާފައި | ރާއްޖެއެމްވީ

ޖުލައި މަހުގެ 11 ވަނަ ދުވަހު ހިނގި އެ ހާދިސާއަށްފަހު، އޭޑީކޭ ހޮސްޕިޓަލުގެ ޑީކޯ ޗެމްބަރުގައި 26 ދުވަސް ވަންދެން ފަރުވާ ދިނުމަށްފަހު އަފްރާހު އިތުރު ފަރުވާއަށް އިންޑިއާގެ ކެރެލާގައި ހުންނަ ކިމްސް ހޮސްޕިޓަލަށް ގެންދެވުނީ އޮގަސްޓް މަހުގެ ތިންވަނަ ދުވަހު އެވެ. އުނަގަނޑާއި ފައިގެ މަސްތަކުގައި އެއްވެސް ބާރެއް ނެތިފައިވާ އަފްރާހަށް ބޭނުންވަނީ ނިއުރޯ ރޮބޮޓިކްސް ރީހެބިލިޓޭޝަންގެ ޚާއްސަ ފަރުވާ އެވެ.

އެކަމަކު، އެންމެ ހިތްދަތި ވަގުތު އާސަންދަ ލިމިޓް ހަމަވެއްޖެ ކަމަށް ބުނެ، ސަރުކާރުން ވަނީ އެހީތެރިކަން މެދުކަނޑާލާފަ އެވެ. 5 ސެޕްޓެމްބަރުގައި އާސަންދަ ކަނޑާލިކަން އާއިލާއަށް އެންގީ 28 ސެޕްޓެމްބަރުގަ އެވެ. މީސްމީހުންގެ ކައިރީގައި ރޮއެ އާދޭސްކޮށްގެން ދެ ފަހަރެއްގެ މަތިން ލިބުނު މަދު ދުވަސްކޮޅަކަށްފަހު، އޮކްޓޫބަރު 29 އިން ފެށިގެން މިހާރު ހުރިހާ ޚަރަދެއް ކުރަން ޖެހިފައިވަނީ ނިކަމެތި އާއިލާގެ އަމިއްލަ ޖީބުންނެވެ.

އަފްރާހު ފަރުހާދު ހޮސްޕިޓަލްގައި ފަރުވާ ހޯދަނީ. ލިމިޓް ހަމަވީ ކަމަށް ބުނެ އާސަންދަ ވަނީ ކަނޑާލާފައި.

އަފްރާހު ފަރުހާދު ހޮސްޕިޓަލްގައި ފަރުވާ ހޯދަނީ. ލިމިޓް ހަމަވީ ކަމަށް ބުނެ އާސަންދަ ވަނީ ކަނޑާލާފައި

އަފްރާހުގެ މަންމަ ސަލްމާ ސޯލިހު، ކަރުނުން ފުރިގެންވާ އަޑަކުން ރާއްޖެއެމްވީއަށް ކިޔައިދިން ގޮތުގައި، ދަރިފުޅަށް އާސަންދަ ނުލިބޭނެ ކަމަށް ބުނެ އެންގި އެންގުމަކީ ހިތްފަޅައިގެންދާ ފަދަ ޚަބަރެކެވެ.

ރާއްޖޭގައި އެއްބަޔަކު ވަރަށް މުއްސަނދިކޮށް އެބައުޅޭ. އެކަމަކު އާދައިގެ ނިކަމެތި ރައްޔިތު މީހާއަށް ކަމެއް ދިމާވާއިރު މިހާ ހާލުގައި މި ޖައްސަނީ ކީއްވެގެން ހެއްޔެވެ؟ މިހާވަރަށް ސަލާން ނުޖަހައިވެސް މިއަށްވުރެ ފަސޭހަ އިންތިޒާމުތަކެއް ހަމަޖެހެންޖެހޭނެ ނޫން ހެއްޔެވެ؟

ސަލްމާ ސުވާލުކުރި އެވެ

ރާއްޖެއިން ލިބެން ނެތް ޚާއްސަ ފަރުވާއަކަށް ރާއްޖެ ދިއުމަށް އާސަންދައިން އެންގި ނަމަވެސް، އެފަދަ ފަރުވާއެއް ލިބޭނެ ވަކި މަރުކަޒެއް އަދިވެސް ބުނެދެވިފައެއް ނުވެ އެވެ.

އުމުރުން އެންމެ 30 އަހަރުގެ މި ޒުވާނާގެ މުޅި މުސްތަގުބަލު އޮތީ ކުރިއަށެވެ. އެހެން ޒުވާނުންނެކޭ އެއްފަދައިން އަމިއްލަ ފައިމައްޗަށް ތެދުވެ، އާއިލާއަށް ހިމާޔަތްދީ، އުފާވެރި ދިރިއުޅުމެއް އުޅުމަކީ އަފްރާހުގެ ހަމައެކަނި ހުވަފެނެވެ. ނަމަވެސް، އެ ހުވަފެންތައް ހަގީގަތަކަށް ހެދުމަށް ހުރަސްއަޅަނީ މާލީ ތަނަވަސްކަމެއް ނެތް ނިކަމެތިކަމެވެ. އަމިއްލަ ލޯބިވާ ދަރިފުޅުގެ ފުރާނަ އާއި ސިއްހަތަށްޓަކައި މީސްމީހުންގެ ގާތަށް ގޮސް އާދޭސްކުރަން ޖެހުމަކީ އެއްވެސް މަންމައަކަށް ކެތްކުރެވޭނެ ވަރުގެ ހިތްދަތިކަމެއް ނޫނެވެ. ކަރުނައަޅައި އެ މަންމަ ކުރާ އާދޭހަކީ އެންމެ އާދޭހެކެވެ. "މަގޭ ދަރިފުޅަށް ފަރުވާ ދެވޭނެ ގޮތެއް ހަދައިދޭށެވެ!"

އަފްރާހު ފަރުހާދު ހޮސްޕިޓަލްގައި ފަރުވާ ހޯދަނީ. ލިމިޓް ހަމަވީ ކަމަށް ބުނެ އާސަންދަ ވަނީ ކަނޑާލާފައި

އަފްރާހު ފަރުހާދު ހޮސްޕިޓަލްގައި ފަރުވާ ހޯދަނީ. ލިމިޓް ހަމަވީ ކަމަށް ބުނެ އާސަންދަ ވަނީ ކަނޑާލާފައި

ދިވެހިރާއްޖެއަކީ ދުނިޔޭގެ އެންމެ ކުރިއަރާފައިވާ ފަދަ "ސިންގަޕޫރެއް" ފަދަ ތަނަކަށް ހެދުމުގެ ފޮނި ދައުވާތައް ވެރިން ކުރައްވަމުން ގެންދަވާއިރު، އަސާސީ ސިއްހީ ފަރުވާއަށްޓަކައި އާދައިގެ ރައްޔިތު މީހާ އުފުލަންޖެހޭ މިފަދަ ވޭނާއި ނިކަމެތިކަމުން ދައްކުވައިދެނީ ކޮން ހަގީގަތެއް ހެއްޔެވެ؟ ސިއްހީ ނިޒާމުގެ ރައްކާތެރިކަމުން މަހުރޫމުވެ، ބޭސްފަރުވާއަށް ސަލާންޖަހަން މަޖުބޫރުވެފައިވާ އަފްރާހު ފަދަ އެތައް ޒުވާނުންނަކާއި ނިކަމެތި އެތައް އާއިލާތަކެއް މިއަދުވެސް މި ކުޑަކުޑަ ރާއްޖޭގައި އެބަތިއްބެވެ. އެންމެންގެ ހެޔޮ ދުއާއަކީ އަފްރާހަށް އަވަސް ފަރުވާއެއްގެ މަގު އަލުން ތަނަވަސްވެ، އޭނާ ގެ ހަޔާތަށް އުފާވެރި އައު ދުވަހެއް ފެނިގެން ދިއުމެވެ.