މަޖިލީހުގެ އިދާރާގައި "މައިންގެ ކޮޓަރި އެއް" ހުޅުވައިފި
އެކޮޓަރީގައި ކުދިންނަށް ކުޅެވޭނެ އިންތިޒާމުވެސް ހަމަޖެހިފައިވާނެ
ރައްޔިތުންގެ މަޖިލީހުގެ އިދާރާގައި ހުޅުވާފައިވާ މައިންގެ ކޮޓަރި
ރައްޔިތުންގެ މަޖިލިހުގެ މެމްބަރުންގެ ތުއްޕުޅު ބޭފުޅުން ބެލެހެއްޓޭނެ އެހެން އިންތިޒާމެއް ނެތް ނަމަ މަޖިލިހުގެ އިދާރާ އަށް ގެންދަވައިގެން ބެލެހެއްޓޭނެ އިންތިޒާމެއް ހަމަޖައްސާ "މައިންގެ ކޮޓަރި" ނަމުގައި މަޖިލީހުގެ އިދާރާގައި ކޮޓަރިއެއް ބޭނުން ކުރަން ފަށައިފިއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މިކަމާއި ގުޅޭގޮތުން ވާހަކަ ދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ އެ ކޮޓަރީގައި ކުދިންނަށް ތިބެވޭނެ ކަމަށެވެ. އަދި ކުޑަކޮށް އެކުދިންނަށް އެކޮޓަރީގައި ކުޅެލާ ހަދާލެވޭނެ ކަމަށް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މަޖިލީހުގައި މައިންގެ ކޮޓެރިއެއް ހުޅުވި ނަމަވެސް ކުޑަކުދިން ބެލެހެއްޓުން އެންމެ ރަނގަޅު ވާނީ އާއިލީ މީހެއް ކަމަށެވެ. އަދި ކުދިން ބެލެހެއްޓުމަަށް އެންމެ ރަނގަޅުވާނީ ކުދިންގެ މަންމަ އާއި ބައްޕަ ކަމަށް ވެސް ނަޝީދު ވިދާޅުވިއެވެ.
ރައީސް ނަޝީދު މި މޭރުމުން ވާހަކަ ދައްކަވާފައި މިވަނީ މަޖިލީހުގެ އަންހެން މެމްބަރަކު އާލާސްވެ އިންނެވުމާއި ގުޅިގެން ގޮނޑިތައް ޖަހާފައި ހުރި ގޮތުން ހަނި ދޭތެރެތަކުން ވަޑައިގެން އިށީންދެ ވަޑައިގަތުމަށް ދަތިފުޅުވެގެން އަމީން އާންމު އަރިހުގައި އިށީންދެވޭނެ ގޮތެއް ހަމަޖައްސައި ދިނުމަށް އެދިވަޑައިގަންނަވާފައިވާތީ އެވެ. އެކަމާއި ގުޅޭގޮތުން ވާހަކަ ދައްކަވަމުން ނަޝީދު ވިދާޅުވީ ޒަމާނުއްސުރެވެސް މަޖިލީހުގައި ގޮނޑި ޖަހާ ވަކި ގަވާއިދެއް ނޯންނަ ކަމަށެވެ.
19 ވަނަ ރައްޔިތުންގެ މަޖިލީހުގައި ތިއްބަވަނީ ހަތަރު އަންހެން މެމްބަރުންނެވެ. އެއީ އެއީ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އާއި ހިންނަވަރު ދާއިރާގެ މެމްބަރު ޖީހާން މަހުމޫދާއި ތުޅާދޫ ދާއިރާގެ މެމްބަރު ހިސާން ހުސައިން އަދި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އެވެ.
