މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ގައުމީ މަޖިލީހުގެ ބައްދަލުވުމުގައި އިނގިރޭސި ވިލާތުން ސިޔާސީ ހިމާޔަތް ހޯއްދަވައިގެން ހުންނެވި ކުރީގެ ރައީސް މުހައްމަދު ނަޝީދު ބައިވެރި ވަޑައިގަންނަވައިފިއެވެ.

ބުދަ ދުވަހުގެ ހެނދުނު 10:00 ގައި ލަންކާގައި ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމަކީ ރައީސް ނަޝީދު ލަންކާއަށް ވަޑައިގެން ދިވެހި ރާއްޖޭގެ ސިޔާސީ މަޝްރަހާ ގުޅޭ ގޮތުން ކުރިއަށް ގެންދަވާ މަޝްވަރާ ބައްދަލުވުންތަކަށް ފަހު ބޭއްވި ބައްދަލުވުމެކެވެ. އެމްޑީޕީގެ ގައުމީ މަޖިލީހުގެ ބައްދަލުވުމުގައި ބައިވެރިވުމަށް ގައުމީ މަޖިލީހުގެ ގިނަ މެންބަރުން ވަނީ ލަންކާއަށް ވަޑައިގެންފައެވެ.

ރާއްޖެޓީވީއަށް މައުލޫމާތު ދެއްވަމުން އެމްޑީޕީގެ ޗެއާޕާސަންގެ ނައިބް، އަލީ ނިޔާޒު ވިދާޅުވީ އެމްޑީޕީގެ ގައުމީ މަޖިލީހުގެ ބައްދަލުވުމުން ލަންކާގައި ބާއްވާފައި ވަނީ  ޕާޓީގެ އެޑްވައިޒަރީ ކޮމެޓީގެ މެންބަރުންނާ އެކު މަޝްވަރާ ބައްދަލުވުންތަކެއް ކުރިއަށް ގެންދިއުމަށް ފަހުގައި ކަމަށެވެ. އެ ބައްދަލުވުންތަކުގައި ދިވެހި ރާއްޖޭގެ ސިޔާސީ މަޝްވަރާ ގުޅޭ ގޮތުން، އަދި ވަކިން ހާއްސަކޮށް ޕާޓީ އިތުރަށް ހަރުދަނާ ކުރުމަށް މަޝްވަރާ ކުރެވުނު ކަމަށް އަލީ ނިޔާޒު ވިދާޅުވިއެވެ.

ޕާޓީގެ އެޑްވައިޒަރީ ކޮމެޓީގެ މަޝްވަރާ ބައްދަލުވުންތަކަށް ފަހު ބުދަ ދުވަހު ގައުމީ މަޖިލީހުގެ ބައްދަލުވުމުގައި އެޑްވައިޒަރީ ކޮމެޓީއާ އެކު ރައިސް ނަޝީދު މަޝްވަރާ ކުރެއްވި ކަންކަން ގައުމީ މަޖިލީހުގެ މެންބަރުންނަން ހިއްސާ ކުރައްވާނެ ކަމަށް ބެލެވެއެވެ. އެހެން ނަމަވެސް ގައުމީ މަޖިލީހުގައި މަޝްވަރާތަކަށް ފަހު އެޕާޓީން ކަމެށް ފާސްކުރިކަމެއް މީޑީއާއަށް ހިއްސާކޮށްފައެއް ނުވެއެވެ. އަދި މަޝްވަރާތަކާ ބެހޭ ގޮތުން ވެސް މީޑިއާ އަށް ވަކި އެއްޗެއް ހާމަކޮށްފައެއް ނުވެއެވެ.

ލަންކާގައި ކުރިއަށްގެންދިޔަ ގައުމީ މަޖިލީސް ބައްދަލުވުމުގައި ނަގާފައިވާ ބައެއް ފޮޓޯތައް ގައުމީ މަޖިލީސް މެންބަރުން ވަނީ ޓްވީޓް ކޮށްފައެވެ. އެފޮޓޯތަކަށް ބަލާއިރު ގައުމީ މަޖިލީހުގެ މެންބަރުންނާއި މުޙާތަބްކޮށް ރައީސް ނަޝީދު ވަނީ ވާހަކަ ދައްކަވާފައެވެ. އަދި ގައުމީ މަޖިލީހުގެ މެންބަރުން ވަނީ ރައީސް ނަޝީދާ ޕާޓީގެ ކަންކަމާ ގުޅޭ ގޮތުން ސުވާލުކޮށް، މަޝްވަރާކޮށްފައެވެ.

އެމްޑީޕީގެ ގައުމީ މަޖިލީހުގެ މެމްބަރުން އަދި އެޑްވައިޒަރީ ކޮމިޓީގެ މެންބަރުންނާއި ރައީސް ނަޝީދު ލަންކާގައި ކުރިއަށް ގެންދާ މަޝްވަރާތަކާ ގުޅޭ ގޮތުން އަލީ ނިޔާޒު ވިދާޅުވީ ރައީސް ނަޝީދާ އެކު ކުރިއަށް ގެންދެވޭ ކޮންމެ ބައްދަލުވުމަކީ އެމްޑީޕީއަށް ކާމިޔާބު ލިބޭނެ ބައްދަލުވުމެއް ކަމަށެވެ. މި ބައްދަލުވުންތަކުގައި ދިވެހިރާއްޖޭގެ ސިޔާސީ މަޝްރަހާ ގުޅޭ ގޮތުން ނިންމެވި މުހިންމު ކަންކަމުގެ މައުލޫމާތު ދިވެހި ރައްޔިތުންނާ ހިއްސާކުރައްވާނީ ރައީސް ނަޝީދު ކަމަށް އަލީ ނިޔާޒު ވިދާޅުވިއެވެ.

އެހެންނަމަވެސް މަޝްވަރާ ބައްދަލުވުންތަކުގައި ނިންމެވި ކަންކަމުގެ މައުލޫމާތު ހިއްސާކުރެއްވުމަށް ހަމަޖެހިފައި ވަނީ މޯލްޑިވިސް ޔުނައިޓެޑް އޮޕޮޒިޝަންގެ (އެމްޔޫއޯ)ގެ ހިޔަނި ކެބިނެޓާއި ރައީސް ނަޝީދު ބައްދަލުކުރެއްވުމަށް ފަހުގައެވެ. އިދިކޮޅު އިއްތިހާދުގެ ހިޔަނި ކެބިނެޓްގެ ބައްދަލުވުމެއް ބާއްވަން ނިންމާފައި ވަނީ ބުރާސްފަތި ދުވަހު (މާދަމާ) 10:00 އިން 12:00 ލަންކާގައެވެ. މި ބައްދަލުވުމުގައި ބައިވެރި ވަޑައިގަތުމަށް އިދިކޮޅު އިއްތިހާދުގެ ހިޔަނި ކެބިނެޓްގެ ގިނަ މެންބަރުން ވަނީ ލަންކާއަށް ވަޑައިގެންފައެވެ.

އެމްޑީޕީގެ އިސް ބޭފުޅުންނާ ބައްދަލުކުރެއްވުމުގެ އިތުރަށް، ރައީސް ނަޝީދު އެމްޑީޕީގެ އާންމު މެމްބަރުނާއި ސަޕޯޓަރުންނާ ވެސް ބައްދަލުކުރައްވާނެ ކަމަށާއި އެ ބައްދަލުކުރެއްވުން އޮންނާނީ ފެބްރުއަރީ 2 ގައި ކަމަށް ވެސް މައުލޫމާތު ވަނީ ލިބިފަ އެވެ.

މި ސަރުކާރުން ޓެރަރިޒަމްގެ ދައުވާކޮށް 13 އަހަރަށް ޖަލަށް ހުކުމްކޮށްފައިވާ ރައީސް ނަޝީދު އިނގިރޭސި ވިލާތަށް ވަޑައިގެންނެވިތާ މިހާރު ވަނީ އަހަރެއް ފުރިފަ އެވެ. އިނގިރޭސި ވިލާތުގައި ހުންނެވުމަށް ފަހު މީގެ ކުރިން ވެސް އެ މަނިކުފާނު ވަނީ ލަންކާއަށް ވަޑައިގެންފަ އެވެ.