އިސްލާމްދީނާ ޚިލާފު ޤާނޫނެއް ފާސްކޮށްފިނަމަ އެކަން އެޅޭނީ މަޖިލީހުގެ މެމްބަރުންގެ ބޮލުގައި:އައްސަދު

މަސްތުވާތަކެތި ބޭނުންކޮށްގެން، މަސްތުވާތަކެތި ރެޑްހޭންޑުކޮށް ހިފާ މީހުންނަކީވެސް ކުށެއް ނެތް ބައެއްކަމަށް ޤާނޫނު އަސާސީގައި ލިޔެލުމުން މިސަރުކާރަށް ތަންފީޒު ކުރަން ކެރޭނެ ކަމަށް ރައީސް ޔާމީން ވިދާޅުވި ބަހުގެ މާނައަކީ ދިވެހިރާއްޖޭގެ ޤާނޫނުގައި އޮންނަ ގޮތަށް ޖުޑީޝަރީއިން ކުރާ ހުކުމަކަށް އެމަނިކުފާނަށް ފޯރުވޭނެ އެއްވެސް ބާރެއް ނޯންނާނެ ކަމަށް ކަމުގައި ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު އަޙްމަދު އައްސަދު ވިދާޅުވެއްޖެއެވެ.

ހުކުރު ދުވަހުގެ ރޭ ރާއްޖެ ޓީވީގެ މިރައީސް ޕްރޮގްރާމްގައި އައްސަދު ވިދާޅުވީ ހދ. ނެއްލައިދޫ ބަނދަރު ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް އެ ވިދާޅުވި ބަހުގެ ޙަޤީޤީ މާނައަކީ މީހަކަށް ކޮށްފަ އޮންނަ ހުކުމަކަށް ނުވަތަ ޤާނޫނަކަށް ބަދަލެއް ގެންނަ ނަމަ އެކަން ކުރާނީ ރައްޔިތުންގެ މަޖިލީހުން ކަމަށާއި އެކަމުގައި ރައީސް ޔާމީނަށް ކުރެވޭނެ އެއްވެސް ކަމެއް ނޯންނާނެ ކަމަށެވެ.

ރައްޔިތުންގެ މަޖިލީހުން ފާސްކުރާ ކޮންމެ ޤާނޫނެއްވެސް ތަންފީޒުކުރައްވާނެ ކަމަށް ރައީސް ޔާމީން ވިދާޅުވާ ބަހުގެ މާނައަކީ ކޮބައިތޯ ސުވާލަކަށް ޖަވާބު ދެއްވަމުން އައްސަދު ވިދާޅުވީ، ރައްޔިތުންގެ މަޖިލީހުން ފާސްކުރާ ބައެއް ޤާނޫނުތައް ތަންފީޒު ނުކޮށް އަނބުރާ ފޮނުވާލާފައިވެސް އެބަހުރި ކަމަށެވެ. އެހެންނަމަވެސް، ރައްޔިތުންގެ މަޖިލީހުން ދެ ފަހަރަށް ފާސްވެއްޖެ ނަމަ، ޤާނޫނަކަށް ވެގެންދާނެ ކަމަށް ރާއްޖެ ޓީވީއިން ދެންނެވުމުން އައްސަދު ވިދާޅުވީ، އެހެން ކަމުގައި ވަނީނަމަ އެ ކަން އެޅޭނީ މަޖިލީހުގައި ތިއްބަވާ މެމްބަރުންގެ ބޮލުގައި ކަމަށާއި އެއީ ރައީސް ކުރައްވާނެ ކަމެއް ނޫން ކަމަށެވެ.

ދިވެހިރާއްޖޭގައި އިންސާފު ޤާއިމް ނުކުރެވޭ ކަމަށް ގިނަ ބަޔަކު ޝަކުވާކުރަމުންދާ ކަން ރާއްޖެ ޓީވީއިން ފާހަގަކުރުމުން އައްސަދު ވިދާޅުވީ، ޖުޑީޝަރީއިން ނިންމާ ކަމަކަށް ރައީސުލް ޖުމްހޫރިއްޔާއަށްވެސް އަދި އެހެންވެސް މީހަކަށް ފާޑު ނުކިޔޭނެ ކަމަށެވެ.