ޓްރަމްޕް ހުވާކުރުމުގެ ރަސްމިއްޔާތައް ވެނެޒުއޭލާއިން ފަސް ލައްކަ ޑޮލަރު ދިން
މި ފައިސާ ދިނީ އެ ގައުމަށް ނިސްބަތްވާ ކުންފުން
2017 ޖެނުއަރީ 20 ވަނަ ދުވަހު ޓްރަމްޕް ހުވާ ކުރެއްވި ދަރުބާރު
ރައީސް ޑޮނަލްޑް ޓްރަމްޕް ހުވާކުރެއްވުމުގެ ރަސްމިއްޔާތަށް ވެނެޒުއޭލާއިން ފަސް ލައްކަ އެމެރިކަ ޑޮލަރު ހަދިޔާކޮށްފައިވާކަމަށް އާ ރެކޯޑްތަކަކުން ދައްކައިފިއެވެ.
ފެޑެރަލް އިލެކްޝަން ކޮމިޝަނަށް ހުށަހަޅާފައިވާ ލިޔުންތަކުގައިވާ ނަމަކީ އެމެރިކާގައި އޮންނަ ވެނެޒުއޭލާގެ ތެޔޮކުންފުނީގެ ސަބްސިޑިއަރީ ކުންފުނި ސިޓްގޯ ޕެޓްރޯލިއަމްއެވެ.
މިކަން ހާމަވެފައި މިވަނީ ވެނެޒުއޭލާގެ އިގްތިސާދު ހީނަރުވެ ކާބޯތަކެތީގެ ދަތިކަން ކުރިމަތިވެ، އިންފްލޭޝަން މައްޗަށް ގޮސް ކުށްކުރުން އާއްމުވެފައިވަނިކޮށެވެ.
އާ އިންތިޚާބެއް ބޭއްވުމަށް ގޮވާލައި އެތައްހާސް ބަޔަކު މަގުތަކަށް ނިކުމެ ބުދަ ދުވަހު ބޭއްވި މުޒާހަރާތަކުގައި ދެ މީހެއްގެ ގަޔަށް ބަޑިޖަހާ މަރާލާފައި ވެސް ވެ އެވެ.
ޓްރަމްޕްގެ ހުވާ ކުރުމުގެ ރަސްމިއްޔާތަށް ޚަރަދު ކުރިކަމަށްބުނެފައިވާ މައިގަނޑު އެހެނިހެން ވިޔަފާރިތަކުގެ ތެރޭގައި ޕެޕްސީއާއި ވޯލްމާޓް ހިމެނެއެވެ.
ޕެޕްސީއިން 250،000 ޑޮލަރު އަދި ވޯލްމާޓުން 150،000 ޑޮލަރު ދީފައިވާއިރު އެމެރިކަން ފުޓްބޯލް ޓީމުތަކުގެ ވެރިން ނުވަތަ އެ ފަރާތްތަކުގެ ކުންފުނިތަކުން ފަސް މިލިއަނަށްވުރެ ގިނަ ޑޮަލަރު ދީފައިވެއެވެ.
ކެސިނޯއެއްގެ ވެރިޔެއްކަމަށްވާ ބިލިއަނަރ ޝެލްޑަން އެޑެލްސަންވެސް ވަނީ ފަސް މިލިއަން ޑޮލަރު ދީފައެވެ.
