ކެނެޑާގެ ކުބެކް ސިޓީގެ މިސްކިތެއްގައި އާދީއްތަ ދުވަހުގެ ރޭ ހިނގި ބަޑިޖެހުމުގެ ހާދިސާއެއްގައި ފަސް މީހުން މަރުވެއްޖެ ކަމަށް ރިޕޯޓުތައް ބުނެފިއެވެ.
މިސްކިތުގެ އޮފިޝަލެއް މިކަން ކަށަވަރު ކޮށްދެއްވާފައިވާއިރު މަންޒަރު ދުށް މީހުންނާ ހަވާލާދީ މިކަން ވަނީ މީޑިއާތަކުގައި ރިޕޯޓުކޮށްފައެވެ. މަންޒުރުދުށް މީހަކާ ހަވާލާދީ ރޮއިޓާސްގައި ރިޕޯޓުކޮށްފައިވަނީ ބަޑި ހިފައިގެން ހުރި ތިން މީހަކު ކުބެކް ސިޓީގެ "ކުބެކް ސިޓީ އިސްލާމިކް ސެންޓާރ" މިސްކިތުގައި 40 ވަަރަކަށް މީހުން ތިއްބާ ވަދެ ބަޑި ޖަހާފައިވާ ކަމަށެވެ.
މިހާދިސާއާ ގުޅިގެން ފުލުހުން މީޑިއާއަށް ބުނެފައިވަނީ ވަރަށް ގިނަ ބަޔަކު މި ހާދިސާގެ ޝިކާރައަކަށް ވެފައިވާ ކަމަށާއި އަދި ބަޔަކު މަރު ވެސް ވެފައިވާ ކަމަށެވެ. އަދި ތުހުމަތު ކުރެވޭ މީހުން ހައްޔަރުކޮށްފައިވާ ކަމަށް ވެސް ފުލުހުން ބުނެއެވެ.
މިސްކިތުގެ "ރައީސް" މުހައްމަދު ޔަންގުނީ މިކަމާ ގުޅޭ ގޮތުން ބުނެފައިވަނީ މިއީ ވަރަށް އަނިޔާވެރި އަމަލެއް ކަމަށާއި އަދި މިކަން ހިނގީ ކީއްވެތޯ ސުވާލު އުފައްދަވާފައެވެ.
ރިޕޯޓުތައް ބުނާ ގޮތުން މިފަހުގެ އަހަރުތަކުގައި ކުބެކް ސިޓީގައި އިސްލާމް ދީނަށް ނަފްރަތު އުފެދުން ވަނީ އިތުރުވާން ފަށާފައެވެ.
