ޗެލްސީގެ ފުރަތަމަ އެގާރައިން ޖާގަ ލިބޭނެކަމުގެ ފުރިހަމަ ޔަގީންކަން އެބައޮތް ކަމަށް ދުނިޔޭގެ އެންމެ އަގުބޮޑު ގޯލްކީޕަރު ސްޕެއިނުގެ ކެޕާ އަރިއްޒަބަލާގާ ބުނެފިއެވެ.

ޗެލްސީން މި ނިމުނު ޓްރާންސްފާ ބާޒާރުގައި ވަނީ ރެނެސްއަށް ކުޅެމުން އައި ފްރާންސްގެ ގޯލްކީޕަރު އެޑޮއާޑް މެންޑީގެ ސޮއި ހޯދާފައެވެ. ޗެލްސީން ގޯލްކީޕަރެއްގެ ސޮއި ހޯދީ ކެޕާއާ މެދު އެ ޓީމުގެ ކޯޗު ފްރޭންކް ލަމްޕާޑް ހިތްހަމަނުޖެހޭތީ ކަމަށް ރިޕޯޓުތައް ބުނެއެވެ. ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގައި 2018 ވަނަ އަހަރު ކެޕާ ޗެލްސީއަށް ބަދަލުވީ 71.6 މިލިޔަން ޕައުންޑުގެ ފީއަކަށެވެ. އެކަމަކު ޗެލްސީން ކުޅުނު ގިނަ މެޗުތަކުގެ ކެޕާގެ ފަރާތުން ގިނަ ގޯސްތަކެއް ފެނިފައިވާއިރު، ކެޕާއަށް ޗެލްސީގެ ސަޕޯޓަރުންވެސް ނުރުހެއެވެ.

ދާދި ފަހުން އުމުރުން 26 އަހަރުގެ ކެޕާ ބުނީ ކޮންމެ މީހެއްގެ ދިރިއުޅުމުގައި އާއި ކެރިއަރުގައިވެސް އަޑިގަނޑަކަށްފަހު އުސްގަނޑެއް އަންނާނެ ކަމަށެވެ. އެގޮތުން އަލުން އަނބުރާ އެނާގެ އަސްލު ފެންވަރު ދެއްކުމަށް ބުރަކޮށް މަސައްކަތް ކުރާނެ ކަމަށާއި، ފުރަތަމަ އެގާރައިން ޖާގަ ލިބޭނެކަމުގެ ފުރިހަމަ ޔަގީންކަން އޭނާއަށް އެބައޮތް ކަމަށެވެ.

ޗެލްސީން ކެޕާ ދޫކޮށްލަން އުޅޭ ކަމަށް މީގެ ކުރިން މީޑިއާތަކުން ރިޕޯޓުކުރި ނަމަވެސް، ދާދި ފަހުން ޗެލްސީގެ ކޯޗު ފްރޭންކް ލަމްޕާޑް ބުނީ ކެޕާއާ މެދު މީޑިއާއިން އަމަލުކުރަމުން އަންނަނީ ރަނގަޅަކަށް ނޫން ކަމަށެވެ. އަދި ކެޕާ ދެން މި ސީޒަނުގައި ޗެލްސީގެ ގޯލުން ނުފެންނާނެއޭ ނުބުނާނެ ކަމަށާއި، ކެޕާއަށް ޗެލްސީގައި ފުރުސަތު އޮންނާނެ ކަމަށްވެސް ލަމްޕާޑް ބުންޏެވެ.

ލަމްޕާޑް މިހެން ބުނި ނަމަވެސް، ޗެލްސީން އެންމެ ފަހުން ކުޅުނު ދެ މެޗުގައިވެސް އެ ޓީމުގެ ގޯލް ބަލަހައްޓާފައިވަނީ މެންޑީއެވެ.

އިނގިރޭސި ޕްރިމިއާ ލީގުގައި ޗެލްސީން ދެން މެޗެއް ކުޅޭނީ މި މަހުގެ 17 ވަނަ ދުވަހުއެވެ. އެ ދުވަހު އަމިއްލަ ދަނޑުގައި ޗެލްސީ ނުކުންނާނީ ސައުތެމްޓަނާ ދެކޮޅަށެވެ.