ޓްރާންސްޕޯޓް މިނިސްޓްރީގެ ޕަރމަނަންޓް ސެކެރަޓަރީގެ ކޮރަޕްޝަންގެ މައްސަލަތަކެއް ސިވިލް ސަރވިސްއަށް!
29 ސެޕްޓެމްބަރު 2020 | އަންގާރަ 08:23މައިގަނޑު 8 މައްސަލައެއްގެ މައްޗަށް ބިނާކޮށް ހުށަހަޅާފައިވޭ
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޕަރމަނަންޓް ސެކެރެޓަރީ އަބްދުﷲ ފަޔާޒް، ސިވިލް ސާވިސް ކޮމިޝަންގެ ރައީސް ޑރ. އަލީ ޝަމީމް އާއި އެކު
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޕަރމަނަންޓް ސެކެރެޓަރީ އަބްދުﷲ ފަޔާޒްގެ ކޮރަޕްޝަންގެ މައްސަލަތަކެއް އެ މިނިސްޓްރީގެ މުވައްޒަފަންތަކެއް ސިވިލް ސަރވިސް ކޮމިޝަން އަދި އެސީސީ އަށް ހުށަހަޅައިފިއެވެ.
އަބްދުﷲ ފަޔާޒަކީ ރައީސް ޔާމީން ސަރުކާރުގައި މިނިސްޓްރީ އޮފް ހައުސިންގް އެންޑް އިންފްރާސްޓްރަކްޗަރގެ ޑެޕިއުޓީ މިނިސްޓަރުގެ މަގާމު އަދާކުރެއްވި ބޭފުޅެކެ އެވެ. އަދި ސިވިލް ސަރވިސް އިން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޕަރމަނަންޓް ސެކެރެޓަރީގެ މަގާމަށް އަބްދުﷲ ފަޔާޒް އައްޔަން ކޮށްފައިވަނީ އޭޕްރިލް 2019 ގައެވެ.
މައިގަނޑު 8 މައްސަލައެއްގެ މައްޗަށް ބިނާކޮށް މިނިސްޓްރީގެ މުވައްޒަފުން ހުށަހެޅި މައްސަލަތަކުގެ ތެރޭގައި ސިވިލް ސަރވިސްގެ ގަވާއިދާ ހިލާފަށް އަބްދުﷲ ފަޔާޒާއެކު ކުރިން ހައުސިންގ މިނިސްޓްރީގައި މަސައްކަތް ކުރި 5 ފަރާތަކަށް ވަޒީފާ ދިނުމާއި، ވަކި ފަރާތަކަށް ވަޒީފާ ހަމަޖެއްސުމުގެ ނިޔަތުގައި ވަޒީފާއަށް ކުރެވޭ އިއުލާންތަށް ބާތިލްކޮށް އަލުން އިއުލާންކުރުމާއި މަގާމުގެ ޝަރުތު ހަމަނުވާ ފަރާތެއް ގަވާއިދާ ހިލާފަށް ވަޒީފާގައި ގެންގުޅުމާއި، ތިއަރީ އިމްތިހާން ނުހަދައި ދޫކޮށްފައިވާ ލައިސަންސް ކާޑުތަކެއްގެ ލިޔެކިޔުންތަށް ނައްތާލުން ހިމެނެއެވެ.
މިމައްސަލައާއި ގުޅިގެން "ރާއްޖެ އެމްވީ" އަށް މިނިސްޓްރީގެ ސިޔާސީ މުވައްޒަފެއް މައުލޫމާތުދިން ގޮތުގައި އަބްދުﷲ ފަޔާޒް މުވައްޒަފުންނަށް ވަރަށް ތަފާތުކުރެއެވެ.
އެގޮތުން ފަޔާޒްގެ އަރިސް ބޭފުޅުންގެ މައްސަލަތަށް އޮއްބާލުމާއި މައްސަލަތަކާއި ގުޅުންހުރި ލިޔެކިޔުންތަށް ފެންނަން ނުހުންނަ މައްސަލައަކީ އެންމެންނަށް އިނގޭ ބޮޑު ސިއްރެކެވެ. އަދި ޑެޕިއުޓީ ޑިރެކްޓަރެއް ނުފޫޒު ބޭނުންކޮށްގެން ދޫކޮށްފައިވާ ލައިސަންސެއްގެ މައްސަލަ ބެލުމަށް ސިވިލް ސަރވިސްއިން އަބްދުﷲ ފަޔާޒަށް އަންގާފައިވާތާ އަހަރެއްވީ މައްސަލައާއި ގުޅުންހުރި ލިޔެކިޔުން ނުފެންނަ ކަމަށް ބުނެއެވެ.
ޓްރާންސްޕޯޓް މިނިސްޓްރީއަކީ އަބަދުވެސް ކޮރަޕްޝަންގެ އަމަލުތަށް ގިނަކަމަށް އަޑުފެތުރިފައިވާ ވުޒާރާއެކެވެ. އަދި މިނިސްޓަރ އައިޝަތު ނަހުލާ މީގެ ކުރިން ވިދާޅުވެފައިވަނީ އެ ވުޒާރާގެ ހަޑި ސާފުކުރަން ޖެހޭ ކަމަށެވެ.
