އިނގިރޭސި ވިލާތަށް ކޮވިޑުގެ ދެވަނަ ރާޅެއް
19 ސެޕްޓެމްބަރު 2020 | ހޮނިހިރު 01:54ހުކުރު ދުވަހު 4322 ކޭސް ރިޕޯޓުކޮށްފައިވޭ
އިނގިރޭސި ވިލާތުގެ ބޮޑު ވަޒީރު ބޯރިސް ޖޯންސަން | ރޮއިޓާސް
އިނގިރޭސި ވިލާތައް މިހާރު ފެންނަމުންދަނީ ކޮވިޑް-19ގެ ދެވަނަ ރާޅެއް ކަމަށް އެގައުމުގެ ބޮޑު ވަޒީރު ބޯރިސް ޖޯންސަން ވިދާޅުވެއްޖެއެވެ.
އިނގިރޭސި ވިލާތުގެ ހާލަތާއި ގުޅިގެން ވާހަކަ ދައްކަވަމުން ބޯރިސް ވިދާޅުވީ ކޮވިޑުގެ ދެވަނަ ރާޅެއް އައި ނަމަވެސް ދެވަނަ ބޮޑު ލޮކްޑައުން އަކަށް ދާން ބޭނުން ނުވާ ކަމަށެވެ. އެހެންނަމަވެސް، ސޯޝަލް ޑިސްޓެންސިންގް އާއި ގުޅޭ ފިޔަވަޅުތައް ހަރުކަށި ކުރަން ޖެހިފައިވާ ކަމަށް އެމަނިކުފާނު ވިދާޅުވިއެވެ.
ބޯރިސް މިހެން ވިދާޅުވެފައިވާއިރު އިނގިރޭސިވިލާތުން ވަނީ ހުކުރު ދުވަހު 4322 ކޭސް ރިޕޯޓުކޮށްފައެވެ. އެއާއެކު އެގައުމުން ވަނީ ޖުމްލަ 381,614 (ތިން ލައްކަ އަށްޑިހަ އެއްހާސް ހަ ސަތޭކަ ސާދަ) ކޭސްއެއް ރިޕޯޓު ކޮށްފައެވެ. މީގެތެރެއިން 41,705 މީހަކު ވަނީ މި ބަލީގައި ދުނިޔެ ދޫކޮށްފައެވެ.
ފިޔަވަޅުތަކާއި ގުޅިގެން އިތުރަށް ވާހަކަ ދައްކަވަމުން އެމަނިކުފާނު އިތުރަށް ވިދާޅުވީ މި ވައިރަހުގެ ޕީކު ތިރި ކުރުމަށް އެގައުމުގެ ރައްޔިތުން ވަނީ ނަމޫނާ ދައްކާފައި ކަމަށެވެ. ފިޔަވަޅުތައް ހަރުކަށި ކުރުމުން ރައްޔިތުންނަށް އުނދަގޫވާނެ ކަން ގަބޫލު ކުރައްވާ ކަމަށް އޭނާ ވިދާޅުވިއެވެ.
