ލަންކާގެ ކުނިގޮނޑެއްގެ ކުނިތައް ފައިބައިގަނެ މަރުވި މީހުންގެ އަދަދު 26 އަށް އަރައިފި

ސްރީލަންކާގެ ވެރިރަށް ކޮލަމްބޯގައި ކުނި ފުންޏެއް ބަންޑުންވެ ކުނިތަކުގެ ދަށުވި ގެތަކުން ދިރިހުއްޓައި މީހަކު ފެނިދާނެކަމުގެ އުއްމީދު ފަނޑުވަމުން ދާއިރު ރައްޔިތުން ރުޅިގަދަވެ އެމީހުންގެ ކަންބޮޑުވުންތަކަށް ސަރުކާރުން އިޖާބަ ނުދޭ ކަމަށް ބުނެފިއެވެ.

ހުކުރު ދުވަހު ދިމާވި މި ހާދިސާގައި މަރުވި މީހުންގެ އަދަދު ވަނީ 26 އަށް އަރާފައި ކަމަށް އަސްކަރިއްޔާއިން ބުނެއެވެ. މަރުވި މީހުންގެ ތެރޭގައި ހަ ކުޑަކުދިން ވެސް ހިމެެނެއެވެ.

ކުއްލިހާލަތުގައި މަސައްކަތްކުރާ ފަރާތްތަކުން ގެންދަނީ ފަރުބަދައެއްހެން ޖަހަފާފައި ހުރި ކުނިފުނީގެ ދަށަށް ދިޔަ ގެތަކުގެ ދަށުން ދިރިހުއްޓާ މީހަކު ފެނޭތޯ މަސައްކަތްކުރަމުންނެވެ.

ކޮލަމްބޯގެ އިރުއުތުރުގައި ހުންނަ މި ކުނިފުނީގެ އުސްމިނުގައި 91 މީޓަރު ހުއްޓެވެ.

ބިންގަޑުކަނޑައިގެން ގޮސް ކުނިތައް ފައިބައިގެންފައި ވަނީ ކުނިފުނީގެ އެންމެ މަތީގައި އަލިފާން ރޯވެގެން ހުކުރު ދުވަހުއެވެ.

ކުނިފުނީގައި ރޯވެ ހާދިސާ ހިނގި ވަގުތަކީ ސިންހަޅައިންނާއި ތަމަޅައިންގެ އާ އަހަރު ފާހަގަކުރުމަށް އެތައް ބަޔަކު ގެތަކުގައި އުޅެމުން ދިޔަ ވަގުތެކެވެ.

ލަންކާގެ ސަރުކާރުންވަނީ ކުނިތަކުގެ ދަށުން މީހަކު ފެނޭތޯ ބެލުމަށް ކޮނުމަށްޓަކައި އެތައް ސަތޭކަ ސިފައިންނާއި ފުލުހުން ނެރެފައެވެ. އެގޮތުން 600 އަށްވުރެ ގިނަ ގޭގެ މީހުން ވަނީ ސަރަހައްދު ދޫކޮށް ފަހު އެހެން ހިސާބުތަކަށް ބަދަލުވެފައެވެ.

ލަފާކުރެވޭ ގޮތުން 40 އާއި 100 އާ ދެމެދުގެ ގެއަށް ވަނީ ކުނިތައް ފައިބައިފައެވެ.

ދުވާލެއްގެ މައްޗަށް 800 ޓަނުގެ ކުނި އުކާލާ އެ ކުނި ފުނީގެ ސަބަބުން ސިއްހީ މައްސަލަތައް ދިމާވާކަމުގެ ޝަކުވާކޮށް އެހެން ސަރަހައްދަކަށް ބަދަލުކޮށްދިނުމަށް އާއްމުން އެދެމުންދާތާ އެތައް އަހަރެއް ވެއްޖެއެވެ.