އަފްޣާންގެ އަސްކަރީ ބޭހަށް ދިން ހަމަލާގައި މަރުވި ސިފައިންގެ އަދަދު 100 އަށް އަރައިފި
ހުކުރު ދުވަހު ދިން ހަމަލާގެ ޒިންމާ ތާލިބާން އިން ވަނީ ނަގައިފައި
ތާލިބާނުން ދިން ހަމަލާއެއްގައި މަރުވި މީހުންގެ ޖަނާޒާގެތެރެއިން
އަފްޣާނިސްތާނުގެ އުތުރުގެ ސިޓީއެއް ކަމަށްވާ މަޒާރޭ ޝަރީފް ގައި ހުރި އަސްކަރީ ބޭހަކަށް ހުކުރު ދުވަހު ހަނގުރާމަވެރިން ދިން ހަަމަލާގައި މަރުވި މީހުންގެ އަދަދު 100 އަށް އަރައިފި ކަމަށް ކަމާބެހޭފަރާތްތަކުން ބުނެފިއެވެ.
އަފްޣާނުގެ ޑިފެންސް މިނިސްޓްރީގެ ތަރުޖަމާނުގެ ނައިބު މުހައްމަދު ރަޑްމަނިޝް ވިދާޅުވީ ހަނގުރާމަވެރިން އަސްކަރީ ބޭހަށް ވަނީ ދެ އަސްކަރީ ވެހިކަލްގައި ކަމަށާއި ދެން އެމީހުން އަސްކަރީ ބޭހުގެ ތެރޭގައި އިން މިސްކިތެއްގައި ތިބި ސިފައިންނަށް ހަމަލާ ދިނީ ކަމަށެވެ.
ރިޕޯޓުތައް ބުނާ ގޮތުން އަސްކަރީ ބޭހަށް ހަމަލާދިން ހަނގުރާވެރިންގެ ތެރޭގައި ފިދާއީން ވެސް ހިމެނެއެވެ.
ހަމަލާގައި މަރުވި ސިފައިންގެ އަދަދު އަފްޣާންގެ ޑިފެންސް މިނިސްޓްރީން ހާމަކުރިއިރު، ހަމަލާ ދެވުނު އަސްކަރީ ބޭހުގައިތިބި ސިފައިންގެ އިސްވެރިން ވިދާޅުވެފައިވަނީ، ހަމަލާގައި ސިފައިންގެ 150 މީހުން މަރުވި ކަމަށެވެ.
ހުކުރު ދުވަހު ދިން ހަމަލާގެ ޒިންމާ ތާލިބާނުން ނަގާފައިވެއެވެ. ތާލިބާންގެ ތަރުޖަމާނު ޒަބިހުﷲ މުޖާހިދު މީޑިއާތަކަށް ފޮނުވި މެއިލްއެއްގައި ވަނީ ހުކުރު ދުވަހު ދިން ހަމަލާގެ ޒިންމާ ނަގާ ކަމަށް ބުނެފައެވެ.
މިދިޔަ މާޗްމަހު ކުރީކޮޅުވެސް އަފްގާންގެ އަސްކަރިއްޔާއަށް އަމާޒުކޮށް ހަނގުރާމަވެރިންތަކެއް ވަރުގަދަ ހަމަލާއެއް ދިނެވެ. އެގޮތުން އަފްޣާން ސިފައިން ހިންގާ އަސްކަރީ ހޮސްޕިޓަލަކަށް ޑޮކްޓަރުން ކަމަށް ހެދިގެން ވައިން ހަނގުރާމަވެރިން ދިން ހަމަލާގައި އެތައް ބަޔަކު މަރުވިއެވެ.
