ކޮވިޑް-19 އަށް ޕޮޒިޓިވްވެފައިވާ 8 މީހުން އައިސީޔޫގައި، 3 މީހުންނަށް ވެންޓިލޭޓަރުގައި ފަރުވާދެނީ
2 ސެޕްޓެމްބަރު 2020 | ބުދަ 19:09އަތޮޅުތަކުގެ ދެ ފެސިލިޓީއެއްގައި މީހުންނަށް އަންނަނީ ފަރުވާ ދެމުން
ކޮވިޑް ފެސިލިޓީއެއް
ރާއްޖެއިން ކޮވިޑް-19 އަށް ޕޮޒިޓިވްވެފައިވާ މީހުންގެ ތެރެއިން 8 މީހަކަށް އައިސީޔުގައި ފަރުވާ ދެމުންދާ ކަމަށާއި 3 މީހަކަށް ފަރުވާދެމުންދަނީ ވެންޓިލޭޓަރަށް ލައިގެން ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ގެ ތަރުޖަމާން ޑރ. ނަޒްލާ ރަފީގު ވިދާޅުވެއްޖެ އެވެ.
ބުދަ ދުވަހުގެ ރޭ އެ ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްވަމުން ޑރ ނަޒްލާ ވިދާޅުވީ މިވަގުތު ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި 4 މީހަކަށް އައިސީޔޫގައި ފަރުވާ ދެމުންދާ ކަމަށާއި މީގެތެރެއިން 2 މީހުންނަށް ފަރުވާދެމުން އަންނަނީ ވެންޓިލޭޓަރަށް ލައިގެން ކަމަށެވެ. އަދި ދަރުމަވަންތަ ހޮސްޕިޓަލްގެ 16 ވަނަ ފަންގިފިލާގެ ވޯޑްގައި 5 މީހުން އެޑްމިޓް ކޮށްފައިވާ ކަމަށް ޑރ ނަޒްލާ ވިދާޅުވިއެވެ. އަދި 20 ވަނަ ފަންގިފިލާގައި އެކަކަށް ވޯޑްގައި ފަރުވާ ދެމުންދާ ކަމަށް ޑރ ނަޒްލާ ވިދާޅުވިއެވެ. ހުޅުމާލެ ކޮވިޑް ފެސިލިޓީގައި ވޯޑްގައި 149 މީހަކަށް ފަރުވާދެމުންދާއިރު އައިސީޔުގައި 4 މީހަކު އަދި އެކަކު ވެންޓިލޭޓަރުގައި އެބައޮތް ކަމަށް ޑރ ނަޒްލާ ވިދާޅުވިއެވެ.
މީގެއިތުރުން އަތޮޅު ތެރޭގައި ހުރި ކޮވިޑް ފެސިލިޓީތަކުގެ ތެރެއިން ބ އޭދަފުށި ކޮވިޑް ފެސިލިޓީގައި އެކަކަށް އެޑްމިޓްކޮށްގެން ފަރުވާދެމުންދާއިރު އަދި ގއ ވިލިގިނލި ކޮވިޑް ފެސިލިޓީގައި 2 މީހުންނަށް ފަރުވާދެމުންދާ ކަމަށް ޑރ ނަޒްލާ ވިދާޅުވިއެވެ.
ކޮވިޑް-19 އަށް ޕޮޒިޓިވްވެގެން އައިސޮލޭޝަން ފެސިލިޓީތަކުގައި މިވަގުތު 1365 މީހުން ތިބިއިރު 81 މީހަކު ފާއިތުވި 24 ގަޑިއިރު ތެރޭގައި ދޫކޮށްލާފައިވާ ކަމަށް ޑރ ނަޒްލާ ވިދާޅުވިއެވެ.
ކޮވިޑް-19 އަށް ޕޮޒިޓިވްވާ މީހުންނަށް ފަރުވާ ދިނުމަށް ގާއިމް ކޮށްފައިވާ ފެސިލިޓީތަކުގެ ކެޕޭސިޓީ އަށް ބަލާއިރު، ހއ. އިހަވަންދޫ ޓްރާންސިޓް ފެސިލިޓީގައި ތިން އައިސީޔޫ އެނދު ހުރެއެވެ. ށ. ފުނަދޫ ކޮވިޑް ފެސިލިޓީ ގައި 20 އައިސީޔޫ އެނދާއި 37 އައިސޮލޭޝަން އެނދު ހުރި އިރު، ބ. އޭދަފުށި ކޮވިޑް މެނޭޖްމެންޓް ފެސިލިޓީ ގައި 20 އައިސީޔޫ އެނދާއި 25 އައިސޮލޭޝަން އެނދު ހުރެއެވެ.
މީގެ އިތުރުން، ލ. ގަމުގައި ގާއިމުކުރި ފެސިލިޓީގައި ހުރީ 15 އައިސީޔޫ އެނދު އަދި 13 އައިސޮލޭޝަން އެނދެވެ. ގއ. ވިލިނގިލީ ކޮވިޑް ފެސިލިޓީގައި 18 އައިސީޔޫ އެނދާއި ފަސް އައިސޮލޭޝަން އެނދު ހުރިއިރު، އައްޑޫގައި 23 އައިސީޔޫ ބެޑް އާއި 20 އައިސޮލޭޝަން އެނދު ހުރެއެވެ.
